小MiuMo遊世界: 泰國曼谷自由行の第一天及第二天

2006年8月1日星期二

泰國曼谷自由行の第一天及第二天

SuperRich 兌換店 -> Emporium商場 -> Asia Herb Association Spa ->

Sukhumvit 娥姐泰國菜 -> Suan Lum Night Bazaar

我同老婆去過台灣、韓國、澳洲同日本，我話想試下去泰國，但我老婆話之前去過曼谷芭提雅，話一d都唔好玩，所以遲遲無行動。直至最近興泰國自由行，我老婆又想去泰國買特色民俗衫，所以就決定去曼谷自由行。

嘩！曼谷的機票十分平，包稅都只係$1780，抵！今次我地坐阿聯酋航空 EK385，飛香港時間8月1日22:25，到達曼谷已經係8月2日12:30喇！我地趕快搭的士去我地的apartment --- Urban House ，快快訓覺先！

曼谷同香港有時差一個鐘頭，第二朝約八點起床，影影apartment個門口先！點解我地會住呢間apartment，因為平、又大間、交通又方便囉！每晚 1,350 Baht ，即港幣 $280，超抵！

唔好以為平野無好呀！錯！其實我地間房真係好正好正，有廚房仔啦！

有大大張的梳化！

仲有六尺的大床！超級犀利！港幣三百元唔駛囉！勁抵！

我地要落地下的小型客廳食早餐，早餐亦係簡單的麵包同生果。

好喇！真係出發喇！第一次去泰國，感覺好新鮮！曼谷的BTS都幾方便的！

我地去的第一站，係去 ChitLom 站的 SuperRich 兌換泰銖，比出面換多小小的！今次個rate係 4.84 呀！正！

響 ChitLom 附近行左一陣商店，就去左Phrom Phong 的 Emporium商場。

行下行下，去左六樓的泰國創意設計中心 (TCDC) ，裡面好似個圖書館咁！其實佢係一間設計中心，係世界第四座發明原料資源中心 Material ConneXion，不過我地就唔係好識貨，行左一陣就走喇！

肚仔餓餓，去Fuji食日本野先！個魚生飯同個玉子好好味！

食飽飽，去預約左的地方做 Spa 喇！我咁大個仔都係第一次做 spa 咋！呢間叫 Asia Herb Association 的 spa，係日本人開的！專以泰式草藥球為客人按摩的！我地join左個Package 叫 Asia Perfect for Body，共兩個半鐘頭，有泰式草藥球按摩30分鐘、按摩60分鐘及推油60分鐘，我同老婆都話舒服到震！正！