北海道夏日賞花之旅の第九天

函館朝市 -> 函館市內觀光 -> 八幡坂 -> 函館山 -> 金森倉庫群 -> 五稜郭公園 ->

函館開港巡遊 -> 北海道函館機場 -> 東京羽田機場

尋晚訓得好好，因為好累！一起床，打開窗簾，感謝主！竟然天朗氣清，上帝聽禱告，快過打針！

呀，我地要介紹一下間民宿......呢間民宿叫The Pension Yumekukan 1987，傳聞係由一個廚師開的。個廚師響廚藝比賽中得過獎，所以好多人都專程住響佢地處，試試佢地的晚餐同早餐，話好有水準！但我地最遺憾就係唔響民宿食晚餐及早餐：尋晚上去函館山睇夜景，所以唔食；今早我地有另一吸引景點，所以都唔食！我老婆話有機會再來函館，一定要試呢間民宿的膳食！

到景點時影低民宿的外觀及房間！

我地去邊呢？！梗係......朝市啦！函館沿海，位於北海道南端，自然有好多海鮮食啦！

去到朝市，我想食魚生飯先，好啦，是但搵、求其入啦！見到呢間店舖都有d顧客，又幾光猛，就試呢間啦！

咁就坐低睇牆上的相片，睇下想食d乜先！睇睇下，俾我地發現到一樣野......

點解會有呀Ricky生同呀Suki既簽名？！莫非......呢間就係上次佢地拍「和味無窮」介紹函館朝市，好好味魚生飯的店舖？！亂打亂撞俾我地搵到？Unbelievable！

既然Ricky生都介紹(其實牆上真係有幾十個名人的簽名，我估有好多人介紹呢間店舖啦！)，好，我同老婆更期待，口水流得更勁！

來喇，我打破傳統，響魚市場唔叫魚生，叫左燒魚飯！

我老婆叫的帶子大蝦飯！d帶子大粒到呢！好，立即食！

平日我地食野，通常都有傾有講，今次食呢個魚生飯同燒魚飯，我地食的時候好靜，味道就...... 梗係好好好好好味啦！呢個係我既「戰績」！勁！

好，食飽行下先！朝市內有好多野賣，其中唔少得有生果！大大箱北海道富良野蜜瓜，盛惠11000円4個！平！

梗係唔少得北海道最著名的夕張蜜瓜啦！盛惠7000円2個，即係港幣560元！響香港買一個就得！嘩，反正有得試食，好，試下先！

我地初初試食富良野品種，嘩！名不虛傳！超甜，十分有口感，好香！勁好味！

再試夕張品種，嘩嘩嘩！我從未試過咁香甜的蜜瓜，甜到唔識形容！但我老婆話實在太甜，有d「涸喉」！既然係咁，我地決定買個富良野品種返香港食！正！

好，拎住大大個蜜瓜，我老婆好想去食旅遊書中推介的店舖，專賣鮮扇貝，即開即食，聽聞十分好食！之前我同老婆已經搵到間店舖，但係我地想食左魚生飯先至試扇貝，ok！一返到去，我地指著扇貝的相片，老闆將兩隻手臂做個「交叉」手勢！唔係啩！咁快賣哂！仲要係睇住最後一隻，俾一對香港來的情侶買左！大半個小時前仲有！依家無哂！我老婆勁唔開心，係勁勁唔開心果隻！

好啦，我用盡方法氹佢，都好似無計，慘！

入番朝市室內的一個店舖，佢專賣魷魚：魷魚係函館最著名既海產，十分甜、十分有口感！我地先要釣魷魚上來，釣到邊隻就食邊隻！

好！我梗係要俾老婆試下，氹下佢開心，點知佢只係勉強一笑，心情仲係好差！我只有祈禱，求上帝安慰佢！

好喇，一碟新鮮的魷魚刺身！我見老婆開始有番d笑容，上帝又聽禱告！感謝主！！！我地搵左個位置坐低，一人一啖，嘩！魷魚十分好味！超鮮甜！有口感，彈牙！極力推介！

我地食完魷魚，梗係順便睇下d海鮮啦！

正當想走之際，竟然俾我睇到d野......

有無留意到圖中右面正中位置賣d乜？！無錯！係新鮮扇貝！嘩！上帝真係錫哂我老婆，竟然響佢最失望時俾佢出路，簡直係神蹟！

(你地知唔知，其實我地剛才無得食新鮮扇貝時，我每逢經過海鮮店舖時，就幫我老婆搵，睇下有無新鮮扇貝賣，間間店舖都無！係得呢間先有！呢個連我老婆都唔知！)

仲等！梗係立即叫番隻先！我老婆即時笑哂咀，流哂口水，極度期待！

一睇到，立即食！扇貝帶d海水味，加上鮮味，未食過咁正的新鮮扇貝！食埋個群邊，嘩！十分爽！十分鮮味！比北海道果D急凍的元貝好食好多！我哋勁勁勁勁勁推介！加上呢隻扇貝只係200円，比起頭先食唔到果間平了300円！我老婆的心情即時由谷底升上天！

