日本北九州感恩之旅の第四天(下)

長崎縣 -> 渡輪 -> 熊本縣 -> 熊本城 -> 阿蘇火山民宿

駕車五分鐘便到島原市碼頭，好多駕車人仕都趕住去買票．．．

車輛按大小收費，我地的cube收1,500円，乘客(唔計司機)每位收680円。

雖然唔係第一次駕車坐渡海輪，但在日本係第一次，好緊張呢？！

睇下我地駕cube幾勁！夾在兩駕私家車中間！

日本的渡海輪，在航行時要求所有司機及乘客在上層休息，為安全起見唔可以留在車內休息。好喇！離開長崎縣了！

我地本以為在渡輪上會好悶，原來有一附加景點，就係好似在松島咁 --- 餵海鷗！好多人買蝦條餵海鷗食，d海鷗隻隻都餵到肥肥白白！仲有，我地見到起碼有五、六十隻海鷗在盤旋，情況仲勁過松島！

老婆就輕輕鬆鬆望海，睇住d日本人餵海鷗，幾寫意！

由於今日行程較趕，我地無打算在食店午膳。求其在船上買個 Cup Noodle 食使算了。

睇下餵海鷗、食過杯麵，休息一陣，一小時後渡輪便到達熊本縣了！又落傾盆大雨！點算！一陣要去的景點響戶外的！又祈禱！

再一次感恩！半小時的車程後到達熊本城，只係落毛毛雨了！

在熊本城的入口再次見到三．一一大地震的捐款箱。

熊本城全景。我同老婆都覺得大阪城靚d．．．

不過，熊本城有一樣好特別的，就係有好多cosplay與遊客影相，呢樣一讚！Like！

上到熊本城最高的展望台，一望無際！仲見到遠處的棒球場正進行比賽，觀眾的歡呼聲及打氣聲仲傳到耳邊！勁！

由熊本城展望台到公園，見到兩位職員同其他人影相，我當然唔錯過呢個機會，叫老婆同佢地影相。其中發生一個小插曲 --- 影完相後，老婆見到左面身穿將領服的男士，服飾上竟然有一個「熊仔卡通心口針」，我老婆只係指著他的心口針，講咗一句「卡娃依呢」，個將軍即時送左個心口針俾我老婆！氹得我老婆好開心呢！我老婆去旅行成日都收到「記念品」的！

熊本城同「Q版」熊本城。

其實，老婆話都幾鍾意熊本城，因為收到記念品囉！

我地再參觀熊本城的內部，嘩！好grand的宴會廳！

好 grand 的長廊！日本風情！正！

好 grand 的鍍金日式屏風，勁Like！

行左個幾鐘，離開熊本城了！見到護城牆及護城河。

參觀完熊本城已經下午4:45，要返今晚入住的民宿，因為已通知民宿今晚六點食晚飯，唔想遲到，所以唔可以在熊本市逗留了。唯有在車上影幾張相便算。

熊本市的電車。好似函館市同長崎市的電車。

離開熊本市駕車到民宿，沿途都係鄉郊的景色，令人心曠神怡！

一小時車程左右，到達今晚的民宿！老婆話佢好期待住呢間民宿，好有特色的！我諗，我地都住過好多間民宿，其實都不抱太大期望。點知．．．呢間民宿係我同老婆其中一間印象深刻的民宿！

民宿叫 ペンション風の丘・野ばら，位於阿蘇火山下，只可駕車才能到達。一到達便被民宿的歐陸式大宅吸引！

更驚訝的係，民宿老闆話今日只有我地兩位顧客，即係我地「包場」！

上民宿二樓，先將行李放在房間，再參觀民宿內各處！我同老婆十分喜愛！

房間不會太大，但有一個小露台遠望阿蘇火山，正！

右上角係房間窗外的小露台，地下的小花園，勁靚！

呢間民宿可以為客人提供「貸切」溫泉，每家只可使用「貸切」溫泉半小時。由於今晚只得我地一家人入住，老闆話我地可以由晚上八點至九點半使用「貸切」溫泉，個半小時！勁勁正！

「貸切」溫泉是半露天，私隱度極高！二人使用呢個「貸切」溫泉，極寫意！

食飯前繼續參觀民宿。原來呢間民宿提供女士禮服，供客人穿著及影相留念，老婆話聽朝早一定要試試！

好喇！到晚餐的時間！我地進入用膳的地方，仲以為入左「意粉屋」添！極極極靚！

「包場」！房中播放著柔和的英文情歌，營造浪漫的氣氛。我同老婆十分期待同享受今晚的晚餐！

起初我以為食和式晚餐，原來係食歐陸式晚餐。老婆覺得響日本食歐陸式晚餐唔會有太大的驚喜，點知．．．

我地見到的菜式，真係以為去左一間好高級的法國餐廳，享受一道完美的法國餐！睇相都知道有幾吸引喇！

老闆於上每一道菜時，都會介紹菜式，另外老闆對我地亦好細心，睇到我地個水杯要加水，便主動幫我地添水，又不時過來問我地是否需要添飯，真係好感動呀！

Main Course 過後，上甜品了！我地見到八款不同的甜品，流哂口水！老闆話d蛋糕全部係佢老婆整的，起初我地都不抱太大期望。我老婆鍾意由最「唔鍾意」食的甜品開始先食，一食中間的綠茶蛋糕．．．嘩！十分鬆軟，香港好多高級酒店都無咁既水準！

再試左下角的焦糖蛋糕，看似平平無奇，一食．．．嘩嘩嘩！我老話從未食過咁好味的焦糖蛋糕，至今仍在回味！其他甜品亦十分有水準，我老婆話要用「高薪」聘請民宿老闆太太到香港發展，一定大有作為！

接近完美的一餐後，我同老婆先到房間休息，我打開了窗，感受阿蘇山晚上的寧靜，之後便到「貸切」溫泉，十分享受！今日的行程，只可再用「感恩」二字來形容！