小MiuMo遊世界: 新疆南北走の第一天及第二天

烏魯木齊機場 -> 伊寧 -> 那拉提空中草原

今年暑假我同老婆商量去邊旅行時，我地發覺遲遲都未能計劃好，原因係今年暑期我有好多野要準備，所以D假期比較難攞，本來我只得八日假期的，但我呀頭好好，頂左我個job，令我可以放多一個星期假，頭尾有十四、十五日左右，thanks 呀頭！

本來我同老婆講，我地今年好累，想去個relax trip，可以係泰國啦！但係我老婆話上年十二月先去完，咁快又去，唔好啦！另外，我地又好貪玩，想去一d平時假期去唔到的地方，因為無咁長假期呀！想玩盡d吖！去，決定搵下有乜地方去先！

2004年去過絲綢之路，當時導遊強烈推介我地去新疆北部旅行，一來風景實在好靚，二來因為去新疆都比較辛苦，車程又長，親後生去好D！我地都去過好多間旅行社，想試下去新疆，一係就玩番絲路，我地又唔想再去多一次；一係就係一d好辛苦的團，我地更唔想去！無意間搵到一間旅行社，其實都幾「高擋」的，佢地有八天剩北疆團同十五天北疆加南疆團，睇下行程，我同老婆都好鍾意，好！報名先！起初我只想報八天北疆團，因為想留d時間休息一下，不過老婆話難得我地去新疆，去埋今次短期內應該唔會再去，今次要去就不如玩「盡」d啦！好，我地決定報十五天的南北疆旅行團，玩到最「盡」先！

其實我同老婆未試過去十五日旅行咁耐，真係唔知捱唔捱得住！好，點都試下啦！
我地於20:45搭中國南方航空CZ 6018由香港飛烏魯木齊，去到烏魯木齊是第二天的02:30，嘩！好早呀！取回行李，立即返酒店訓兩三個鐘！今晚住凱賓斯基酒店，當地算係五星級的！

點解只係訓得兩三個鐘？因為我地要響烏魯木齊機場搭CZ 6821飛07:25去伊寧，所以要8月4日上午6點左右出車，6點半前要去到機場check in！飛到伊寧大約09:00！好累呀！仲未訓夠！
去到伊寧機場，雖然好累，但真係要影番張相，因為機場好似幾個硬地足球場咁大，仲有，成個機場只得我地呢班機！再見唔到其他飛機！究竟呢個係咪機場來的？！真係大開眼界！

落機喇！無Shuttle Bus，我地仲可以「施施然」由停機坪行入「機場大樓」！

無錯！呢個就係「機場大樓」喇！一樁建築物，平平無奇的！等行李出都係幾有趣，睇住兩三個職員將行李由飛機取下，用普通卡車送至「機場大樓」，又係佢地將行李由卡車上放響行李輸送帶，幾合乎成本效益！我地覺得好威，因為成個機場由海關到運輸，都剩係服侍我地呢班機的乘客，好有「賓至如歸」的感覺！

上午十點左右，終於離開機場，出發喇！我同老婆都幾期待的，因為十幾日的行程，應該會有好多野睇的！

伊寧位於新疆的西北面，響烏魯木齊的西面，都幾近西北的邊界的。在公路上，見到兩邊的屋，感覺好似去左八十年代的廣州，兩層高的建築，十分「大陸化」！

我地先返呢兩晚住的酒店放低行李，沿途一片荒蕪，無乜屋見到！一坐就四個幾鐘頭車先去到「酒店」！

導遊話，我地成個trip要travel成五千公里車程！每個景點都要搭三四個鐘先去到的！嘩！佢叫我地有定心理準備呀！

我地呢兩晚會住大西北的「四星級」酒店！叫我地有d心理準備！佢仲話，其實西北近邊境係無乜好的酒店，我地今晚係住「渡假村」！好似「麥理浩」果D！

落車喇！真係大開眼界！去旅行未試過住「麥理浩」！我地住「草原假日渡假村」，真係有d似「麥理浩」的！不過，真係比「麥理浩」靚好多、原始好多！我地每兩人獲「分配」一間「渡假屋」，都幾大的，仲有獨立廁所添！都算係咁啦！影番張「渡假屋」的遠景！都幾靚的！