日本大阪和歌山初體驗の第三天

勝浦漁港 -> 紀州備長炭發見館 -> 黑潮市場 -> 和歌山城 -> 大阪

昨晚睡得很好，今天早上五點半已起床，目的係為了影相！影日出！

呢次係我去旅行中，第一次睇日出，有d人會覺得奇怪，點解去旅行仲要咁辛苦、咁早起床？！我覺得心態唔同，平日一大清早起床係為了返工，有壓力、有負擔，旅行時一早起床係為左自己想睇的景點，無乜壓力，好Relax、好Enjoy！

由於我地個房唔係向東，我同老婆一早上展望台霸位等睇日出。其實清晨仲係好凍，我地兩個仲要著風褸。

我咁耐都未試過同老婆一齊睇日出，所以我尋晚特登問老婆今早同唔同我睇，佢一口Say Yes，我真係覺得老婆好錫我！

雖然今日有d低雲，但睇到太陽慢慢從水平面升起時，心裡十分開心和感動，除左覺得上帝創造大自然的偉大，仲好開心可以同老婆一齊睇到咁靚的一刻！

Zoom近d個太陽先！響香港邊有機會同恆心睇日出？！

日出真係好靚！我同老婆除左心裡感恩外，一粒聲都無出，欣賞自然的美！朝早的太陽係特別柔和的！

睇完日出，梗係有我地的「指定動作」--- 浸溫泉！一早咁凍，梗係要浸溫泉暖暖身先！
食過早餐，又係時候Pack行李離開。坐船時影番張相留念先！我同老婆都話會再來的！

好，去第一景點 --- 勝浦漁港。唔講唔知，原來勝浦漁港係全日本最大的吞拿魚市場，睇下幾震撼！

現在係早上九時半，勝浦漁港仲仍然好多人來往，睇下d吞拿魚幾大條！

我地兩個都忍唔住，要上鏡喇！影番張相做紀念先！

走了！影低勝浦漁港的外觀先！

接著去紀州備長炭發見館，主要賣備長炭物品，我地行左唔夠三分鐘就走左！

搭一個半小時車，到達黑潮市場。呢個係和歌山最出名的魚市場，入去睇下先！

我地叫左兩碗魚生飯，想與東京築地市場的魚生飯比較一下。食後我地一致認為築地市場的魚生飯好味好多！

食飽飯，行下啦！附近環境都唔錯，好有歐洲Feel！

好喇！來到今日的重頭戲 --- 和歌山城。和歌山城與松山城、姬路城合稱日本三大連立式平山城，勁！睇下幾有氣勢？！唔知佢靚d定係之後參觀的大阪城靚d呢？

四月來到和歌山城，指定動作係睇櫻花。呢次係我同老婆第二次睇櫻花，對上一次係兩年前響東京睇。我好鍾意呢幾幅相，d小食店好似俾d櫻花包圍住！

日本人好鍾意賞櫻，會帶埋地蓆坐響地上，一邊交談、一邊食野、一路賞櫻，十分懂得享受！我同老婆講，有機會的話要自由行，唔受時間的限制，學下d日本人咁樣，好Relax咁賞櫻！期待中．．．．．．

和歌山的櫻花，顏色比較偏白，都幾靚。呢幾張相我影左好耐，因為我部「傻瓜機」Focus左好耐都仲係Out-Fo，勉強收貨啦！

全公園的櫻花都以淡粉紅或白色為主，偶爾見到呢棵櫻花樹d花係深粉紅色，物以罕為貴，立即影！

我地覺得今次睇櫻花，櫻花又多d，個氣氛又好d，我地好鍾意！

好喇，要離開和歌山，有d唔捨得添！返大阪住大阪Bay Tower喇！今晚無乜特別，早d休息先！