日本北九州感恩之旅の第七天(上)

別府 -> 別府地獄めぐり公式サイト

今早五點半起床，因為要在房內睇日出。其實今次唔係我同老婆第一次睇日出了，但每次我都好期待，原因係日出給人有希望、有生機的感覺，看到雲上太陽亦是十分感恩的事情。今早水平線上亦有少量雲層，睇唔不太陽從水平線上升的時刻，但過了一會，終於見到太陽柔和的光線了！超級感動！

默默欣賞太陽升起的時間．．．欣賞宇宙的奇妙．．．欣賞上帝的創造．．．默默無聲

房間向東，影相過後，我同老婆睡在褟褟米上繼續欣賞日出．．．

睇完日出，我地上左頂樓的露天風呂浸溫泉，風呂亦是向東望海的，正！

期間我遇見一個日本伯伯，佢用英文同我傾談，問我從那裡來，知道我同老婆從香港來，非常開心及感謝，伯伯亦表達了一些對福島核危機的意見。

伯伯話日本核危機比想像中來得嚴重，但日本人相信日本政府會妥善處理。另外，伯伯話核幅射影響範圍大概五十公里內，對東京、大阪、北海道等地應該無乜影響，九州就應該更無問題。不過日本人開始意識到，核電廠的選址不應該在地震帶，因為真係會好危險，所以國內已經有討論關閉位於地震帶的核電廠。伯伯仲話，雖然地震、海嘯及核危機，真係對旅遊業造成嚴重打擊，三月至四月底的旅遊業人數減少了五成，但伯伯好有信心，海嘯及地震帶來的影響會好快復原，旅遊業會復甦，仲叫香港人唔駛擔心添！我見伯伯好有信心，我亦向伯伯我地從香港送上的祝福及支持。

浸完溫泉，食個豐富的自助早餐，又係望海的！



我地覺得呢間酒店簡直超值！正！

剛才仲係陽光普照，一離開酒店就開始天陰，天文台話今日會有大雷雨添！今早只得一個行程，就係「別府地獄めぐり公式サイト」(別府地獄組合)。首先到達山地獄。

一入山地獄，見到的只係大笨象等動物，我地仲以為入左動物園添！

原來行到最埋先見到個溫泉池．．．

好似好犀利咁，其實地方唔係好大，一定無北海道登別的地獄谷咁大囉！

去第二站 --- 海地獄。

先見到荷花池．．．

然後藍色海地獄溫泉．．．

附近的三連烏居。

仲有免費足湯添！

好，到第三站 --- 鬼石坊主地獄。

在入口即見幾個規模較少的泥漿溫泉．．．

仲有鬼の高鼾，即係溫泉噴發的蒸氣響聲好大，好似打鼻鼾咁！

到達鬼石坊主地獄．．．

真係好核突呢！

整個鬼石坊主地獄最靚的都可算係呢棵櫻花了！但都唔襯的！

第四站 --- かまど地獄。

呢個地獄溫泉係我同老婆覺得最好玩的．．．

地獄分六層，每層有不同的溫泉同特色．．．呢個係第一層，溫泉水係啡色的。

第二層係溫泉及蒸氣。

第三層係藍色溫泉水。

第三層附近仲有手足之湯．．．

仲有可飲用的溫泉水，我同老婆當然試試，嘩，都幾大硫磺味！怕怕！

第四層係泥漿溫泉．．．

好似地盆d泥漿咁，不過係熱的！

第五層係會變色的溫泉水，我地就睇唔出有乜變化喇！

第六層係啡紅色的溫泉水，好熱的，95度！

呢個地獄溫泉好多野睇，亦有野玩，幾得意！仲有老婆最鍾意的鬱金香啦！

又見到為三．一一地震的義援金箱。

第五站 --- 鬼山地獄。

鬼山地獄有兩個景點：第一，呢個有兩個人咁高的地獄公仔．．．

第二，鱷魚潭。我地一到就見到管理員餵鱷魚食肉，睇左一陣就走了。

呢個溫泉加了些人工效果，造成海浪的效果。

第六站 --- 白池地獄。

呢個係咁多個地獄裡面最平平無奇的一個，以魚同花為主題，悶！影完個白色的溫泉池就走了。

仲有兩個地獄，要駕車約五分鐘先到達。