日本東京自由行の第三天

名古屋愛知縣世界博覽會

原先今日想去迪士尼，但去昨日去買飛時，突然更想去一個地方，於是我同老婆就「膽粗粗」決定去了！究竟有乜地方吸引過迪士尼呢？就係 --- 名古屋愛知縣世界博覽會！

世界博覽會每五年舉辦一次，十分難得，今次適逢響日本舉辦，仲要係響名古屋，一場來到東京，無理由唔去的，係咪先？！我地本來都想響香港訂定飛去世博，但係一來唔識，二來好似好麻煩，來日本之前已經話唔去的。但尋日睇下睇下，世博原來有好多野睇，我同老婆又覺得一場來到，唔去就好笨！所以決定搭新幹線去名古屋去世博。

今早5點左右就起床，原因係今晚要住另一間酒店，要離開池袋 Tokyo Sunshine City Prince Hotel，所以先要退房，再去距離五分鐘的另一間酒店 --- 池袋 Theatre Hotel放低行李先！放低行李後，再搭JR去東京站搭新幹線去名古屋。其實我地知道新幹線係好快的，但係我地都無諗過響今次搭！好，出發喇！我地搭上午6:40的新幹線，上車前影番張相留念啦！

新幹線真係好快、好靜，完全唔覺得自己響火車上！轉眼間，約1小時45分左右，我地已經到達名古屋喇！一出名古屋站，就有路牌指示我地去邊個出口轉乘JR中央本線去愛知萬博八草站，係7號及8號閘口呀！當時真係有好多人去世博的！ 

 
我地就係轉搭呢架車去愛知世博，車上超多人！

去到愛知萬博八草站，仲要轉乘磁懸浮列車先到達世博會場的！勁多人排隊，剩係排隊都大半個鐘！

好喇！千辛萬苦，終於來到世博的入口喇！但都已經上午十點喇！
今屆的世博主題名稱係「愛．地球博」，主題係「自然的睿智」，即係叫我地地球人反省，為下一代著想，要努力謀求地球上所有生物的可持續性發展與共生，而今屆亦強調地球村的重要性。好，我地極期待！出發！

入口有兩隻世博吉祥物，我地都好鍾意佢地，係叫做「森林爺爺」同「森林小子」，好Cute！

入到場館，真係十分大，就算有地圖都好難認路！

會場共有6個全球共同展區，每展區有不同國家的展館；另外仲有兩個企業展區，有不同企業介紹如何推動環保；仲有中心展區、日本展區、娛樂和文化區、森林感動區等！勁多野睇！場館中有纜車，仲可以搭纜車去瀨戶場館添！

入到去，見有d肚餓，食左野先！好豐富的午餐呀！有肉醬意粉兩碟、咖哩牛肉飯、仲有中式點心添！Yummy！

好，食飽了！一出來響北口附近，見到呢架 Global Tram 環路電車，可乘列車遊覽全個會場，我地都想坐，但肯定有好多人等！算罷！行啦！

兩人展館： 豐田展館同日立展館。睇下出面有幾多人排隊就知幾犀利！豐田展館主要係由智能機械人組成的樂隊表演，而日立展館主要展示現在地球上頻臨絕種的生物，透過3D影像展示，鼓勵人愛惜地球。

煤氣展館的外形好特別，雖然參觀的人唔係十分多，但係我同老婆都唔想入去住，因為我地想去一個好特別的展館，個展館係全場的焦點來的！

世博有好多國家同地區參加，睇下d國旗就知啦！

Global House 全球之家響中心展區，亦係全場的焦點，展館以「了解地球．愛護地球 --- 我們地球的故事」為主題，透過學習地球與人類的歷史，觀看地球的美。

我地由中午12點開始排隊，原來已經有成二三百人排緊隊！點呀！都唔知排唔排添！想想下，既然來到，梗係要參觀下呢一個標誌性的場館啦！好！一於排隊！

我同老婆都唔鍾意排隊，但日本人真係好有文化，好守規矩，排隊亦好有秩序！佢地唔會打尖，會好安靜咁排隊！真係令我同老婆大開眼界！排左一陣，我地前面同後面的日本人同我地傾計添！佢地知我地係香港來的，仲請我地食小食添！日本的人真係超好的！

我排左一小時左右，覺得唔好浪費時間，就響附近影下相，睇下「森林爺爺」同「森林小子」幾得意！

好喇！排左接近兩個鐘，成下午兩點喇！我老婆開始發脾氣喇！正當我地想放棄之際，條隊開始郁，前面好似入得去喇！好野！

但係行下行下，響我地前面的唔係入展館，而係取入場卷！好，派到我地，入場時間係下午三點二十分，即係仲有個幾鐘！好，行下先！

呢塊叫做「生命之牆」，全長150米、高15米，牆上種滿植物！

我老婆咁鍾意花，同老婆影番張相先！

廣場上的燈係由太陽能板及風能提供電力的，超先進！

行左一陣，到入Global House的時間，又要排隊！先去睇一個高清影視系統，然後就入到呢個房間繼續欣賞電影！

當我地入到呢個房，先知道呢個屏幕唔係戲院見到的屏幕！呢個係全球最大的LCD無繨屏幕，闊150米，高10米！屏幕係2005英寸的！嘩！睇到眼都凸埋！

影片播放，簡直係無得頂！d畫面質素真係勁靚！

下面有小小紅紅地、白白地的係門口，可以想像到個屏幕有幾大喇！

影片係介紹地球的演變，好精彩！睇完全球最大的LCD無繨屏幕，要離開喇！我有d唔捨得添！

本以為要走，點知仲有一樣「珍品」未參觀！我地要參觀在俄羅斯發現的長毛象化石！係真品來的！超超超珍貴！

參觀完Global House，我同老婆十分滿足，因為我地最想睇的已完成，再參觀一下其他的展館啦！呢個係日本汽車工業會的展館，個摩天輪十分多人排隊玩！

呢架係無人駕駛的巴士。巴士用天然氣作燃料，是沿軌道行走會場的！勁！

我地入左其中一個展館，裡面展示好多種機械人，包括清潔車！

機械人Wakamaru係一個識帶路的機械人，我叫老婆影張相先！

機械人介紹員，好似Reception咁！

機械海獅！識以表情表達的！好得意！

Robot Station --- 集中展示機械人的地方

好，睇完機械人，出來睇下有乜手信同紀念品，有「森林爺爺」同「森林小子」的餅乾賣！

行到下午四點半左右，天開始黑了！見到摩天輪同日落構成的畫面，好靚！

之後我地入左一間展館，我地都唔記得展示d乜野，只係見到桌上有一張大紙，俾人寫上愛護地球的訊息。我老婆身為地理人，一定會響紙上寫野啦！

「我來自HK的，各地球的人都希望環境受到保護哦！」

玩到五點幾，差不多走了，臨走前去到JR東海磁浮列車館，見到世界上最高速的載人列車 --- 每小時581公里！

真係要走喇！臨走前響「森林爺爺」同「森林小子」前影張相留念先！

我地買多一陣紀念品就走喇！大概下午六點左右，我地坐磁懸浮列車到愛知萬博八草站，再轉乘新幹線番東京。去到東京，都已經八點幾喇！肚仔餓喇！求其食碗拉麵先！

今日真係好難忘，超多野睇，又難得可以參觀世博，我估真係唔會有好多香港人參觀過喇！
OK，今晚住Theatre Hotel，又係房仔細細，咁攰應該好好訓的！