新疆南北走の第十一天

五彩灣 -> 烏魯木齊 -> 新疆維吾爾自治區博物館 -> 烏魯木齊機場 -> 喀什

尋日離開五彩灣，車程仲有兩、三個鐘先到住的地方，仲要落大雨，慘！去到已經天黑黑！尋晚我地住響五彩灣溫泉渡假村，聽落好似好grand囉，其實係荒地中的一片綠洲！

尋晚發生一件小插曲，唔講住先，先影影渡假村的遠景！

知唔知呢d係乜？太空艙？無錯，係響地球的太空艙！俾人住的！見到個分體式冷氣機嗎？左面係門口，入到室內有一房一廳，仲有麻雀供應，可以響廳打牌添！

導遊話呢處有得浸溫泉，係喎！好似泳池咁！有煙噴出來的，應該係溫泉水掛！

好啦，講下我地既小插曲！事原係尋晚我地好夜先入來，d房俾其他walk-in的人「侵占」，無乜房剩！我地有d團友分配去左「太空艙」，領隊見我地都算好人士，就想益我地住間正房，係全渡假村中最grand、最正的一間房，就係呢間「大西洋」獨立屋！

「大西洋」獨立屋真係響大西洋，同渡假村建築群距離幾分鐘步行路程，真係「俾人打劫都唔知」！一入到獨立屋內，嘩！有客廳、有偏廳，有套房全屋有二、三千尺左右啦，剩係個廁所都有200尺左右，你話誇唔誇呢！

我老婆入到去，直覺話俾佢聽有d唔妥，好啦，沖涼先啦！天寒地凍，首先沖個熱水涼先，點知開極水，d水都係凍的！仲有，d渠係塞的，去廁所的水係會「倒流」的！嘩！點住得人呀！

我地立即打電話俾領隊同導遊，強烈要求換房！點知，佢地首先派出「職業特工隊」入房維修，叫我地出廳等待一下！嘩！水喉就話整得，通渠點算呀！

我地堅持換房，擾攘左大半個鐘頭，終於換左間有熱水、有涼沖的100尺房間！我老婆話好有安全感的！之後都唔知幾好訓！

「大西洋」獨立屋的遠景！係咪「俾人打劫都唔知」呢！

經過尋晚一役，我同老婆成為全場焦點，係咁俾團友問尋晚有幾恐怖！哈哈！

好啦，今日要返烏魯木齊喇！途經天山，梗係要影下相啦！

好喇，經過五個鐘的車程，終於到達烏魯木齊，去新疆維吾爾自治區博物館。

因為博物館中唔可以影相，所以只影左博物館的門口喇！

行完博物館，去睇下d人整地毯！

呢張就係「鎮店之寶」，「清明上河圖」！係織出來的！地毯來的！勁！

新疆的地毯真係幾靚的，又唔貴！我地都有d心動買添！

睇完地毯，我地要去機場，離開烏魯木齊去南疆喇！我地搭南方航空CZ6801，20:25由烏魯木齊飛去南疆喀什，睇下新疆的群山，好高的雪山呀！

到達喀什，已經係晚上22:30左右喇，好，先返酒店訓先！