北海道冬季浪漫之旅の第四天

阿寒湖 - > 十勝 - > 札幌 - > 白之戀人朱古力廠 - > 小樽 - > 札幌

尋晚十分開心，因為有好多個「第一次」，到朝早仲未興奮完！
起身後從酒店窗望出外，睇番尋晚放煙花的地方，原來係結左冰的阿寒湖，別有一番風味！

湖上有好多公仔，雖然結左冰，我同老婆都出去影左幾張相！

夏天的阿寒湖係好靚，冬天的阿寒湖其實都好平靜的！

導遊話，今天的車程好長，因為要返札幌市同小樽，要到下午三、四點左右才到達，上車時千叮萬囑，叫我地check清楚d行李，唔好遺留響酒店。開車後十五分鐘，真係「好既唔靈醜既靈」，有個「近視」的團友竟然話佢唔見左副眼鏡！勁低能！有乜理由自己無戴con，睇野唔清楚，竟然唔知自己無戴眼鏡？！係咪玩先？！

旅遊車要折返，一來一回，無左大半個鐘！我地成家人已經好唔妥個團友，個團友取回眼鏡，一d悔意都無，粒聲唔出就返埋位，sorry都無句，真無品！

已經遲左喇！好啦，飛車返札幌啦！途中經過十勝作中途站，自費食lunch先，食完再出發！

再駛多三個幾鐘頭，我表妹話人有三急 (其實當時仲有好多團友都有同樣的需要！)，但好景不常，遇著大風雪，封左高速，由札幌去小樽要行車路，嘩！

最後，導遊作出一個決定，響「白之戀人」停車，俾我地去洗手間！嘩！賺左一個景點！呢處響個行程原本唔經的！有d人嗱嗱聲去洗手間，我同老婆就把握時間，影多幾張相！
冬天鋪滿雪的白之戀人好靚、好浪漫，睇下d燈飾就知啦！

冬日的白之戀人真係好靚！好有浪漫同滿足的感覺！

影左唔夠十分鐘相，突然落大雪，嘩！之前幾日都無落雪，一落就咁大，好似落紅色暴雨咁！

愈落愈大，視野開始不清，導遊叫我地快d上車，因為驚遲d更塞車！

果然，要成下午五點半先到小樽，我同老婆帶著煩躁，衝入小樽最出名的音樂盒專門店製作音樂盒！

裡面有好多音樂盒，但我地快步上左二樓，自家制音樂盒！

上到二樓，有好多的音樂盒配件，我地造左個 Winnie the Pooh 音樂盒，臨走前買左個好得意的音樂盒，係一個玻璃樽的音樂盒，玻璃樽內有個燈塔，只需將玻璃樽的「木柵」打開，就會有燈塔的音樂播出！將個「木柵」放番玻璃樽口，d音樂就會停！超勁！的同老婆研究到今日，都唔知佢既原理係點樣！

整完音樂盒，已經係晚上六點三，突然響街上聽到音樂盒的聲音，係由呢個鐘發出，的加上不斷落雪，十分浪漫！我同老婆到依家仍然記得呢一幕情景！十分深刻！

冬日的小樽，真係好童話feel，十分浪漫！最重要的係落雪同夜景更加浪漫！

去到小樽出名的運河，停了落雪，感恩！夜晚睇小樽運河都靚，但導遊話最靚係黃昏的小樽運河！好，我promise老婆，遲d一定要再來小樽，影相同盡情遊覽音樂盒專門店！

今晚響小樽食火鍋，其實我同老婆都仲有d唔開心，因為留響小樽的時間實在太少了！去到餐廳，睇到隻長腳蟹，我老婆先開心返少少咋！

我地今晚就係食呢d，有長腳蟹、海膽、赤貝、仲有其他海鮮，yummy！

睇下我地的戰績！我地將d飯加入海鮮湯中，勁正！

臨走前，響餐廳睇到北海道另一特產 --- 天使魚！d天使魚大約得一厘米一條，超細條，更重要的係佢地的身體係透明的！好難先至用部「傻瓜機」影到一兩張相咋！

好，今晚番札幌APA Resort Spa酒店訓！又有溫泉浸！