日本東京自由行の第一天

成田空港 -> 池袋

自01年的台灣自由行開始，我地倆公婆去過的地方雖然唔多 --- 亞洲的有台灣、韓國、上海；比較特別的有渡蜜月去澳洲、同04年去絲綢之路，但我地總係未試過去日本；仲有，五次旅行中只有台灣係自由行，其他地方都係跟團；加上過往我老婆對日本印象唔多，又覺得唔識日文好難同日本人溝通，我地對去日本都有d保留。

但有一次我同老婆的同事傾談間，話去日本旅行係好好玩的。日本係一個好有吸引力的國家，又多野睇、又多野玩、d野又好食，最重要的係d人好好、好有禮貌，話我地去過一次，一定會鍾意同上癮的！講到咁好，搞到我地心郁郁，好啦，今次plan去日本啦！

好喇，今次第一次去日本，當然想以去東京為主啦！睇過哂d旅行社的plan，全部都唔係好岩我地口味，考慮左好耐，又唔想去一d自己唔鍾意的地方，更想挑戰一下自己的膽量，好啦，一於自由行，自己plan！

經過約三個月的資料搜集同計劃，買左一兩本旅遊書，終於出發了！我地響旅行社book package，包兩晚酒店，坐國泰CX 504航班，飛0910，到東京成田機場係1425，好野！終於去日本喇！

對於日本，我同老婆感覺好新鮮，睇電視介紹就睇得多，自己第一次去日本都有d緊張添！
由落機開始，我地開始接觸日本文化，覺得d日本人好有禮貌，我地乜都唔識，要去counter問路，嘩！counter職員真係服務周到，真係比香港的counter職員好好多！

我地響成田空港坐 skyliner 去日暮里站，再轉 JR 山手線去池袋，比坐 NEX 平成千円的！
從列車望出窗外，樣樣都好新鮮同好奇，點解日本d屋咁得意、咁矮？點解條鐵路同d屋的距離咁近？東京唔係應該有好多高樓大廈嗎？點解同想像中有d分別的？真係「大鄉里出城」！

到達 JR 日暮里站，終於感覺到日本人繁盛的一面！人多、步伐急，我地轉車去山手線都搵左一排！不過在 JR 車站真係好深體驗，日本d車站好特別，當列車將要到達時，會聽到一段音樂，每個車站應該唔同的，係用來提醒搭客列車到了！我地兩個大鄉里，真係覺得好新鮮！

兜兜轉轉，搵左好耐，終於到達今晚入住的酒店 --- 池袋 Tokyo Sunshine City Prince Hotel。 

我地都知日本酒店d房間出名細間，一入到房，嘩！真係好細！不過好乾淨，我老婆好鍾意！放低行李，老婆話要去廁所，突然老婆大叫「嘩」，我當然問佢乜野事，係咪有意外啦！佢話個廁所板識發熱的，坐響度好舒服！去完廁所仲可以「洗 Pat Pat」，好正！不過老婆話d水射上黎好痕，唔係好習慣！我梗係又試下啦！試完之後，我地話要番香港搵下有無，買番個「享受」下先！

兩個「大鄉里」研究完廁所，係時候出去食飯喇！響日本第一次行街，感覺真係好特別同新鮮，樣樣野都去睇下，間間店舖都想入去，仲有日本的街道都好特色，我當然要同老婆影相留念啦！

街上有好多間食店，其實我地都唔知邊間好味，不過響日本第一餐，梗係要食壽司啦！好，就試下呢間啦！136円一碟，Yen 係 七算，即係港幣$9.5 一碟！嘩！平到呢！好，呢間就係我地響日本的第一餐喇！幾咁榮幸！

日本的第一碟壽司，梗係要影張相紀念啦！老婆，笑！

我地終於見識過日本的壽司，一個字去形容：正！唔知係咪心理作用，d壽司真係好味好多，鮮味好多，我地食左接近二十碟，都好似唔願收手！

好喇！飽飽喇！響池袋行下街先！其實任何店舖都成為我影相的景點，因為實在太好奇喇！手提電話店都影一大餐！

我老婆就好鍾意呢間花店，間花店響 JR 池袋站裡面，d花好靚，吸引唔少人買的！

我老婆最鍾意d花唔大束，小小地，幾有特色！包裝又靚，唔怪得日本d野咁吸引人啦，包裝都落左唔少心機！我老婆真係大開眼界！

JR 池袋站係一個大站，夜晚七點，好多人放工！好熱鬧！我地見到上面個鐵路圖都頭痕，因為聽日買車票都係一個考驗！

站內有好多店舖，其中最最最特別的，就係竟然有食店！我地頭先岩岩食完壽司，我老婆就急不及待要試下日本的蕎麥麵！佢超超超鍾意食麵的！佢話幾飽都一定要試！
我地買麵又見識多一樣野：呢度的麵唔係入店內order，而係好似汽水機咁，入錢落售票機，揀選自己想食的麵，出票同退款，完全不經人手！

其實我地真係唔知d麵係乜，求其啦！點知出左碗烏冬！

呢碗就係我地響日本的第一碗烏冬！我同老婆影完相，佢已經忍唔住喇！嘩！點解日本d野咁好食的！烏冬超煙韌，好好味！

行下行下，去到一間「遊戲機店」，入到去望，見知道唔係「機舖」......

係玩「彈波子機」！我都係偷偷地先影到呢張相，店內係唔俾影相的！

行左兩個鐘左右，累了，好，今晚係第一晚在日本瞓，希望有覺好瞓！