北海道夏日賞花之旅の第四天

旭川旭山動物園 -> 旭川 -> 札幌 -> 狸小路 -> 札幌電視塔

尋晚好好睡，因為好累，今天一早出發，去我老婆其中一個最鍾意的景點：旭川旭山動物園！Book呢間酒店的Package，包括酒店房間一晚同旭山動物園入場卷，仲有由酒店提供的七人Van接送服務，真係好正！我地就係坐呢架七人Van的，好靚！

到達動物園，我老婆好興奮，第一時間走入園中心，搵位置圖睇最想睇的動物場館：北極熊館！

一入到場館，就見到有隻北極熊響地面行來行去，好鬼死得意呢！當我見到d日本女仔見到北極熊時，佢地個個都會講呢句：「Kawayi」呢！

園中另一「鎮店之寶」，就係d咁得意既企鵝喇！我同老婆第一次睇企鵝，其實佢地行的時候真係好傻好笨，一步一步、呆下呆下，好得意！佢地又鍾意向住同一方向望過去，就好似呢幅相咁，勁搞笑！

D企鵝有唔同種類，企響前面的叫皇帝企鵝，後面的就唔知乜名喇！

我地見到飼養員餵飼魚仔俾企鵝食，d企鵝好有規矩，會一隻一隻咁等飼養員餵佢地食，唔會爭食，你睇佢地都幾有秩序！

我老婆話好掛住d北極熊，好啦，入番北極熊館！





本來預計睇多15分鐘，點知睇下又耐d，睇下又耐d，睇下睇下，睇左差不多一個鐘！今次我地主要響館內的下層睇，透過玻璃睇睇北極熊在水中的情況，睇下佢游水，個樣好得意！

估唔到北極熊身驅咁大份，游水的姿勢一d都唔笨，好輕而易舉就轉身，好relax咁游！我地仲見佢經常游響同一路線，個池唔大，佢游的路線係佢習慣左或者係最舒服的路徑！睇下佢隻腳板同條短尾！好得意呢！

好，參觀完北極熊館同企鵝館，老婆目標已達成，但係都想睇下其他館，睇下有無驚喜！我地見到海象，身手敏捷！

之後見到一大班日本，猛響度講「Kawayi」，成班向樹頂望，起初我同老婆都唔知望d乜，望下望下，嘩，真係好 Kawayi 呀！初初都唔知呢隻叫乜動物，最近就知喇！就係新到海洋公園的 ......... 「小熊貓」！小熊貓未到海洋公園前，我同老婆就已經見過喇！勁！

我老婆睇隻小熊貓，猛叫 Kawayi 好得意，我話個頭係咁向上望，條頸有d痛添！好，離開了小熊貓，睇下仲見到乜野動物？！

原來係：

長頸鹿！又係第一次見！

本來我地都差不多走，臨走前俾我地見到一隻不知名的動物，我地見到佢個樣，笑到我地碌地：

我話呢隻動物，勁似我老婆個樣，俾我老婆係咁「丙」我！

臨走前，影張旭山動物園的入口，留個紀念！

今天的主要景照係旭川旭山動物園，下午兩點半左右我同老婆就乘酒店Van返旭川酒店，然後乘搭JR去札幌。好，三點半了，臨走前影影旭川站先！

好，到達札幌已經五點半了，快D去酒店Check-in先！

響JR札幌站對面有間好靚的建築物，原來係SeiBu，好似積木屋仔咁，好得意！

酒店距離JR站約十分鐘路程，唔算遠，叫ChiSun Inn Sapporo，都幾整潔，一放低行李就想出去食野，老婆話近年北海道興食咖喱湯飯，離酒店兩個JR站有間都幾出名的叫Voyage，好！又試下先！

呢個餐係老婆Order的，一碗飯，加一碗有咖喱湯的雜菜，OK好食啦，不過唔知點解，我食到有D羊肉既羶味？！

食到飽飽，梗係要行下街，做下運動，夜晚最佳運動就梗係Shopping啦！我地去日本其中一個指定Shopping目的地，就係「藥房」！無錯，係「藥房」！日本藥品出名可靠，見效快，有信譽，好！買d返香港「守門口」！

可能近年多左香港人、台灣日或者大陸人去日本，所以日本d大藥房都有Counter以中文字推廣藥品！好似呢間藥房，有個識講普通話既Sales同我地解釋唔同藥品，好犀利！我地一定會買既感冒藥，有「Paburon」帕不隆，同「ShinLuLu」新露露！前者主治感冒、後者對傷風較有效！實為家居旅行，必備良藥！

掃完一輪貨，行左一陣狸小路，有d累了，返酒店休息，途中經過札幌著名景點：札幌電視塔，上次去札幌都無影低，好，今次仲要係夜景，一於停低影幾幅！

好，明天繼續！