台北近郊新體驗の第三天

九份 -> 國立臺灣師範大學 -> 西門町

今天一大清早起床，響酒店食左美味的早餐，出發去今日的主要景點 --- 九份。其實已經到九份幾次，但每次去九份都係下雨，所以抱著「不屈不撓」的精神，今次想去九份係天晴的！

但尋日同前日都有雨落，今日都不太樂觀！

好，搭捷運去台北，轉火車去瑞芳，由瑞芳坐的士上九份，已經好熟喇！

今日上九份唔抱太大期望，但上山途中，天色並不太差！感恩！

早上十一點上九份，人並不多，主要係旅行團未到，我地行得好輕鬆呀！未試過響九份會行得咁relax，唔駛同人迫！

店舖剛營業，人不太多，見到得意的公仔同擺設，我地仲可以影下相添！

上到九份，我同老婆一定會食的就係「丸」喇！睇下幾大粒！

有醬爆肉丸啦、牛丸同墨魚丸，仲有我最愛的鹵肉飯，正！

經過九重町，次次都因為人太多，影唔到相，今次終於影到喇！Yeah！

上到九份的山頂了，向海一望 --- 好靚呀！次次上來都落雨，個天又多雲，乜都睇唔到，又趕住買手信，今次終於可以好relax咁欣賞一下九份的迷人景色喇！

仲有，今次係我地真真正正睇到「悲情城市」的實景 --- 著名的九份長梯，次次都話想去，次次都唔記得去！今次見人唔多，仲唔影多幾張相咩！

Pingu話，既然來到「悲情城市」的拍攝場地，一定要用個「悲情樣」影張相！

其實今次係第一次見到呢條長梯，感覺好震撼，後來先知道，原來日本著名動畫家宮崎駿之前專程到九份取靈感，然後根據九份的夜景，創作左「千與千尋」呢部著名動畫，睇下d長梯同燈籠，係咪有d似曾相識的感覺呢？！

九份有好多茶樓，其中一d係拍攝悲情城市的場地，梗係要大肆宣傳一下啦！

今日的一大突破，就係我地選擇去其中一間叫「阿妹茶樓」「茗茶」，幾high-class呀！哈哈！

嘩！入到茶樓中，別有洞天，好relax欣賞九份的景色，仲可以三人吹下水，飲下茶，個人都醒哂！

茶館店主推介的蘋果茶，好清新，好好飲！仲有「卜卜趣」送茶，好特別！

我就叫左呢杯「香片」茶，超香，好好飲！唔知點解，好似好飲過香港的，係咪心理因素呢？！

休息左一陣，欣賞左咁靚的九份景色，終於「如願以償」喇！臨走前，梗係要食埋我老婆最愛的 --- 芋圓！我老婆超鍾意食芋圓，因為佢好鍾意芋圓的口感，煙煙刃刃，好好味！我地仲買左幾盒做手信添！自己又掃左幾盒，留番自己食！正！

好，響九份逗留三小時左右，買完手信，我老婆話「專程」去試下一間冰室的花冰，好好味的！途經國立臺灣師範大學，都好出名的！

又途經一架車身有傻豹的粉紅色靚車，我地即時影相，俾我地的同事積奇「羨慕」下先！

呢間就係好出名的冰室喇！我老婆同Pingu都好鍾意食呀！

下面係士多啤梨同煉奶花冰，上面係芒果雪糕，Yummy！

之後我地就好趕急番西門町Shopping，我就無再影相喇，因為要趕住「掃貨」呀！

好，要返香港喇！我地搭港龍KA483，於20:55起飛返港了！

雖然只得三日，但三日的主題活動都好新鮮，好relax，仲好懷念台北的街邊小食、臭臭鍋、果汁、鹵肉飯 ...... 講起都口水流呀！