青森秋田過祭溫泉遊の第一天

前言

今個暑假小miumo 又去日本。今次又選擇日本的最東北面---青森及秋田縣。點解﹖因為好想再一次去日本東北睇好出名的夏祭、浸好出名的溫泉及食好好味的水果。好，小miumo又出發了。

香港 ---> 東京成田機場 ---> 池袋

我哋坐早上09:10的國泰機 CX 504 (雖然之前講過以後都唔坐國泰，但無辦法啦，我哋有張往東京的機票係用亞洲萬里通的積分換返來。另外有新消息，日航及全日空往羽田的零晨機將會取消，取而代之國泰先有零晨機坐，將來往日本各地要早機去晚機返，只可坐國泰了。)，到下午14:35便到了東京的成田機場。我哋已經有五年無來過呢個機場了。

到機場第一時間去換JR East Pass。我哋先響香港日航天地買Pass，20,000円便可選擇任何4日在東日本任坐JR及新幹線。這個Pass最好係能夠在香港網上訂新幹線去東北及機場往巿區的指定席位，如果無訂位，祭期往青森，分分鐘坐新幹線是無指定席坐，若自由席無位，企足3個鐘就好慘。最後完了成過旅程後，發現這個Pass真係好抵。

出發前已知道日本各地受熱浪影響，哇，看到連東北都有成33、34度，真係好熱。不過我老公話寧願熱好過落雨，咁我都覺得係.....

今晚我哋選擇響池袋落腳，第二朝早先坐新幹線去東北。酒店﹖當然係選擇我哋的御用酒店---東橫Inn。

第一日先響池袋周圍行，完成幫家姐買b袋的任務。係日本買b袋，就算在日元高企的情況下，都係香港的7折。

行到一間商場，發現有宮崎峻腳本的新戲繪畫展 (後來先知道，戲名叫「借東西の小矮人亞莉亞蒂」)，當然要去睇下啦。

仲有好多這套劇的精品買。

不幸地係香港推行李時扭傷隻腳，到夜晚真係好痛，感恩第一日可以係東京買藥，如果唔係餘下的旅程不知點算好。

夜晚又食我哋的食堂---松屋。抵食兼好味的定食。

我老公到東京的另一個任務是買小型的空氣清新機。佢話響Bic Camera買比網上買平好多，仲可以退稅。

我老公話係日本買i-Pad係貴過響香港買好多。

明天我哋就坐新幹線上東北了。