小MiuMo遊世界: 北海道夏日賞花之旅の第六天

札幌北海道廳本廳舍 -> 札幌站地下街 -> 登別 -> 地獄谷 ->

登別溫泉街 -> 登別地獄谷鬼花火祭

到了第六天，過了行程的一半，我地都仲係好興奮，因為今日踏入另一階段，離開札幌。食過早餐，上午在札幌逛街，我地先到達位於市中心的「北海道廳本廳舍」。建築以紅磚砌成，在日本比較少見。經旅遊書介紹，先知道呢種法國式砌成的紅磚建築物，響日本好珍貴，因為日本多地震，但紅磚建築物並不耐震，所以比較少見。建築物頂有支七角星旗，唔講唔知，原來係北海道旗來的！

上午去一些商場逛下，又去左雪印，買下野，睇下。行左一個鐘左右，大概十一點，我老婆就話要早d去一間拉麵店食lunch，因為晏d會好多人，要排好耐隊。好，見早餐唔係食得咁飽，ok，let's go！

間拉麵舖叫「味之三平」，原來大有來頭：佢係札幌味噌拉麵的元祖，而且地點好隱蔽，好難搵！拉麵舖開上午十一時，我地到達係十一點十五分，店舖內已經滿座！我地等左十分鐘左右，唔算太耐，終於有位，入去睇下有乜食先！

店舖唔大，座位大約十幾個，但職員卻已經有五個，分工好精細。一位負責製麵，一位負責配料，一位落單同清潔，兩位後勤支援，好專業。

呢碗就係招牌的味噌拉麵，我見大部分顧客都叫呢個就知好味啦！我老婆都算係半個食麵專家，超級鍾意食麵，食第一啖，讚不絕口，話d麵好有口感，熱辣辣，味道唔會太鹹，好好味！正當我同碗麵影緊相時，上面張相左面果位職員特然走過來。起初我以為唔俾影相，原來剛剛相反，見我地影得咁興奮，食得咁開心，主動過來叫我地同碗麵影合照！我地兩個覺得好被尊重，覺得佢地好體貼，有賓至如歸的感覺！我老婆仲買左Set麵帶返香港添！

飽了，仲有少少時間，逛多一陣！響札幌站的地下街中，見到一間店舖，我老婆一見就好開心衝去，睇下有乜咁特別先！

響門口見到「崖上的波兒」公仔，就知果期興波兒啦！套戲啱啱出，梗係有好多精品應市！

我同老婆對波兒興趣不大，反而對龍貓精品更有興趣。今年適逢龍貓公開20周年，有好多限定紀念品，我地當然唔放過啦！

最令我同老婆興奮的，係呢Set龍貓陶瓷公仔，全套18個，個個造型唔同，係套戲的其中一節，龍貓向一棵小樹祈福，小樹就立即長高的劇情！每個陶瓷公仔有唔同的龍貓跳舞祈福造型，買哂一套就睇到龍貓點跳成隻舞！嘩，好犀利！

店舖中間有一隻大龍貓，差不多成十萬円，好大隻，我老婆一見到就攬住唔放，我當然立即同佢影相，但同時我有d呷醋，又唔見佢一見到我就攬住唔放？！

係時候離開札幌，臨走時俾我地見到札幌市時計台的觀光馬車，我見到就好似fans見偶像咁跑上前影相，個「司機」一見我咁瘋狂，仲舉手同我say hi添！仲有，呢條真係名乎其實的「馬路」！

再見喇！札幌！我地響札幌JR站附近的巴士站等巴士去下一站 --- 登別。我地book的酒店有免費巴士從札幌去登別，但個巴士站都幾難搵，搵左一輪，原來響呢個站等上車！吓！都無寫出登別！有無搞錯！

經過約兩小時車程，到達酒店「第一滝本館」。呢間酒店係登別最著名的酒店，遲d先介紹啦！Check-in時有樣小插曲：唔知係咪我太累，去到check-in counter時先發覺唔見左部相機！大件事！我估應該係漏左響巴士上面。

我地以「雞同鴨講」的情況通知酒店職員，一大班職員主動幫我地搵，又用Walkie-talkie聯絡巴士司機，原來架車已經駛往停車場，要勞煩職員駕駛另一架私家車，將我部相機送番酒店Check-in counter，搞到我勁唔好意思，但佢地仲笑笑口對住我，完成Check-in手續時仲係咁鞠躬，又「Arigatou」前，「Arigatou」後，我同老婆都覺得好尷尬！