絲綢之路體驗行の第三天

烏魯木齊 -> 阪城 -> 吐魯番坎兒井博物館 -> 蘇公塔 -> 千佛洞 ->

火焰山 -> 高昌古城 -> 葡萄溝

今日一大清早要起床，因為今日在烏魯木齊的行程緊密，有好多景點呀！
先去吐魯番，途經達阪城，見到全亞洲最大型的風力發電站，睇下幾壯觀！真係好多風車呀！

落車影相先！一落車立即知道點解響呢處建風力發電站，因為真係吹到頭痛的！睇下老婆影相時幾狼狽就知道喇！

d風車真係無處不在，咁近公路旁邊都有幾部！

因為地勢關係，大風導致荒漠化嚴重，沿途都係咁樣的景色！我老婆就好鍾意睇喇！地理人吖嘛！

山上無乜植被可言，咁既環境真係唔容易生長！

好多山都係光禿禿的！

好，經過個多小時，到達吐魯番坎兒井博物館。

坎兒井係中國古代三大發明之一，仲有兩項係長城同京杭大運河。

坎兒井的簡介，我唔詳細介紹喇！地下運河主要為葡萄園提供水份的。

睇下個模型，就知道當時工程浩大！

呢條就係地下的運河，設計係避免水份在地面流失！

當時的古坎兒井，已經改為今日與遊客影相的地方了！

坎兒井地面上種滿白樺樹，防止水份流失之外，亦能鞏固泥土。

離開坎兒井，食埋午餐，就出發到下一景點 --- 蘇公塔。

蘇公塔係新疆伊斯蘭教的著名建築物。

其實我地響蘇公塔逗留左一陣，因為趕住去之後的景點！

上車出發！沿途見到應該係油田的地方。

約一小時後到達千佛洞。

在外觀上見到千佛洞好宏偉，又有好多遊客參觀，我地覺得一定係好精彩的！

到達洞內參觀，因為嚴禁攝影的關係，所以我無影到相喇！但參觀完畢，知道好多地方都被破壞，壁畫人物的眼睛都全被挖掉！加上被俄、德、英、日等國家盜劫及破壞，好多地方都殘缺！

情況就好似呢個佛洞一樣！慘！點解國與國之間唔可以和平共處呢？點解要破壞呢！

忘記唔開心的事喇！到達下一景點 --- 火焰山。當然要同老婆影張相先！

呢個好明顯係人工加上去的啦！哈哈！

火焰山附近有供遊客乘坐的駱駝，我地唔夠時間咋，唔係我地都試下坐呀！

火焰山的遠景。因為係四月的關係，火焰山都唔係好高溫，我地感受到的，好似香港夏天的情況，但比較乾身，濕度超低，應該有三十幾度啦！算低喇！夏天來火焰山，閒閒地有攝氏四、五十度呀！

一場來到火焰山，影張搞笑相先！

都幾壯觀的！哈哈！

好喇！又要離開，去下一站 --- 高昌古城。我地要乘驢車入場參觀，因為地方實在太大，有排行！睇下，個個都戴哂口罩！因為好大沙塵、好大風！

驢車一路行，眼見只係一堆堆頹垣廢土，高昌古城曾經係西域最富庶的地方，依家一樣係一個被人荒廢之地，對其他人來講，可以係參觀景點而已，對我地來說，都算係上帝俾我地的提醒 --- 在地上的榮華始終有朽壞的一日，所以我地的目光應該放響在天上的財寶！好！應該時常感恩！將我地的努力放於在天上的獎賞！

見到古城的遺址，心裡真係有點感概的！

好喇！去到今日最後的景點 --- 葡萄溝。我地滿心期待去睇下有無葡萄，點知一到達．．．

嘩！乜就係咁樣咋！明「昆水」！勁「屈機」！

好，番烏魯木齊酒店附近食晚餐！今晚係食新彊著名的烤全羊，個樣都幾恐怖的！

之後我地要急急腳到下一景點，咁夜仲有「下一景點」？點解呢？下回分解！