北海道夏日賞花之旅の第一天

東京羽田機場 - > 北海道旭川機場 - > 美瑛四季彩之丘 - > 哲學之木 - >

千代田之丘 -> 美瑛

我同老婆都知道暑假去北海道，飛機位會好full，所以我地已經早於4月book機票。我地又想響行程最後一日去東京visit下，所以又想買張經東京飛北海道札幌的機票。所以我地搵旅行社的Package，包機票同兩晚札幌酒店，都幾抵！

今次去日本，又係坐零晨機，零晨飛01:30，06:45到東京羽田機場，再轉乘10:30的航班，於12:05到達北海道旭川機場。由於要轉內陸機，我地要響羽田機場等三個小時左右，我地去到羽田機場做d乜？梗係先訓一陣啦！

我地響大堂放低行李，訓左大約1個多小時，唔太擔心其他人會偷我地行李，因為日本俾到我同老婆安全感，治安應該都好好！好，訓醒喇，響機場行下！

由於日本正在爭取申辦2016年奧運，羽田機場中掛滿好多Banner宣傳，如果2016年奧運真係響日本舉行，就會好方便我地呢d自由行人士！好，2016，東京，I'm waiting for you！

上了天台瞭望台的地方，我老婆見到一d野，急急腳走過去，又叫我立即取相機影相！原來係一架ANA飛機，外面畫滿全隻都係比卡超！佢係比卡超fans，點可以錯過！好！立即影！




響機場食左小小野之後，又再上機，好，出發！

雖然今次係我地第二次去北海道，但由於上次係冬天去，見到雪景為主，今次講明係賞花之旅，我同老婆都好期待！希望天晴，影相都靚D！

落機後第一件事，就係去取車，我地響一間叫 J-Net 既公司book左架 Toyota車仔，到達旭川機場先去counter，佢地會車我地去佢地位於機場外的分店取車！到了分店，見到一架架車仔都好新好靚，不禁影低張相，睇下我地會用邊架車！

我老婆就好鍾意粉紅色果部，但我話我地book左Toyota，應該唔係囉！



終於取車了，經過一輪講解，終於取了車，係 Toyota Vitz ！ 嘩！唔知係咪我孤陋寡聞，我都未聽過呢隻車！呢次係我同老婆第一次響香港以外駕車，我地又掛住了解架車既操作同性能，都無同佢影相就走左，好，遲d先影相啦！

開始時由我駕車，我地第一個目的地係美瑛JR站，因為要買定之後既JR車票，路程又唔會好長，又可以熟習操作架車，ok！Let's Go！我老婆將美瑛JR站的電話入落車上的GPS，按幾粒制就會自動規劃駕駛路線，我同老婆簡直覺得科技先進，唔駛入地址就可以找到路徑，響香港簡直無可能出現啦！

經過約20分鐘的車程，我地到達北海道賞花之旅第一個景點：美瑛JR站！起我地都擔心日本人的駕車態度係點，但係經過呢一程，我同老婆覺得日本人駕車態度真係無得頂！佢地好禮讓，知道你要由小路出大路，竟然會停車讓你先行，響香港幾乎無可能！駕車又安全，唔會亂過線及爬頭，感覺十分良好！到達車站前，開頭都有d擔心泊位，但係只要我地唔亂泊，d車就可以隨便泊住先，好，落車，影影相先！

睇下個天！超好天！好耐未見過咁藍既天，唔知係咪日本既天係特別藍？



英瑛俾我同老婆既第一印象，係好乾淨、好寧靜、人唔係太多、好舒服，見到個站前的廣場，不禁要影多幾張相：

影完之後，我老婆睇番張相，佢話真係好鍾意，好似PostCard咁！我話，好天影乜都靚啦！

走之前，我走左去個車站旁，有個地方可以望到美瑛站月台，好，睇睇先！咁岩俾我見到有架列車即將開出，機不可失，立即影！

買完車票後，懷住興奮的心情，向第一個景點出發！

我老婆已急不及待要睇花海，第一站係美瑛四季彩之丘，剩係聽個名都好期待啦，去到見到的，簡直嘆為觀止！

我同老婆都未見過咁大片綠色，好舒服，好靚！小屋、一望無際的矮植物、遠望有幾棵大樹，構成一幅美麗的圖畫！難怪有人講：北海道的花海會令人迷上！我老婆不斷話：好靚！好靚！我就忙於影相！

 

 

我老婆睇睇下，突然叫我過佢果邊睇，嘩！薰衣草田！呢個就係我同老婆響日本見既第一個薰衣草田，我地見到十分感動，仲十分興奮要一齊影相！

好，大概逗留1小時左右，我地要趕去下一個景點，雖然唔捨得要離開，但都無辦法！











好，繼續出發！我地繼續駕車，沿途風景真係好靚！好，又搵幾個地方影低先！其中一個地方好吸引：綠色的田及啡色的田，配襯得十分和諧，見到遠處的小屋，真係好想住響裡面，可以日日欣賞美麗景色！





另外，我老婆話響美瑛富良野有好多好出名的樹，好靚的，我心想：乜樹都有出名唔出名咩？！就響我地討論時，路經一個地方，都有d人影相，我見附近得d田野，剩下一棵樹，棵樹都好特別，都幾靚，好，一於落車影影！



之後我老婆睇番本旅遊書，先知呢棵樹大有名堂，叫「哲學之木」，十分出名！

到達第二個景點，叫「千代田之丘」，響山上面的，呢個「丘」並唔係有好多花田，而係響山上面，俾你從高處睇成個美瑛的景色！



嘩！十分靚，無話可說！上埋觀景台，繼續欣賞！



嘩，點捨得走！但無辦法，要趕番美瑛的民宿食晚餐，閃！

沿途我老婆見到一d好特別的景色，叫我落車睇睇：



其實響PostCard見過呢d情景，但係真實的仲係第一次！D農夫會將響田中的農物物收成後，將田的草捲成一捆，約有一個人的高度，形成特別的畫面，好靚！唔駛講，又影！



好喇！幾過差不多1小時車程，終於到達響日本住的第一間民宿「BiBi」。因為差不多吃晚飯，唔影景住，食飯先！

呢餐就係我同老婆響日本第一餐「民宿餐」，唔好睇佢好似好少野食，其實我同老婆覺得好好食，尤其是個薯茸！正！

食飯時，有一個老伯走過來同我地傾談，問我地響邊度來、又問d野好唔好食、又問我地咩野職業，佢好nice、好慈祥，最後仲問我地聽日去唔去 morning trip ，由佢帶路去「附加景點」！我地梗係話去啦，咁難得！其後先知道原來佢係民宿的老闆！

房間內的環境不錯呢！

 

呀！唔記得講添！我同老婆未食呢餐前，有一個時段(約30分鐘)左右，響日落前安排我響民宿旁的小木屋「貸切」溫泉！

「貸切」即係「包場」！剩係得我同我老婆響裡面浸，鎖住門，其他人不得進入！浸溫泉我地就試得多，「貸切」我地都係第一次試！未入去先興奮，入左去殺死人！裡面地方不大，但有一個可容納3至4人的木桶，前面係一片有兩個人咁高既粟米田！十分靚！我同老婆都無影相，因為想好好享受呢一刻！

好，累了，早d訓，明天繼續！