日本北九州感恩之旅の第二天

博多 - > 士多啤梨園 - > 鳥栖 Outlet  - >

柳川 - > Canal City Hakata 拉麵競技館 - > 博多

今朝一早起床，首先要去取車，經過便利店，見到樽裝水仍然供應充足．．．

飲品供應亦正常．．．

我同老婆習慣買幾個飯團當早餐食，唔知點解，便利店的飯團，總比香港的好食好多！d紫菜又脆，飯又好味，材料又新鮮，正！

步行十分鐘內，便到達租車公司 ---  Budget 。響 budget 租車較平，租六日比「大公司」平10,000円！抵！

終於取車，係我好想揸的日產 Cube ！正！車身較高，車的內格比較大，sit 位較高，駕車時好舒服！我好滿意！

駕車半小時後，到達第一景點 --- 士多啤梨園！

一般的任摘任食只限三十分鐘，呢個士多啤梨園可以有一小時二十分任摘任食，正！

老婆入溫室，見到士多啤梨，極之興奮！

我地去過幾次士多啤梨園，今次呢個係最特別的，d士多啤梨真係好多、好紅！

一望無際的士多啤梨，真係好震憾！

好大粒的士多啤梨，好甜，好juicy，好鍾意！

呢個士多啤梨園仲有一些稀有的品種，呢種士多啤梨叫「桃薰」，顏色比較粉紅，味道有淡淡的桃味，好好味！

左邊的係平時見到的士多啤梨，右邊係桃薰士多啤梨。



顏色真係好唔同的！



士多啤梨園的老闆好好人，主動來同我地傾偈，又向我們介紹不同品種的士多啤梨。佢介紹的士多啤梨品種，真係好好味的，極具士多啤梨的香、甜、juicy，真係極品！

睇到都流哂口水啦！

而且佢仲帶我地去看佢的屋企、放機器的工具室及另一個溫室(本身是唔開放的)，又係好多好多好多士多啤梨！

經過一小時二十分配的狂食，我同老婆都覺得好滿足！臨走前，老闆仲送左杯咖啡俾我地飲，又同我地傾計，仲同我地影左張合照添！

食飽飽，去鳥栖 Outlet 行下！掃下貨！

Outlet 唔係好多人，其他香港人或大陸人就更加一個都見唔到！

我同老婆行左兩個鐘左右，最開心係我在 Adidas 買左三對波鞋同一件 tee，都只係 8,900円，超抵！其中包括這件為日本地震籌款的限量 Tee，香港無得賣的！

行完 Outlet ，食飽飽，繼續出發！其實今早在一到達士多啤梨園就落雨，去到 Outlet 又停左雨，我地都有擔心去下一景點柳川，因為係全程戶外的！點知一開車出發就落傾盆大雨，我同老婆唯有祈禱及交托．．．因為我地係專程駕車去柳川，如果落雨就要走回頭路，一來一回要花四小時的。

上帝真係要我地經歷佢更多．．．在柳川附近仍然落大雨，一到達柳川便開始停雨，感恩！

柳川最出名的係坐小艇遊河川，本身二人包船是要8,000円，但我地兩人坐一架艇，只需每人1,500円，真抵!

我地就係坐呢隻舢舨去參觀柳川。柳川有水鄉之稱，一定要坐舢舨才可以欣賞它的美。

起初我同老婆都不抱太大期望，只因在繁榮的市區內有一條水道，覺得好特別，所以前來參觀。

點知行行下，到達水道的入口，感覺截然不同．．．

古樸的小屋、翠綠的樹蔭．．．好特別，好寧靜，好舒服！

不同的樹顏色，令人看得心曠神怡！

途中有一小插曲 --- 沿途有好多舢舨經過，舢舨上有好多乘客，但全部都係日本人，當我地的船伕向佢地講，話的地係來自香港，乘客的反應好特別，即時議論紛紛，仲有一班日本婆婆拍手歡呼，或者係鼓勵我地，覺得我地勇敢啦！我同老婆想話俾佢地知：其實香港人都好關心日本的情況的！我同老婆就「身體力行」、「親身支持」喇！

河童像，我同老婆都係第一次見！

難得來到柳川，梗係要影番張合照啦！

參觀柳川水鄉約一小時十五分鐘，但我同老婆一d都唔覺得悶，好享受這份寧靜同和諧，河邊的小屋、沒有汽車聲、樹跟河水倒影．．．在香港肯定尋找不到的。

完成柳川水鄉之旅，感覺到大自然的寧靜、日本人的友善、仲有．．．上帝的奇妙同安排，因為參觀時全程沒有落雨，一上車又開始滂沱大雨了！

返博多，老婆話要去博多運河城 Canal City Hakata ，參觀拉麵競技館。

拉麵競技館內有好多間來自不同地方的拉麵店，有不同的口味。

我地去左其中一間顧客較多的拉麵店，叫左兩碗拉麵．．．

不過好肥膩，唔太好食囉！

之後再行多一陣商場，駕車返酒店附近泊車。

感恩的一天！今晚要好好休息，因為聽朝的景點超靚！老婆亦好期待的！