日本大阪和歌山初體驗の第五天及第六天

大阪 -> 奈良公園 -> 東大寺 -> 大阪城公園 -> 環球影城 -> 心齋橋 -> 大阪機場

原來今天的行程只有兩個景點，就是大阪 RinKu Town Outlet 及環球影城，但我與老婆都唔想去outlet，又唔想咁早去環球影城，於是我地早一晚同導遊先生講，話我地上午及中午唔跟大隊，出去「自由行」！係咪好大膽呢？！

當日我地上午五點半起床，響酒店lobby放低行李，就響自由行第一站 --- 奈良 --- 進發！

好，先坐JR，睇下大阪市內的鐵路圖，都唔係好複雜啫！(比起東京的！)

出JR站時，見到呢個路牌，我老婆又話要影，因為係教材！

去到奈良，要乘坐巴士先可以到達奈良公園，途中見到好多路牌，叫司機小心有鹿仔出沒！

到達奈良公園，天色十分晴朗，影相十分靚！見到D櫻花樹，同咁大片草地，我不其然訓左響草坡上，欣賞神創造的世界！So Relax！

一入公園就已經見到一大班鹿仔坐響路邊的草地，佢地真係好得意，又唔多理你，幾咁「悠然自得」！睇下前面呢隻鹿仔，訓覺個樣幾Cute？！

我老婆好鍾意呢隻鹿BB，話佢好精靈，好有性，我地去邊就跟住，又好似我地屋企兩隻狗仔 --- MiuMiu 同 MoMo 呀！我老婆仲想攬住佢影相添！

我老婆買左一包餅，餵D鹿仔食，初時只餵一隻兩隻，及後有其他鹿仔發現，嘩！圍攻我老婆，有D鹿仔仲搵個頭或者用鹿角「頂」我老婆 Pat Pat ，博哂大霧！

我老婆好鍾意D鹿仔，同佢地玩左好耐，而我就好鍾意個公園的環境，好舒服，好寧靜！睇下，成個公園都無乜人，真係好回味！

公園的櫻花主要係白色，影相的效果並不突出，偶爾見到兩棵粉紅色的櫻花樹，一定要狂影啦！我就最滿意呢兩張喇！你地話靚唔靚呢？！

沿路真係不斷見到鹿仔，D鹿仔不單在公園範圍，公園附近都可以見到鹿仔走來走去的！D車見到佢地過馬路，都要先讓佢地行，幾巴閉！

行下行下，去到東大寺參觀。東大寺係古都奈良的文化遺產，當地好出名的！

睇下東大寺前有幾多鹿仔？！幾舒服咁訓覺！真係與世無爭！

到達東大寺的正門，我老婆話唔入去，因為佢都係想同鹿仔玩！好啦，成全你啦！

其實響公園範圍或者行人路上，都有呢D路牌，叫路人小心注意鹿仔的情況，幾時係鹿仔的發情期，唔好惦佢；咩野情況下會激嬲D鹿仔......幾得意！

走喇！離開奈良公園喇！我老婆勁唔捨得！呢隻係咪好似頭先隻細鹿仔？點解佢會出來送我地走的？真係咁有靈性？！

去JR站途中，見到和民居食屋，無時間光顧，因為我同老婆趕住去下一景點..........

奈良JR站，再見了！

經過一小時JR車程，終於由奈良到達自由行的第二站 --- 大阪城公園。



來到大阪，點可以唔去大阪城公園呢？！係咪？

我最感動的，係見到D櫻花同大阪城好Match，好靚！

我地響大阪城妁園只逗留了短短的四十五分鐘，但我已經不斷影相！呢張相我都好鍾意的！

點解要咁趕，因為要響下午一時半返到環球影城，與導遊匯合！要走了！唔捨得添！

到達環球影城，其實我老婆唔係好鍾意玩，但係我話一場來到，參觀一下囉！

環球影城中的嘖水池。我用部傻瓜機影呢幅相，參不多要五分鐘先影到呀！

一入到影城，就有大力水手歡迎我地，梗係攬住佢影相啦！

行入D，咁岩見到芝麻街出Show，又影！

行下行下，睇下D建築物，有 E. T. 啦！ 

又有 Spider Man 啦！

仲有 Jurassic Park 添！

不過我老婆都係對呢D展館同遊戲無乜興趣，心裡只係記住D鹿仔！

呢兩幅又係用我部傻瓜機影的，都幾難影的！

我老婆最後都頂唔住，要我陪佢出去大阪心齋橋買野，好，老婆叫到，一於出發！

我地有兩個半小時逗留心齋橋，行完街，番到環球影城集合，出發到機場了！

臨走前，又用五分鐘先影到呢張相！

我地響晚上22:10搭國泰CX2567返香港，返到香港要11號01:15左右，好累呀！

後記：

其實今個Trip係我地第一次響旅行團途中離隊去「自由行」，我地覺得奈良同大阪城公園的行程係賺左的！雖然今次唔係完全的「自由行」，但我同老婆亦好enjoy整個trip，尤其記得和歌山的景色、對住大平洋的露天溫泉、那智瀑布、奈良的小鹿、和歌山城及大阪城的櫻花景緻，我同老婆至今仍然回味！