那拉提 -> 天山山眽 -> 巴音布魯克平原 -> 天鵝湖 -> 九曲十八灣 -> 那拉提
尋晚實在係一個好好的經驗，因為未試過去旅行住渡假屋，但又訓得幾好喎！可以之前一晚無覺好訓啦！
一大清早起床，覺得空氣好新鮮，正！食過早餐，上午九點左右出發！
車一直上山，我地除左響車上訓覺，就無乜野做！坐左一個鐘頭車左右，我忽然覺得有d凍，起身想著件衫，看出窗外，見到呢個情境，二話不說，立即用相機影低！( 我影呢張相的時候，係無用soft lens的！ 之後亦無用 Photoshop 執過的！) 因為車上的窗係全關，而車上山後，氣溫變冷，形成「車內暖、車外凍」的情況，我地呼出的氣體比車外的溫度高，就會響車上的玻璃形成一層薄霧，車內睇出去好似有層soft lens咁！我好滿意呢張相的，仲做埋電腦 wall paper 添！
導遊話車外就係天山山眽的風景喇！成團人醒哂！狂影相！
夏天的天山山眽，真係好似瑞士咁靚！
車駛到一處叫巴音布魯克平原，好似尋日那拉提草原咁，但今日見到的比那拉提更原始，仲見到一大群羊，應該係有牧人放羊！我梗係唔會放過呢個機會影相啦！
沿途見到好多羊仔，我地再問導遊可唔可以落車影下相，其實時間好充裕的，一定無問題啦！
我同老婆見到d羊仔好似唔驚我地，我地同其他團友就慢慢行近佢地，點知d羊仔真係警覺性好高，一見勢色唔對，就走！成班羊咩就一齊閃！嘩！場面壯觀！
車繼續行，我地又開始訓喇！只見外面的景色係咁樣！兩個鐘頭前同兩個鐘頭後的景色基本上無乜變！
有時仲會停吓車，睇住d羊咩行馬路！我地的車就要「讓路」！
中午十二點左右落車食飯後，下午一點半去到今日的第二景點。蒙古包？非也。
遊覽第二景點前，梗係要去一下廁所啦！成個草原上無端端有牆？仲有「左男、加女」？！一定係廁所來的！講開又講，我地先前幾日「人有三急」的話，點樣解決呢？導遊話，響新疆係無公眾廁所的，我地坐車每隔兩小時左右，司機就會停車，通常司機會搵一d有遮擋的地方，我地成班團友就會落車，女仕仲多數會帶埋傘，左男右女、回歸大自然，響草原上解決三急問題！
講番圖中的「廁所」真係勁，呢個廁所係我去過咁多個廁所中「最臭、最污糟」的一個！未埋到去，幾十米外已經聞到d臭味！超難頂！
我地去的景點，係巴音布魯克大草原，同埋裡面的天鵝湖自然保護區，要騎馬先入到去！睇下我老婆幾威！騎白馬喎！無乜幾多隻的！
好喇！騎左十分鐘左右，終於入到「天鵝湖」喇！都無天鵝的？！影下隻馬仔，張相好似幾有詩意喎！
俾個遠景睇下！其實成個「天鵝湖」就係咁樣喇！勁失望！不過個草原都幾大的！
好喇，行左一陣，騎馬出番去喇！去番入口的蒙古包，睇到蒙古包內的成吉思汗像，好raw，好原始的！
下午三點左右，離開「天鵝湖」喇！我地帶住極度失望的眼神望住導遊，點知導遊話：「下一景點，一定唔會令大家失望的！」好，信住你先！
二十分鐘左右，車到達一處高地，導遊叫我地落車，發現周圍景色同之前睇的無乜分別，喂！又俾導遊「點」！導遊話：「你地行前d，去到山崖邊左右就會睇到好靚的景色！」好啦，睇下點啦！嘩！一向山下望，就望到下面的景色：
嘩！真係好靚！呢度叫「九曲十八灣」，河迂迴曲折，得此命名！我老婆係地理人，話呢d河響書或者記錄片就見過，真實的就第一次！好，影多幾張相先！
高地上見到的牆，知道下面係一片濕地，而「天鵝湖」亦非一個湖，係呢片濕地中的湖泊、溪流同沼澤地的總稱！
其實片高地真係好高的！我估距離下面的沼澤地有一、二百米左右！
我老婆話叫我影埋呢張，因為兩條河分流完再合一係比較少見的！
逗留一個小時，要番「酒店」喇！番到去已經成七點，個天仲係好光！又未夠鐘食飯，響附近行下先！嘩！原來渡假村附近係咁靚的！有河、有小屋、有山！
行左一陣，食飯先！又係「七餸一湯、白飯任裝」！食飽飽，仲未日落呀！影呢張相的時間係下午九點十五分，日落的景色幾靚？！
好，明天繼續......
沒有留言:
張貼留言