北海道夏日賞花之旅の第七天

登別 -> 日和火山湯昭展望台 -> 熊牧場 -> 尼克斯海洋公園 -> 洞爺

昨晚其實並唔早訓，因為酒店內最著名的係溫泉，共有七個咁多，我同老婆尋晚去左浸其中幾個，今早一起床又繼續浸，所以都好早出動！本旅遊書介紹，館內的溫泉水係不需循環、加溫及加水，都係因為酒店最接近登別地獄谷，所以先有咁好的溫泉！

 

 

浸完溫泉，食過早餐，我同老婆出去行多一陣先！我地上左一個叫日和火山湯昭展望台的地方，響支笏洞爺國立公園內，可近距離見到大湯沼同日和火山！下面的湖叫大湯沼，其實係溫泉水，好熱的，你睇咁多煙出就知啦！

老婆話要行落山下，再近距離欣賞，ok！我地行左約十分鐘，到達一個叫「奧之湯」的地方，響大湯沼北面的一個較細的天然溫泉，當然唔適合人浸啦，因為真係好熱！我同老婆都係第一次咁近一個天然的溫泉，都有d驚！

沿路出來好似郊野公園咁，好多樹，好寧靜，無人經過，好relax，日本的樹好似綠d咁呢？！

我好鍾意呢幅相的構圖，好有層次，好靚！我老婆就話無乜特別！

之後我地去另一景點：登別熊牧場。我好鍾意熊仔，覺得佢地好傻，好可愛，好期待！熊牧場在山上，要搭纜車先到，好，上去喇！

上到山上，天氣麻麻，大霧加微雨，好掃興！但係當我見到d熊仔，就覺得值得。其實熊牧場主要有兩個大展館，其中一個展館大約有25至30隻熊，當佢地見到d遊客走去欄邊，就會企哂起身，吸引你拋野食俾佢！

呢隻熊係館內最得意，佢好識引人注意，成日企起身，又識得做好多動作。仲有，佢身上既毛係淺啡色，比其他熊特別，所以我剩係拋小餅俾佢食，其他就無份！

有熊牧場，就一定有「熊出沒注意」的紀念品賣，雖然香港近年唔係好興喇，但我仍然好鍾意「熊出沒注意」。我買左件風褸，都幾靚的！

離開熊牧場喇。來到登別，就一定要試登別的地獄拉麵，我地就去左正宗地獄拉麵店「味之大王」，每人叫左一碗「地獄一丁目」拉麵，即係辣的程度屬第一級，每加「一丁目」，辣的程度倍增！睇下碗麵的顏色幾紅，都估到有幾辣！

食地獄拉麵，飲哂d湯先叫食完，我地都食得哂，但係食既時候就係咁出汗，食完就要不斷飲冰水！

食完拉麵，係時候落山喇！我地搭巴士由第一滝本館到JR登別站，先將行李放響Locker，然後再去登別尼克斯海洋公園。

登別尼克斯海洋公園外圍係一個古堡，但當日落好大雨，真掃興！

我老婆好想去呢個公園，因為有一樣好特別的表演，就係企鵝巡遊！我地擔心落雨會取消巡遊，但職員話唔會，感恩！

好喇！開始巡遊喇！D企鵝一步一步行，呆下呆下，後面的管理員拍拍手，指示企鵝行的方向。(好似幼稚園老師帶住班學生咁!)

巡遊全程20分鐘，觀眾就企響兩邊，D企鵝響自己身邊經過，感覺好得意！有幾次D企鵝走過來我身邊，好八卦同好奇咁望住我，好搞笑！我老婆叫我錄Video，得閒睇下條短片笑下！

企鵝係咁樣分雌雄的！

之後我地去左海豚館睇海豚表演，起初我地覺得應該同香港的海洋公園差唔多，但睇落又幾得意，佢地做到好多動作，仲識得氹人開心添！

之後我地去左水族館，一入內我老婆就好驚，因為我地要乘搭呢條電梯，由地下上三層，下面就係水族館！我老婆話好似凌空響海上面，下面就係海！哈哈！

個水族館好得意，係圓柱體的，有三層樓高，裡面有好多魚，密麻麻！

最後我地去埋海獅館睇表演，佢地好得意，每隻都有自己個名，又唔會企錯位，好叻！

好喇，真係要離開登別喇！除左天氣比較差，我同老婆都好鍾意登別！下次去北海道會再來登別的！

乘JR由登別到下一站：洞爺。洞爺湖係日本人其中一個著名的渡假勝地，亦是2008年八國高峰會(G8)開會的地方。一場來到，一定要影下先！

由JR站要乘巴士才可到達酒店，我老婆話呢間酒店好靚，好有特色！去到間酒店，我就覺得一般啫，因為酒店比較殘舊，但老婆話睇野唔好睇外表，ok！

入到房，嘩！嚇左一跳，好有日本屋企Feel，塌塌米的房間，外面有一個大露台，望住無敵大湖景，超級正！睇野真係唔好睇外表！

響露台外望的景色！係咪好靚先！

晚餐係食日式料理，響自己間房食的！到食晚飯時間，日本嬸嬸就會幫我地整好哂，由執拾到放低食物都唔會打擾我地，最重要係佢地真係好有禮貌，又教我地點樣食法。呢餐係我地第一次響酒店房間食日本料理，我地都覺得好難忘，唔單止咁，仲有........好多野食！

食飽之後，日本嬸嬸又入房間清理碗碟，整乾淨間房，最surprise係佢地入來幫我地開埋被舖，我同老婆全部唔駛處理！我老婆話，日本嬸嬸當我地係佢囝囝囡囡咁，呵護備至，由用膳到訓覺都照顧周到！很有家的感覺！

好戲陸續有來！夏天的洞爺湖每晚都有一項特備節目：放煙花！無錯，係每晚都放！湖上有四隻船，會在湖最左邊開始，在不同位置放煙花。我地間酒店在中間的位置，起初放煙花時距離我地好遠，有d唔開心，不過算啦，無計！五分鐘後，以為煙花放完了，正想離開露台之際，突然再有煙花發放，今次比剛才的更近！再過五分鐘，發放煙花的地方，正正是在我地的露台出面！十分難忘！

今晚實在有太多的驚喜，好，早d休息！