北海道夏日賞花之旅の第五天

札幌市計時台 -> 札幌電視塔 -> 札幌二条魚市場 -> 「白之戀人」工場 ->

小樽 -> 小樽運河 -> 札幌

昨晚睡得很好，尤其是我老婆，佢話好鍾意日本d酒店間房細細間，好有安全感！
好，響酒店食過早餐，出發！

我地第一個目的地係二条魚市場，但由酒店步行左五分鐘左右，到達一個燈位前，見到一大班遊客停響一邊，狂影相，心知一定係重要景點，查一查旅遊書，先知道原來係札幌市計時台，好著名的！呢處仲有兩三級樓梯，俾遊客企上去影計時台的全景，照顧真週到！好難得見無人影，立即影兩三張先！

行多三分鐘左右，到達我地昨晚到過的札幌電視塔，日間睇又有另一番風味！

再行幾分鐘，就到北海道三大市場之一：二条市場。響二条市場行左一陣，貪吃的老婆話要先去食魚生飯，好啦，反正有少少肚餓，去搵野食先！(其實自己都貪吃！)

去左一間叫「茶屋」的魚生飯店，見到裡面好多人光顧，好，坐低試下！

我地叫左一碗帶子飯同一碗三文魚魚生飯，唔係好大碗，亦唔覺得好好食，相比之下，我覺得東京築地市場的魚生飯又大碗D，又好味D！

行左一陣，我地對二条市場有D失望，因為又唔係好大，D野又唔係好attractive，就繼續下一景點行程---「白之戀人朱古力餅」工場。我地從札幌乘搭巴士去工場，因為搭JR個站都幾遠，搭巴士落車行幾一陣就到！

我地上次去北海道時，只係路經「白之戀人」工場，無真真正正入內參觀，好！今次有機會喇！

未入工場內部，單在工場外的花園參觀，已經覺得好有特色，好靚！呢幅相我幾乎要「瞓」響地下影先至影得哂！

花園富有歐洲特色，好似去左歐洲 High Tea 一樣！陽光普照，心情特別靚！

一入內部，我好鍾意呢一條樓梯，覺得好Grand，好Romatic！我急不及待同老婆企左響樓梯兩邊，影張靚相先！

「白之戀人」最著名係朱古力，估唔到裡面仲有蛋糕賣，不單賣相好，仲有一樣野令到我同老婆都覺得好「專業」的，就係佢地好注重蛋糕的「賣相」，放斜少少都要擺番好，唔容許有任何瑕疵，勁！

入到白之戀人參觀，梗係要參觀佢地製作朱古力的情況。嘩！成條生產線Open to Public，由出產到包裝都俾你睇到哂，好Surprise！

我見到一塊塊「白之戀人」出爐，真係好想即時食番幾盒！

響白之戀人其中一個體驗，就係我同老婆一齊整曲奇，有好多日本小朋友參加，我老婆咁鍾意整野食，當然唔會放過啦！好，我又整！

我揀左原味(淺色d)，我老婆揀左朱古力味(深啡色的)，由搓粉到製模，經過差不多半個小時，登登登櫈！完成作品！然後將作品放入焗爐，我地等二十分鐘左右，就可以響Counter取回曲奇！起初我地對自己整的曲奇無乜期望，覺得味道應該一般，但係試味時，我同老婆嚇左一跳！超級好味！好香！仲有，新鮮出爐，好熱騰騰！

好喇，係時候去下一景點 --- 小樽。乘搭往小樽巴士，經過一d富有日本特色既街道，又影番兩張相先！

絕大部分既遊客去小樽，都會先入音樂盒館。我地就唔同喇，先去搵一間超級抵食的燒扇貝，好，食番餐先！(好肚餓！)每隻燒扇貝都只係100円，無錯，真係100円！

睇下，呢度五隻，盛惠500円！嘩，雖然唔係好大隻，但超鮮甜，加埋燒出來的香味，十分好吃！最好食的是扇貝腸，十分香！有機會再去小樽，一定要試！我地去買的時候，人唔太多，等兩三分鐘就買到；到我地走時，條人龍長到呢！有排等！

我地去左一間迴轉壽司食Lunch，然後開始行小樽喇！

上次去北海道係冬天，我地仲要好晏先到，下午五點幾到小樽時，天已經黑，又凍，最重要係我地只可逗留個半鐘！時間太短！我老婆好懷念！好，今次慢慢行！

我地由小樽地標 --- 小樽音樂盒堂本館出發，記得上次響冬天來到，雖然好凍，但落住雪、天漸漸黑、街上響起浪漫的音樂盒聲，我同老婆的印象都好深刻！今次來到，缺少左當日的浪漫同寧靜，我有少少失望囉！

入到音樂盒堂本館，見到人頭湧湧，更加無Mood！睇左一陣，閃！

小樽最著名係玻璃，我地當然唔會錯過，我老婆買左隻好靚的玻璃花瓶，好特色的！

再響街上隨意逛，看見一間好特別的建築物，原來呢間叫LeTao的店舖，好似古堡，專賣朱古力同西洋糕點。

經過我老婆最愛既 --- 六花亭，立即入去搜購！我老婆最鍾意朱古力入面有大大粒士多啤梨！勁好味！

我地沿大街行去運河，突然見到有架馬車行過，嘩！機會難逢，立即影相！

到達小樽運河附近，大約六點左右，我老婆去Shopping，我就響條街影下相，古舊建築物同人力車，與旁邊的汽車，形成有趣的畫面！

呢間係小樽運河斜對面的小樽出拔小路，係主題飲食區，裡面有好多野食的！

我老婆來小樽最想去音樂盒堂本館，而我就最想去小樽運河，因為上次來小樽，運行的夜景好靚，今次我想影多d靚相，好，早d來到霸位先！

D人話小樽運河最靚係黃昏至入夜間的景色，我由下午六點開始，一直等，一直等，我老婆為左完成我的心願，響旁邊陪我等，多謝哂佢先！

等的時候，不斷影相，先Post一張未日落時的小樽運河景色

好喇！等左一個鐘左右，終於等到個天開始暗，日落喇！好開心，影到靚相，完成我的心願，最緊要梗係要有老婆的支持啦！

好喇！夜喇！我地搭JR番札幌，食過拉麵後，番ChiSun Inn Sapporo酒店先！明天要離開札幌了！