南紀勝浦溫泉 -> 徐福公園 -> 那智瀑布 -> 串本海中公園 -> 橋杭岩
昨日黃昏返回酒店後，除左食飯，就係浸溫泉！
講下呢間酒店有乜咁巴閉啦！睇下個map先：
酒店共有七個溫泉，包括：
１. 大洞窟温泉忘帰洞
２. ハマユウの湯・滝の湯
(女湯)
(男湯)
３. 洞窟温泉玄武洞
４. 磯の湯
５. 遙峰の湯
(女湯)
(男湯)
６. なぎさ元湯露天風呂
(女湯)
(男湯)
７. 天海の湯
你地一定覺得好奇怪，點解我會影到咁多相，原因好簡單 --- d相係響個Offical Website裡面搵出來！感恩的是我地響南紀勝浦溫泉住兩晚，一般都係住一晚的！呢個亦係我老婆揀呢個團的原因！
尋晚一口氣浸左四個溫泉，今朝一早老婆又急不及待要試埋其他的，你睇我地都玩得幾顛！每個溫泉的入口都會有個印仔俾我地，印下作紀念，儲齊全張印仔就係咁：
講下尋晚有件趣事發生：尋日黃昏一開始浸溫泉，就去山上館遙峰の湯，我地要從本館行過去，會經過一條露天的樓梯。因為天差不多黑哂，我老婆行先，我跟後，又叫佢小心d行，行到上平台，突然我老婆話見到一隻狗仔，以為有人放狗散步，點知原來係一隻好似「百變狸貓」的動物行過，果隻應該係「狸貓」呀！我仲話好難得睇到野生「百變狸貓」，只有「可愛的小朋友」先至睇到！我同老婆都開心到不得了！
好，講番今日！
今早浸完溫泉，累氣全消，終於有時間周圍行下影下相！酒店的外景 ---
我地其中一個溫泉(應該係大洞窟温泉忘帰洞)，望出去就係呢個景，再望出d就係太平洋！我老婆成日都想望住個海浸溫泉，今次終於如願以償！
我同老婆都好鍾意的日式小花園，好靚！
行左一陣，食早餐後，再出發！我地搭番尋晚搭的浦島丸船仔出去，落船後影下個碼頭先！
其實我比較少影街景，但覺得南紀的街道好寧靜，好舒服！
響路邊見到幾間屋仔，起初我地以為係俾人休息的地方。導遊話呢d地方係俾d漁民用的，佢地朝早捕魚之後，可以響度浸腳！唔駛俾錢的！d水仲要係溫泉水添！嘩！咁正！
好喇！去第一站 --- 徐福公園進發！
據公園提供的資料，秦始皇統一中國後，想到《山海經》說東海上有蓬萊、方丈、瀛洲三座仙山，有神仙居住，就派遣當時的方士徐福乘船出海，前往仙山尋求長生不老藥。徐福帶同三千童男童女，以及已經預備的三年糧食、衣履、藥品和耕具出發入海求仙，然後來到紀伊半島（和歌山縣）熊野河口。到達後，徐福發現天台烏藥，並感到當地氣候溫暖、風光明媚、人民友善，就停下來自立為王，教當地人農耕、捕魚、捕鯨和瀝紙的方法，一去不返。
呢個就係徐福像喇！
其實我同老婆都唔係十分鍾意睇建築，睇左一陣就走左出去四圍逛！我地見到日本d橫街，覺得好Warm，當地的人亦好Nice，我地仲響附近的超級市場買左一包好平的日本米添！
好，上車，去下一景點 --- 日本三大瀑布之一：那智瀑布。一到達我老婆就覺得好似去左龍貓的森林入口，極期待睇睇裡面的環境係點樣！
呢個梗係要影啦！
我地經過一段路，到達呢條長長的石樓梯。我同老婆一到達，都被呢條石梯及附近的環境吸引，覺得呢處有種囁人的魅力，好有靈氣！
終於來到那智瀑布了！瀑布好高，加上附近的環境，覺得十分寧靜，令人覺得心境舒暢，與大自然混為一體。
我同老婆都好鍾意呢度，被果種祥和的環境氣氛所吸引！都現在寫blog，我地仍在回味！值得推介此地！
好，食午飯先！簡簡單單的一個火窩，亦好好味！
午飯後我地去串本海中公園，當然係睇魚啦！
公園裡有個海龜館，可以睇下大海龜，都幾得意！佢地仲好為食添！
呢個就係海中公園的海中展望塔，行入去落樓梯，在海中見魚仔游來游去，好得意！但落雨呀，d魚都少左！我都無乜影到相！
之後我地去一個叫橋杭岩的地方，有好多奇形怪狀的石柱，我老婆話呢度風浪好大，海邊的岩石長年被侵蝕，變成現在的樣子！
好，離開橋杭岩喇，附近有一攤檔有好多團友聚集，原來係賣燒魷魚！十分香呢！我地都唔執輸，買左一塊試下，好好味，d魷魚係新鮮的！好鮮味！
食住魷魚，見仲有時間，響附近行下先！呢個係JR紀伊勝浦站
路牌介紹附近的名勝同景點
好，大約下午五時，又坐船仔返酒店喇！今晚又再浸過溫泉先！
沒有留言:
張貼留言