小MiuMo遊世界: 4月 2011

2011年4月21日星期四

日本北九州感恩之旅の第一天

香港 - > 台北 - > 日本福岡機場 - > 博多

其實我同老婆早於去年九月已plan定今年復活節的行程，就係去日本名古屋及立山黑部，因為今年的復活節假期較遲，正是立山黑部及上高地開山的時間；第二，老婆話能登半島好靚，好想去，所以滿心期待．．．

點知，在出發前的一個半月，發生日本九級地震及海嘯，加上福島核電廠的核危機，令我地失哂預算，因為內心的不安，我地決定「忍痛」取消去立山黑部的行程。我地透過國泰假期訂package的，可以更改行程一次，仲有九五折，我同老婆就在網上搜索．．．退而求其次，去韓國首爾啦！

老婆在三月底到國泰假期的辦公室，辦理更改行程手續，但國泰話間酒店沒有房，要一兩日後才答覆．．．老婆心急如焚．．．

我地上網睇下首爾有乜玩．．．發現首爾唔係我地杯茶，我就大膽地向老婆提議，「不如去返日本，不過遠離福島啦！」老婆都贊成，於是到國泰假期的office睇下可唔可以再改package，得唔得都算了！點知佢地話ok，咁我地就懷著緊張的心情去期待今次的旅程．．．

起初我地都有d擔心，但我地真係好喜愛日本這地方，見到三．一一地震海嘯，好似在遠方的朋友有難咁，心好想去支持佢、走去探佢。在出發前的兩星期左右，我在祈禱時神對我說：「你們不要怕，這次旅行是要讓你們經歷我的同在！」好！交托吧！

點知，出發前一星期，國泰通知我地原先的航班已取消，當日只有一班在台灣短暫停再飛日本的航班，起初都有d唔開心，但好快想起上帝的應許！好！唔擔心，又交托！

出發了！我地乘搭國泰 CX 510 ，14:55 由香港飛台北，等約一小時後再由台北飛日本。

講左咁耐，仲未講今次我地的目的地！日本北九州福岡，我地出發了！

日本北九州感恩之旅の第二天

博多 - > 士多啤梨園 - > 鳥栖 Outlet - >

柳川 - > Canal City Hakata 拉麵競技館 - > 博多

今朝一早起床，首先要去取車，經過便利店，見到樽裝水仍然供應充足．．．

飲品供應亦正常．．．

我同老婆習慣買幾個飯團當早餐食，唔知點解，便利店的飯團，總比香港的好食好多！d紫菜又脆，飯又好味，材料又新鮮，正！

日本北九州感恩之旅の第三天(上)

博多 -> 能古島島嶼公園 -> Marinoa City 及 Outlet

今早出發，先影影 Hotel Sunroute Hakata ，呢間酒店幾好的，又近博多站，仲要做緊 promotion，住三晚俾兩晚錢，超抵！

駕車一小時，到達博多的西北面一個碼頭，準備出發到能古島。其實好多旅遊書都無介紹此景點，只係有一次我偶爾在一網誌中找到此景點，非常吸引，好，儘管試試！

在船上影的博多港。

日本北九州感恩之旅の第三天(下)

Marinoa City 及 Outlet -> 海之中道海濱公園 -> 博多

其實老婆好想去睇花，不過見我落船後有d唔舒服，所以唔想我趕行程。但我又知老婆真係好想去睇花，好，揸快d先！經過一小時十五分鐘左右，終於到達目的地 --- 海之中道海濱公園。

呢個公園亦係無旅遊書本介紹的，係老婆上福岡旅遊局的網頁介紹的。行左一陣，先到達花時計花壇。

我同老婆搵左好耐，終於到達鬱金香花壇！真係好似荷蘭的Keukenhof花展！

日本北九州感恩之旅の第四天(上)

博多 -> 長崎 -> 原爆落下中心地 -> 平和公園 -> 被爆當時之地層 ->

長崎原爆資料館 -> 島原市 -> 土石流被災家屋保存公園 -> 鯉魚池

在博多住左三晚，終於離開福岡喇！其實尋晚我同老婆都好累，無乜點計劃今日的行程，有d行程又未能掌握時間，我地只好將今日的行程交托吧！

我地好早起床，一來想時間充裕d，另外想好好享受在日本駕車的樂趣。今日第一景點係去長崎，第二次世界大戰原子彈爆炸的地方，對我同老婆來說係其中一個好想去的景點。日本氣象廳預測今日會天晴，點知一開車就落大雨，平日在高速開時速一百三十、四十的情景不再，要穩陣地開時速八十、九十，仲要擔心會否影響今日的行程！唯有禱告啦！

再一次感恩！駕車到長崎忽然停雨，只見天陰陰！好野！駕車約兩小時後，便由博多到達長崎。我地先到達長崎平和會館旁的停車場泊車，停車場有兩位伯伯教我地去附近的景點，好友善！

原子彈在長崎爆炸，導致第二次世界大戰結束，長崎市亦受到嚴重的破壞，故長崎市內有好多記念原爆的雕塑，以提醒戰爭帶來的影響。

日本北九州感恩之旅の第四天(下)

長崎縣 -> 渡輪 -> 熊本縣 -> 熊本城 -> 阿蘇火山民宿

駕車五分鐘便到島原市碼頭，好多駕車人仕都趕住去買票．．．

車輛按大小收費，我地的cube收1,500円，乘客(唔計司機)每位收680円。

雖然唔係第一次駕車坐渡海輪，但在日本係第一次，好緊張呢？！

日本北九州感恩之旅の第五天(上)

阿蘇火山民宿 -> 米塚 -> 草千里 -> 白川水源 -> 高千穗峽

呢間民宿係我同老婆其中一間印象深刻的民宿的原因，除了環境及食物外，仲有在尋晚訓覺時的一件事。我同老婆係昨晚民宿的唯一客人，建築物中只有我地二人，有起事都咪話唔驚！

起初我同老婆都訓得好好，大約凌晨兩點半，我同老婆都覺得屋外好似有架貨櫃車經過咁，成間屋有d「At At」聲，最恐怖係張床郁郁下，好似我地訓響上格床，被下格床的人起勢遙張床咁！雖然情況只維持幾秒，搖的幅度亦唔係好勁，但足以令我同老婆醒哂！

起初我地都唔知發生乜事，但老婆好驚，訓唔番，如果老婆在旅行中覺得房間唔安全，佢會訓得好差，甚至會整晚失眠的。我就立即同老婆祈禱，求上帝俾我地有平安的心去面對，仲有俾我地訓得好d。又同佢傾下計，令佢安心左d，我知道老婆心情平復左又無再出聲，就知道佢已經訓得著。點知約一小時後，剛才的情況又再發生，亦維持了幾秒，但今次老婆無再叫醒我，之後我地一覺訓天光，到早上七點半才起床！

今早起床後，得知尋晚凌晨四點左右，在福島附近發生過五級左右的地震，雖然日本氣象廳無對九州發出地震通知，但我地知道尋晚應該係地震！我地估計應該四級左右！

超感恩！簡直係神跡！神又再次叫我地在此旅程中有所經歷！以老婆的性格，尋晚發生此事後，係無可能會再訓得著，我地都估計係地震，點會咁「老定」繼續訓覺？我地唔係信得過神的保守，知道神的真實，點會全心交托？我老婆仲話，講地震就講得多了，今次終於經歷地震了！

我地回港後到日本氣象廳搜尋，結果發現當時真係發生地震呀！尋晚發生左一次四級地震、兩次三級地震呀！