一家大細遊台北の第三天及第四天

西門町 -> 大溪花海農場 -> 陽明山 -> 淡水

西門町 -> 地下街 -> 龍山寺

經過尋日的「奇妙旅程」，今日去番上年我地去過的大溪花海農場。外母、阿姨、表妹、家姐同媽子都好鍾意花，大溪農場就啱佢地喇！

今次我地選擇租一架八人車，由酒店直接開往大溪，經過兩個鍾頭的車程，到達大溪花海農場，「團友」都十分鍾意，因為d花真係好靚！但外父就有d心不在焉，可能掛住釣魚！

因為去年到大溪花海農場係四月，花的種類較多，花亦開得較燦爛，但今次係農曆新年二月份，有部分花未開，所以有少少失色。不過團友都覺得OK就夠了！

睇下我老婆影的相片，就知佢無上次咁興奮了！

今次最大驚喜的，就係見到呢隻黑山羊，上次都見唔到佢！係咪好可愛呢？！

上次同今次都無坐呢架觀光車，因為我地鍾意行下山，好relax的！

臨走前響門口見到我老婆最鍾意的鬱金香，當然要影下啦！

專程去大溪花海農場，長途拔涉，但d花又唔係開得好靚，有d失望添！

跟住去下一景點 --- 陽明山。但阿媽子突然話好唔舒服，我見佢塊面都青哂，梗係要送佢番酒店休息下啦！跟住我地再開車去陽明山。

其實當日係陽明山花季，應該可以睇到好多花的，不過最大問題係塞車同人好多，所以減少左我地的興緻！外父又唔鍾意人多，阿姨同表妹又有d唔舒服，心情都有d影響！

唯一開心的就係響陽明山見到好多櫻花囉！

我老婆就好鍾意喇！

行左大半小時，因為大家都累，決定離開陽明山去下一站 --- 淡水。去到淡水已經係黃昏了，上次我同老婆去淡水已經係六年前喇！今次仲要係黃昏時間去淡水，覺得特別靚，淡水的日落真係一絕！正！

我地都一對對影相，因為大家都被淡水的日落吸引了！

行淡水，指定動作梗係買手信同食小食啦！相就無影喇！推介？D旅遊書有大把啦！唔寫喇！

番到西門町已經係晚上八點半，晚飯梗係要試麻辣火鍋啦！

我地揀左酒店附近的「天外天火鍋店」，因為都有網友推介的！火鍋材料係自助形式，我地就狂攞野食，睇下張相，D野食只係show左十分之一咋！最重要係：七個人總共食左新台幣2500元，即約港幣六百元，勁抵！

得知媽子的情況好左好多，佢自己已經識落酒店搵好野食，我地都無咁擔心。

好，食飽過後又整杯苦瓜汁先！

第四日的行程我無乜影相，所以就唔寫太多了！

至於行程？！去行地下街啦、去龍山寺啦，行下西門町的商場同地舖掃平貨啦！真係無乜特別！

我地搭港龍KA483，飛20:25，約晚上十點番到香港喇！



後記：

我地好鍾意同屋企人一齊去旅行的，一來大家可以傾多D，了解多D，
另外，幾難得一家人可以咁relax吖！所以我地都好珍惜同家人相處的機會，你呢？