北海道夏日賞花之旅の第十天及第十一天

品川 -> 築地市場 -> 東京鐵塔 -> 涉谷 -> 秋葉原 -> 品川

昨晚好累，今早本來想早起但不能，最後早上8:30才起床！今日是旅程的最後一日，其實我老婆覺得整個行程「基本」已經完成，因為佢最想去的北海道賞花之旅已經完畢！

其實我地點解咁鍾意東橫 Inn 有四個原因：乾淨、舒服、近 JR 站，最緊要係平！我老婆最鍾意佢又光猛又乾淨！影下裡面有「幾大」先！

都擺得落兩個喼！

早上九點左右去搭 JR ，見到JR站好似平日繁忙時間的中環站一樣，好好好多人。我地響JR站觀察左一陣，我估大約一分鐘都有成千人經過！

呢幅相係響JR站影的！無錯，真係響JR站影的！不過係JR站中的廣告燈箱影的Poster，我老婆一睇到就話好過癮，好似d企鵝仔搭JR咁，一定要影低！

搭過咁多次JR都無影過相，好，一於影下架車！

今日第一站係著名的築地市場，其實呢次係我地第二次去築地市場，立即想去番上次食魚生飯的店舖，好懷念，好回味！搵左一陣就搵到間店舖，立即入去，Order番兩碗先！今次有d唔同，因為響店舖內唔俾影相，碗飯又細碗左，又無上次食咁鮮味，總之係上次好食d啦！

食左碗魚生飯，行番出橫街的一景，其實仲有好多人排隊等食魚生飯的！

行左一陣，見無乜特別，走喇！臨走前，影番幅市場標誌！

其實今日有個景點我想去好耐，今次終於有機會，就係......東京鐵塔！我想去的原因好簡單 --- 我覺得去日本如果未到過三大景點：富士山、東京鐵塔同JR東京站，就好似未曾去過日本咁！我係咪有d怪呢！

我到達東京鐵塔附近，搵到一個影鐵塔的最佳位置，我同老婆影左好多張合照，好滿足！其實我的心願已經達成，但我老婆話一定要上埋鐵塔先叫Perfect，好，一於上去先！

一上到去大展望台，離地面150米，其實都幾高，我地行下行下，見到一個透明底，下面就清楚望見馬路，真係有d腳軟！畏高既真係唔好亂試！

去到地標，梗係好多紀念品，當然唔少得Hello Kitty出場啦！而我地就造左個紀念金幣同買左個東京鐵塔模型，好靚的！

離開東京鐵塔，準備搭JR去下一景點，頓時發現呢個情景！我覺得好特別，我老婆就唔知有乜野好影！唔知大家估唔估到點解我要影呢？！我仲話呢幅相可以做通識科教材添！好，俾d貼士啦！係同一首「環保歌」有關的！ ........ 仲未估到？！首歌係李克勤唱的！有興趣估的，留言俾我啦！最好留「私人訊息」，費事俾其他人知！

其實今日整日都天陰陰，離開東京鐵塔下一景點係我老婆好想去的涉谷，因為多靚衫買！一去到涉谷，個天己經想落雨咁，我見仲未落出，影番兩張先！

其實響涉谷，經常見到一d「潮人」出現，好似JR站出口前的女子，打扮都幾In，見佢唔在意時影下佢先！Lady，你已經上鏡喇！

剛影完幅相，入左間CD舖，出番來竟然落大雨！等左20分鐘左右，見雨開始細d，去左間Lunch Beffet食飯，主菜有意粉，但我地最鍾意d甜品同蛋糕，超好味！

見停左雨，出去行下先！涉谷的街景，多以小商店為主，好多好In的服飾，好似d男特別型、d女特別靚！

離開涉谷，到左行程的最後一站 --- 秋葉原。上次去東京我地都無去秋葉原，今次去行下先！

其實我想去秋葉原睇下d電氣同電腦產品，因為d款式起碼比香港新兩年！

隨意入一間電器店舖，見到iPhone做緊Promo，其實都幾貴噃！

除左電器舖，秋葉原仲有一樣出名的，就係Cosplay服飾！我同老婆都「大開眼界」，去到間專賣Cosplay物品的店舖，嘩！十分犀利！d衫多到呢！

仲有，響店舖樓上有一間餐廳，d 侍應全部以Cosplay服招呼，我話想去試下，我老婆死都唔俾，好，下一次再來！

行左個多小時，我見個天好黑，好似準備落大雨，我提議早d返酒店取行李到機場。臨走前去多一間電器商店作「最後衝刺」。

嘩，真大開眼界！d冷氣機排得幾整齊！

響香港無乜見過呢類型的插頭分插，好型！

幾多滑鼠，場面震撼！

臨走前，我見到電視機的新聞報導，話今日響東京地區天氣好差，廣泛地區落大雨同雷雨，睇到電視的情況，我地覺得好感恩，因為除左涉谷落左20分鐘雨，其他行程都只係陰天，再一次感謝主！

好喇！搭JR返品川站的酒店，取行李搭20:45的ANA航班，零晨00:30到香港！