北海道冬季浪漫之旅の第三天

網走破冰船 - > 雪上電單車 - > 屈斜路湖 - > 阿寒國立公園硫黃山 - > 阿寒湖

一大清早起床，由酒店的房間外望，嘩！今日天氣好好呀！前兩日的天氣都唔太好，今日見到晴天，心情都靚d！

 

好，食過早餐，出發！今日我地會在網走坐破冰船，破冰船只會在一月中至四月初出Trip，限定航行的！未上船，先影張相先！

我老婆去呢個Trip，最期待就係坐破冰船喇！第一次坐破冰船，心情有d緊張，唔係因為驚有意外，係因為想睇下d冰有幾厚！想感受一下破冰的威力！

開船喇！我地覺得好似響香港坐天星小輪一樣 --- 咁定！唔係好覺有「破冰」的情況，可能係d冰唔多啦！坐左一陣，開始有人買左d蝦條餵海鷗，起初都只係三至五隻，整整下，嘩！成天都係！真係有好多的！

我老婆、外母同阿姨都買左蝦條餵，起初都擔心d海鷗會唔會睇唔到我地隻手，當手指係蝦條就大件事喇！餵下餵下，唔知係咪訓練有數，佢地係唔會食到我地的手指，好準確的！

睇下！真係好準確的！我老婆本來都有d驚的，餵下餵下，勁開心，好high！好興奮！餵下餵下，餵埋百力滋添！

好喇！餵完海鷗，係時候回程喇！見到浮冰唔多，就知道地球暖化的嚴重喇！

隻船返岸，我地都好開心，因為第一次坐破冰船都好好玩的！

上旅遊車，見到沿岸的風景，我老婆同外父十分鍾意，因為外父見到好多遊艇，我老婆就好鍾意個鋪滿雪的沙灘喇！好浪漫！

都食午餐我時候！唔好睇小呢個定食呀！長腳蟹湯、帶子刺身、帶子群邊，份量雖少，但十分好味！

由餐廳向外望的風景十分靚，我同老婆，仲有外父都好想落去行下！

響沙灘上，我地見到有白白的積雪，十分浪漫！

我有個提議，不如響沙灘上整「足印」的故事吖！

之後我同老婆就先從後面整兩排腳印，到中間就變成一排，好似我揹住老婆行咁！

響呢處講下足印的故事俾大家聽啦！ (雖然有好多人已經聽過！) 

有一個人，他無論平日在什麼時候，都會看見主的那雙足印走在自己那雙的旁邊。可是有一天，當他遇上了危難，卻發現，地上只剩下一雙足印。他傷心地問主：「為什麼在這我最需要你的時候，你不在這裏伴著我？」主卻笑著回答說：「在那些你只看得見地上那唯一一雙足印的時候，就是我背著你走過幽谷的時候。」那個人才明白到，原來，他不曾孤單過。每一段難走的路，主都背著他走過了。

其實，我同老婆都相信，信仰並唔係頭腦上的認知、或知識上的認同，而是經歷！只有經歷先可以讓你了解信仰的真實同可靠！所以我地都要努力作上帝的見證人！

好，講番個trip，我地都被呢個沙灘吸引，唔係因為d雪咁簡單，係因為呢處真係好平和同寧靜！

食完飯，坐多一個鐘車程，去到一個山上，可以自費坐雪上電單車，十分刺激的！我同老婆梗係唔會走雞啦，估唔到外母都玩埋一份，真勁！

我地仲要夠膽死排頭位！睇下我老婆駕駛雪上電單車的姿勢，就知道佢好勁啦！

駛到山上，影落山下的景色，另有一番風味！

好，玩完雪上電單車，又係時候出發去下一景點 --- 屈斜路湖。起初響車上導遊話湖邊有好多野睇，又唔講睇d乜，神神秘秘咁！

嘩！一落車，真係嚇一跳！成個湖邊都係天鵝！我同老婆真係未曾見過咁多天鵝的！真係好震撼！

我好鍾意呢張相，因為我覺得影得好有詩意！

我地又走去餵天鵝啦！佢地真係唔怕人的，仲追住我地「搶」野食！

餵完天鵝，我地見到湖邊有幾個木箱，起初都唔知係乜，導遊話呢d叫做「砂湯」，響沙灘上有好多溫泉，讓遊客「掘」，呢幾個就係現成的「砂湯」，俾人「足浴」！嘩！天寒地又凍，有溫泉梗係立即除鞋浸下，舒服下先！嘩！成個人暖哂！

其實，屈斜路湖都真係幾浪漫的，起碼有幾百隻天鵝陪我地行下！

好，離開屈斜路湖，去今日我最後一個景點 --- 阿寒國立公園的硫黃山。架車未開到硫黃山，已經聞到一陣陣硫黃味！勁！呢處鋪滿雪，遠睇都幾靚架！仲有一陣陣煙噴出！

近d睇，未睇先聞到更強烈的硫黃味，阿姨到表妹都唔係好頂得順！

睇下個山上的黃色地方，就係硫黃，導遊話唔好聞咁多d煙，因為有毒的！小心小心！

我同老婆唔識死！愈走愈近，見到d硫黃洞，上面的石頭已經轉哂色啦！

唔知係咪我老婆讀地理的關係，佢好有興趣睇呢個硫黃山，但其他團友就興趣不大喇！好早就返哂上車！剩番我地倆公婆同外父外母最後才返上車！臨走前影多一張硫黃山的全景先！

好，離開硫黃山，返酒店先！下午五點左右返到阿寒溫泉酒店，放低行李，見未到食飯時間，出酒店外行下！阿寒有好多呢d守護神，我當然要同老婆影張相！

今晚最特別，因為除左有好好味的晚餐，又有溫泉浸，最重要的係有煙花睇！夜晚八點，準時發放！雖然只得十幾分鐘，但響酒店房望出去，一路睇煙花、一路攬住老婆，好溫馨浪漫！

今日去左好多地方，仲第一次坐破冰船、第一次睇到咁多天鵝、第一次去硫黃山，仲有第一次去旅行睇到煙花，真感動！