日本和歌山淡路島深度遊の第二天

大阪 -> 明石大橋 -> 福良 -> 大嗚門橋海中旋渦 ->

灘黑岩水仙鄉 -> 福良 -> 神戶 -> 大阪心齋橋

經過尋晚叉電，今日大家都幾精神。今日行程以淡路島為主，唔係好遠，行程應該比較輕鬆的。但今天實在有太多「意外」！

由大阪去明石大橋大概一小時車程，但在高速公路竟然塞車，因為交通意外加上工程關係，車程多左一倍！去到明石大橋已經係上午十一點。

老婆好想去大嗚門橋睇海中旋渦，而大潮時間係下午一點四十分，我地見仲有時間，想先去另一景點 --- 灘黑岩水仙鄉。途經路旁的產物店，mammy買左一袋柑同一包洋蔥，我地返到香港試過用洋蔥炒牛肉，d洋蔥真係好好食、好甜的！同大陸洋蔥好大分別！

到達灘黑岩水仙鄉已經係中午十二點，但見到d人要將車泊在露天停車場，再轉搭接駁巴士上山，排隊的人甚多！老婆開始焦急，因為好驚上得去水仙鄉，就錯過睇海中旋渦的最佳時機。我地就立即上車，打算駕車到嗚門公園附近乘搭觀光船。

駕車到福良附近，daddy話有觀光船到大嗚門橋睇海中旋渦，我地當時都唔知點算，好啦！試下博一博！

到達福良已經下午一點，我地都擔心無觀光船搭，好彩有班船開下午一點半，但要二千円！超貴！無辦法啦！焗住要買觀光船票了！

剩番半小時就上船，我地打算在碼頭附近的店舖食午飯，點知買完個關東煮，等個燒鰻魚飯等左二十分鐘都仲未得，真係極之心急！未食就已經走左，番碼頭排隊！

我地就係搭呢架「日本丸」號觀賞海中旋渦。

終於開船，老婆好期待睇海中旋渦！

天色暗暗，見到大嗚門橋都係灰朦朦。

遠睇大嗚門橋，海面平靜。

到大橋附近，開始見到「白頭浪」，其實係海中旋渦來的！

海中旋渦有大有細，有d一排排的！

近鏡真係睇到旋渦！到達大橋的另一邊，好似一排海浪湧來！

橋邊的海中旋渦十分明顯！

番入船艙，見到電視播放海中旋渦形成的原因。

終於參觀完，時間已經係下午兩點半。本來老婆好想去大嗚門橋，從橋上向下望海中旋渦，但我地知道mammy好想去睇水仙花，但我地知道由福良駕車到水仙鄉，已經無接駁巴士乘搭，於是每人又俾多一千五百円，由福良搭接駁巴士到水仙鄉，超貴！

其實老婆睇到海中旋渦，但都有d失望，一來覺得太貴，二來覺得時間太趕，無乜心情欣賞。而我就覺得天氣唔好，影相效果唔靚。我應承老婆，日後會再到大嗚門橋睇海中旋渦的！佢先有d安慰！

到達灘黑岩水仙鄉已經係下午三點半，我見到有好多人駕車進入水仙鄉山下的停車場，我地再一次笨了！

幸而水仙鄉的景色好靚，mammy一見到植物就開心哂！

成個山頭都係水仙花，好香！

到達山上的觀景台，除左水仙，仲有梅花。

有紅色的梅花，仲有白色的！影幾張梅花特寫先！

真係有好多水仙花的！整個山頭都有！

由山下各上望的景色，另有一番韻味！

參觀約一小時，約下午四點半開始日落了！

坐接駁巴士由水仙鄉返福良，日落的景色好美！

雖然今日遇到好多唔如意的事情，突發的事亦好多，但見到咁靚的日落景，心情都好d！希望明天的日落一樣咁靚，因為聽日會去一個景點睇日落，好特別的！

睇完日落，正當大家想返大阪之際，mammy話未去過神戶，好，let's go！

去到神戶最重要的係食晚餐，我地都未試過在神戶食牛柳，一於試試！

入到餐廳，每人order左一份神戶牛柳定食，yummy！超好味！

飯後梗係要行下Mosaic Garden同Shopping啦！

當然唔少得欣賞神戶的夜景啦！

大家都累了，想駕車返酒店休息。經過停車場，見到六、七十年代的老爺甲蟲車，嘩！大開眼界！

夜間由神戶返大阪車輛較少，我地選擇唔上高速，平d呀！另外我地好鍾意返酒店時在車上同daddy mammy聊天，好舒服的感覺！

返到大阪，mammy話有d肚餓，我贊成去心齋橋食拉麵！我地將車放在停車場，daddy先番酒店休息，mammy、我同老婆三個去心齋橋搵麵食！

已經係晚上十點半，心齋橋仍然有好多「潮男索女」！

上次試過金龍麻麻地，今次試下對面的四天王先！

我同老婆都覺得一般！

食飽飽，途經cd店，竟然見到正門大賣的係 --- 少女時代 Girls Generation！韓風正面吹襲日本呀！

今日總算ok啦！我真希望聽日天色會晴朗，可以睇到日落啦！