北海道冬季浪漫之旅の第一天

札幌 -> 札幌薄野不夜天 -> 橫丁拉麵街

每年的農曆新年，我外父外母都會出外地旅行，除了散散心、叉叉電外，最重要是一家人可以開開心心聚在一齊。我同老婆雖然有多次旅行經驗，但未試過兩公婆與外父外母一齊去，既然今次大家都想去日本，好啦，一齊去啦！阿姨同表妹都想去，ok，「阿妹旅行團」共有六人報名 --- 「已成團」！

我地乘搭國泰CX2582班機於11:45起飛，大約下午五時到達北海道。都知道冬天的北道會落好大雪，我地帶著期待的心情，希望五天行程有得睇落雪啦！

Check-out之後，首先去札幌的一間餐廳食晚飯。今晚係食自助燒烤，有好多野食的，D甜品又好味，D肉又鮮，我老婆最鍾意係自己煮的烏冬，超彈牙！讚！

唔知係自己肚餓，定係日本D野食真係好味D，我竟然食極都唔飽的！

好喇！食飽飽，未到上車集合的時間，出餐廳外行下，竟然見到一排「麵包車」泊響停車場，應該係二手車來的。

一架「麵包車」都只係680000円，大概港幣50000元，抵！最重要的係香港絕少人揸呢一款車呀！型！我幾有衝動返香港買番部呀！

雖然無落雪，但我地都感受到北海道的冷！睇見路兩旁的雪有幾厚就知道啦！

好！終於出發去第一個景點 --- 札幌薄野不夜天。我地當然要去睇下最出名的橫丁拉麵街！

一入去，兩邊滿有拉麵店舖，都唔知邊間好味！就算知道邊間D拉麵出名，我地頭先食得太飽了，無胃口再食碗拉麵喇！

好，出來玩下「夾公仔」啦！我老婆係史廸仔的超級 Fans ，當然要玩下啦！

好，札幌的夜景就睇過喇！都幾繁盛的！之後幾日都係去郊區，無咁熱鬧的！

好，今晚住APA Hotel & Resort。好野，有得浸溫泉！我咁大個仔，第一次響日本浸溫泉咋！超開心！