小MiuMo溫馨蜜月之旅の第一天及第二天

開恩茲 Cairns -> Kuranda Rainforestation 熱帶雨森林牧場

去澳洲係我同老婆的夢想，因為我倆覺得澳洲有藍天、有海灘，仲有我地鍾意的樹熊同袋鼠，好期望去澳洲呀！當小MiuMo計劃蜜月旅行時，我地都好想去澳洲，好，就咁決定啦！

其實我同老婆希望今次的蜜月之旅，只係想去開恩茲(Cairns)、布里斯本(Brisbane)同黃金海岸(Gold Coast)，因為想睇多d自然的環境，同埋想去動物園，暫時唔想去悉尼(Syndey)同墨爾本(Melbourne)，加上旅行的日數唔可以大多，最多只係9日，搵左好多間旅行社，間間都成十日八日，又要去埋悉尼同墨爾本，最後見到花花旅行社有個剩係去開恩茲、布里斯本同黃金海岸的七天團，正合我地的意思，好啦！就報名啦！

我地想響布里斯本Stay Behind，住多兩晚酒店，加埋團費、簽證費、機場稅同保險，兩人共$27500左右，都算ok啦！

我地懷著興奮的心情去機場，因為今次係我倆「衝出亞洲」的第一擊！我地搭澳洲航空公司(Qantas)的QF238，香港飛22:00，到開恩茲係第二天06:30，好野，澳洲！我地終於來到了！

到達澳洲，第一個感覺係當地的人好nice，在入境的時候已經感受到！澳洲海關會「僱用」狗去偵緝入境旅客的毒品及違禁品，但佢地通常好少野做，因而成為入境旅客的P.R. --- 與旅客溝通的橋樑。我地見到一隻大狗(唔記得係乜野品種)，個入境處職員好nice咁俾我地摸隻狗仔，仲同我地傾計添！好nice！

好，出發！第一個景點，就係響 Kuranda 的 Rainforestation 熱帶雨森林牧場。呢個係位於熱帶雨森區的牧場，我老婆當然好期待來的，因為佢熱愛大自然，梗係期待去熱帶雨林睇下啦！我地先要坐登山吊車上山，同香港海洋公園的唔同的！

真係好靚！雖然我同老婆都知道呢度唔算係好「熱帶雨林」，但係都已經感受到澳洲的自然景色好迷人！

咁好風景，梗係影多d相啦！

去到山上，見到一個小型畫廊，幾得意的！點解熱帶雨林區內有間畫廊呢？

響牧場仲有一間教堂，唔知係咪可以響處舉行婚禮呢？！

呢首船已經改為售賣紀念品的商店喇！

我地首先會坐水陸兩用車 --- Army Duck 遊覽熱帶雨林同湖，好興奮呀！

我地就係咁樣坐住隻水陸兩用船，入森林「探險」喇！好新鮮的感覺！

坐完船，去下廁所！點解唔係Ladies的？！原來響澳洲用Sheilas解作少女、女仕！

點解又唔係Gentlemen的？！其實Blokes即係英國的小子、男仔咁解！好特別的！

好喇！跟住的節目係澳洲土著表演。例如吹澳洲土著樂器啦！

玩下「標槍」？！

我地仲可以試下玩澳洲最出名的回力標！睇下我？！有姿勢、有實際！

我老婆仲勁！負磅上陣！一樣ok！

好喇！真係到澳洲土著表演喇！雖然唔知佢地講緊乜，但係佢地好投入表演的！

依家佢地扮緊袋鼠！都好似的！

睇左成二十分鐘表演，佢地好落力表演的！但我同老婆個心都不在此，因為我地更想快d去下一景點 --- 樹熊園！



我地一入到去，剩係識講 --- 好得意呀！好cute呀！Kawaii 呢！仲有，我就狂影相！見到樹熊個傻樣，真係好想攬住佢番屋企！

睇左好耐喇！係時候睇澳洲的另一代表 --- 袋鼠。唔親眼睇唔知，小袋鼠真係成隻響袋鼠媽媽的袋裡面的！

我梗係要同老婆同袋鼠影相啦！佢地都唔驚人的！

我地影完袋鼠後，就梗係要試下抱下樹熊啦！來到澳洲，點可以唔試下的！我老婆抱果隻樹熊都不知幾咁乖，睇下佢幾Sweet！點知到我抱果隻，唔知點解突然掙扎，仲咬左我一啖！d管理員仲話，樹熊絕少會咬人的，話我好lucky！唔係掛！鱷魚夠絕少咬人啦！一咬就大件事啦！死得人的！

好！響熱帶雨林餐廳食過午飯，返酒店休息下喇！今早響飛機上渡過，梗係累啦！之後響一間中餐廳食埋晚飯，早d休息，真係好累！