小MiuMo溫馨蜜月之旅の第五天

開恩茲 Cairns -> 布里斯本 Brisbane -> 黃金海岸華納兄弟電影世界 Movie World

今天我地一大清早出發，搭飛機去布里斯本 (Brisbane) ，然後去今天的唯一行程 --- 黃金海岸的華納兄弟電影世界 ( Movie World )。
去到已經十一點左右，Movie World 剛剛開左一陣，唔算太多人！睇下個大門就知道喇！


一入到去，我同老婆就急不及待去玩機動遊戲，首先梗係玩我地至愛 --- 過山車 啦！園內有架過山車叫 Lethal Weapon ，好似好勁咁，好，試下先！ 排左一陣隊就有得玩，好野！我同老婆玩過好多次過山車，應該無乜難度，但今次就「老貓燒鬚」喇！因為架過山車不停咁轉，搞到老婆玩完立即頭暈暈，行下行下仲話要搵醫療室添！ 老婆緊要，唔玩其他野先，搵到個醫療室，同d澳洲人話我老婆頭暈暈，佢地就叫我老婆訓一陣，睇下好唔好d！佢地都幾緊張我地的，話哂都係遊客呀！
休息左成個鐘頭，老婆話見好d，出去行下喇！見到已經成下午一點，街上開始多人咧！


行多一陣，食d野先，然後霸位睇巡遊 (Star Parade)。


睇下有幾多卡通人物出場啦！



有我鍾意的賓尼兔同翠兒呀！超得意！

睇完巡遊，參觀一下的景點啦！見到 Gotham City Hall，好似曾相識的感覺！

Harry Potter 第一集響2001年出，我地有幸見到架火車呀！

西部牛仔村，人真係唔多！

嘩！奪寶奇兵的山洞！

又回到 Harry Potter 的城堡！


睇左一陣，都覺得幾無聊，正想搵個地方坐坐之際，見到有街頭真人model，梗係要影下相啦！學警出更 (Police Academy) 中的警察咁搞笑，同佢影張相先！我老婆走埋去影的時候個警察就唔郁，一影完就嚇我老婆，仲搵支水槍射我老婆添！

有幸同貓女郎影相！都幾難得的！

又見到更多的公仔！又影！


最開心係可以同蝙蝠俠同羅賓影到相，仲要係響佢地剛剛出來的時候影的，無乜人排隊！超開心！

呢張係我同老婆最滿意的一張相！睇雨賓尼兔同翠兒，仲有我同老婆影得幾開心！話俾大家知吖！我同老婆響呢張相真係笑得好燦爛的！

好喇！玩完華納影城，去一間中菜館食海鮮餐！因為今日係農曆新年年初二，亦係當地的中餐廳新一年的開工大日子，我地好榮幸睇到舞獅表演呀！


食完晚飯，我地仲響gold coast的商店街行左成兩個鐘添！
好，今晚住Gold Coast的Watermark Hotel，都幾好的！
今日好累，早d訓先！