好喇，離開函館朝市，將蜜瓜帶返酒店先！再出發！

今日天氣實在太好，天朗氣清，我地想去市中心睇睇！Let's Go！

函館係日本一個比較特別的市，因為市內有好多教堂，好靚！響函館電車路附近，見到好多好靚的教堂，其中包括呢間：日本基督教團函館較會。係全日本歷史第三悠久的教堂建築物。

呢間係另一間教堂，我地覺得好靚、好精緻！

我同老婆隨意走，覺得函館與日本其他的地方好唔同，有d歐洲Feel！偶爾望到呢間屋，似唔似去左歐洲呢？

去到函館著名的八幡坂，其實係一條長長的斜路，好似香港的西邊街，由半山一路向下斜，最唔同的係八幡坂的終點係海邊，由八幡坂中段望下去，有一種講唔出的喜悅，或者係可以望到海，而好少斜路有咁靚的景色！

響八幡坂影影下相，見到一駕好靚既的士！好，又影！

行下行下，我地見到呢間教堂，起初我地都以為係基督教教堂，點知睇番本旅遊書的介紹，呢間係函館東正教會！建築都好靚！

呢間係一間叫天主公教會的建築物，我地都入左裡面參觀！

好，再上函館山！今日咁好天，睇到的景色一定好靚！出發！

響纜車上見到的情況同尋晚好唔同，今日真係好開心，因為睇到好遠好遠的景色！講真，我都係覺得香港太平山望落維多利亞港係最靚！

響函館山的商店中，找到很多紀念品及手信，其中當然有函館著名的「函館3.8牛乳」！「3.8」的意思，係1ml中有3.8%乳脂肪，奶味比較濃。我覺得好好飲，我老婆試左一啖就驚肚痛，所以就俾哂我飲。咁好味，梗係自己飲哂先！

我同老婆逗留函館山約1小時，滿足哂我影相的慾望！落山後，見到一建築群好富東洋色彩，係真宗大谷派函館別院！一個字：靚！

睇完靚景同建築物，又係時候去Shopping喇！我地去左金森倉庫群，本來係倉庫，70年代轉為商業及餐廳用途，好多野賣！呢張相左右兩邊係金森倉庫群，中間望出去就係函館港！

我同老婆響金森倉庫群留左2小時，買左好多野，老婆最開心係響一間賣泰國民俗服飾的店舖，買到一隻復古手錶！

我地離開函館前，想去一個好特別的公園參觀，呢個公園叫「五稜郭公園」。從函館市中心坐電車，大約二十分鐘左右到達。我地想從高空睇哂整個公園的景觀，所以決定唔入公園內部，選擇去五稜郭Tower。塔高90米，上到塔頂，不但望到五稜郭公園全景，遠望仲望到本州添！

好喇，我地要走喇！我地要響函館JR站旁乘搭巴士去函館機場，班機飛18:55，我地約4點半返民宿取回行李，準備搭電車去JR函館站。一出到大街，發現整條大街封閉，無車行駛，嘩，做乜咁大件事！咁我地點去JR函館站前呀！

危急之際，我地決定由民宿行去JR站前！死啦，唔知行幾耐先到！正當我地「一路往前走」之際，點解前面有咁多大聚集，有好似有花車巡遊！呵！我地都唔知發生乜事，只見有好多花車同一班班日本人，著哂和服巡遊，好大陣仗！雖然唔知係乜事，千載難逢，好，一路拖住行李喼，一邊影相！

行左近半個鐘，行到我同老婆死下死下，又要趕巴士，又要顧住影相，成程幾乎係跑，但係原來一路趕、一路睇巡遊係好過癮！

果d巡行隊伍，操得真係好整齊，男男女女、老老嫩嫩，相當投入！

行到接近JR站前，我地竟然追到巡旅的隊頭！嘩！原來係紀念函館開港149年的巡遊！呢個又係我地行程無Plan到的意外收穫，感謝主！

我地終於趕到班巴士，車程約30分鐘左右便到達函館機場。真係要離開北海道喇！我地好好好唔捨得，因為呢9日實在太多感恩同值得回憶的時間！好！有機會我地一定會再來的！

飛機飛18:55，20:15到達東京，好快！一到達東京羽田機場，我地拎住兩件行李上JR，唔知係唔係東京係大城市，d人既心情特別燥！上到架JR列車返酒店，俾個日本老坑「眼超超」，又用日文鬧我地！(我同老婆都唔識日文，佢的態度同語氣似係鬧緊我地！)我地勁無奈，只係更加覺得北海道的行程特別開心，北海道d人特別 Nice！

好，返到品JR川站口高輪口，我地間「御用」酒店 --- 東橫 Inn！放底行李，一於落下面食晚飯！

我地見到一間中華拉麵店，見成夜晚9點半都仲係好多人，應該唔太差啩！好，試下先！

呢碗就係我地叫的拉麵，嘩，十分好食！十個正！

食飽飽，返東橫Inn訓番覺好，因為聽日有一個景點，係我去左咁多次東京都無去過的，好期待..............