黑岳山 -> 層雲峽 -> 銀河瀑布、流星瀑布 -> 網走
尋晚又食得飽、又浸溫泉、又訓得好，今朝好好精神！
從酒店房間望出外，見到的只有白色，就知道尋晚應該落好大的雪！
食過早餐，導遊話我地知，尋晚真係落好大雪！我地出外想行下，嘩！好凍呀！求其影兩三張酒店的雪人公仔，快d入返室內暖暖先！
好，開車喇！今日第一站係黑岳，導遊話車程要四個小時，嘩！又爭取時間訓陣先！沿途見到的就只係咁樣，勁無奈！
過左兩小時，難得有個中途站，落車休息一下！店舖內有好多野賣，我外母同阿姨當然買左好多小食啦！我地就周圍行下，見到得意野就影張相囉！
唔知係咪未見過咁多雪，我同老婆仍然好興奮，周圍行下，玩下雪，唔係好記得原來係好凍的！
好，休息一陣，再開車出發！公路上見到的情況，兩邊鋪滿白白的雪，好浪漫！
過多兩小時，終於到達黑岳附近了！先去食午餐先，因為之後要行幾個景點，都需要體力同熱量的！由餐廳向外望的情況，好得意！
食過午餐，又出外行下，我同老婆好似唔知道，跟住的行程有幾「堅」，剩係掛住玩！
雪愈落愈大，我地都擔心黑岳的天氣會好差呢！
好，準備上黑岳喇！心情有d緊張添！
響山下的纜車站，見到山上的溫度，係零下十二度！無錯！係零下十二度！成家人當即刻呆哂！點算呀！天呀！
好，一場來到，上去就上去囉！至多今晚狂浸溫泉啦！
纜車開了，途中見到的景色，真係好特別，因為真係未見過滿山被雪舖蓋的！
山谷都被雪舖滿，好似蛋糕的裝飾！
好喇！上到黑岳站喇！其實出面真係好凍的！唔好睇我老婆好似好淡定，佢勁凍，震過「貓王」呀！
有溫度計為証，真係零下十二度！
未見過雪山的我地，仍然興奮，其餘四個屋企人就響纜車站，點都唔出來，因為實在太凍喇！
睇到樹上的雪，不其然的興奮！我地響雪上走呀走，好high呀！
其實當時已經落好大的雪，黑岳站已經好凍的了，但我地跟住的考驗仲勁！
車程約半小時後，去到今日第二景點 --- 層雲峽。適逢層雲峽冰瀑祭，當然唔可以錯過啦！
層雲峽冰瀑祭中有幾個冰洞，當中的主題都不同，呢個就係以冰柱為主題的。
冰洞外面的環境，真係好凍的！
我好鍾意呢個景，好靚，有山、有河、有冰雪，好浪漫！
其實行到去層雲峽時，我地自己行，外父外母、阿姨同表妹都唔知去左邊，之後先知佢地行左一陣就番左上車，因為真係好凍！
臨走前影多一張層雲峽的全境！靚！
去完層雲峽，再睇埋大雪山國立公園內的兩條出名的「瀑布」 --- 銀河瀑布同流星瀑布。咁大雪，瀑布梗係結冰啦！
好，實在太凍了，所以睇左一陣就急急上車去網走！今晚我地住響網走溫泉酒店，好野，又有得浸溫泉！一定要驅寒呀，如果唔係都唔知捱唔捱到呀！咁凍！
今晚的酒店房間都幾特色的，叫和洋室，即係 Half and Half 啦！
好，聽日的行程好期待的，因為會有「第一次」呀！
沒有留言:
張貼留言