深圳機場 -> 烏魯木齊 -> 天山天池 -> 新疆國際大巴扎 ->
哈薩克族氈房家訪 -> 烏魯木齊市中心
到3月的時候，偶然經過旅行社，好想去下旅行relax一下，睇下有無d平平地的團可以報，於是就嘗試去「隔下價」！我地又想去d特色團，又要平平地，一睇「花花」旅行社有個旅行團，幾岩我地的要求，再了解下，嘩！真係平！團費加稅及保險費，都只係港幣$6,300左右，絲綢之路九天航空團！抵！雖然要響深圳機場上機，我地都覺得方便呀！好，一於平平地玩下先！
我地響上午約十點於香港尖沙咀集合，「花花」安排旅遊車接載我地去深圳，當然先要過關啦！去到深圳機場，等左一陣，下午二點半登機，搭中國東方航空CZ9304班機，飛15:10去烏魯木齊，去到烏魯木齊已經係夜晚喇！之後梗係番酒店休息啦！我地住海德大酒店，都係「大陸五星級」的！
第二朝，一早起身，出發！今日第一景點係天山天池，但由烏魯木齊去天山都要個幾兩個鐘頭，都ok啦！但我老婆就極興奮，因為佢好想去新疆睇自然景觀！
上午十點左右，到達中途站，休息一陣先！
再過大半個鐘頭，終於到達天山天池！由於天氣寒冷，天池湖面都結冰！另有一番風味！一定要影番張相先！
睇下天池！何其壯觀！天池上可騎馬！好試試先！
睇下幾咁「英」！
我好鐘意天池結冰的樣子！好浪漫的！
響天池附近有好多著新疆民族服的小朋友，應該係同旅客影相的！睇下左面的女孩就知道有幾凍啦！
過左四十五分鐘，要落山喇！又要搭好耐車喇！
起初我地以為新疆好荒蕪，原來都有公路的！
好，中午時份，食午飯後，去第二景點 --- 新疆國際大巴扎！嘩！眼前一亮！靚！
好有特色的塔！
入到大巴扎，見到商店所售賣的，都唔係好岩我地style，行左一陣就算喇！見到有賣各種香料的，影張相先！
好，行左一個鐘，又出發！沿途經過天山山脈，真係好靚！
下一景點係哈薩克族氈房家訪，其實都唔知去左邊！
落左車經過一條小河．．．
到達一個類似蒙古包的物體，就係哈薩克族的氈房喇！
哈薩克族氈房裡有好多小食的，但都幾「熱氣」！
參觀左一陣，我地都係想出外睇下風景，所以只係聽左一陣講解就算喇！
雖然已經係四月，但係山上仍然處處是雪，好浪漫的感覺！
好，又要離開了！睇到的景色好靚，老婆又要我影相！
旅遊車不時要停車，原來要俾班「羊咩」經過！睇下佢地幾得意！
番到烏魯木齊市中心，已經係下午七點！睇下個天仲係好光猛呀！
從海德大酒店的房間望落下面的廣場，真係有好多人呀！究竟佢地做乜呢？
我地都落去睇下，原來好多人響廣場放風箏！
響酒店食晚飯後，我地決定出外行下。由於我地都擔心新疆的治安，我地都唔想行得太遠，就響廣場附近的大街行。無意中俾我地發現左一檔露天的燒羊肉店，嘩！一定要試！新疆羊肉咁出名！
嘩！一串都只係人仔四蚊！抵！當然要俾我老婆試味先！佢一食，d羊肉的汁「飛濺」出來！超超超超級好食！
響新疆有好多食店係「清真」的，連蛋糕店都有「清真」的！勁！
食完羊肉，行左一陣，終於見到小小日落喇！但已經係下午八點半喇！
好，今日行程都算豐富，明天繼續！
沒有留言:
張貼留言