上野公園 -> 淺草雷門 -> 台場 -> 台場海濱公園 -> 富士電視總部大廈
尋晚係第一晚響日本訓，但係經歷唔好！訓唔到！
間房原來好「應聲」，我地成日都聽到d人出出入入間房，d人講野又大聲，成三點幾四點仲響間房飲啤酒同大大聲傾計，我老婆終於頂唔順，過左隔離房叫佢地收聲！我問老婆：你識得用日文叫佢地靜d咩？佢話：無呀，我用廣東話鬧佢地，有兩三個日本後生仔傾計，一開門見到我老婆起勢鬧，雖然唔知我老婆講乜，但咁夜鬧佢都知發生乜野事啦！之後我地先有三四個鐘頭訓咋！
估唔到第一晚會係咁渡過！慘慘！
算啦！雖然今日有好多行程，但我地都好累，成上午十點先至出發！
第一站係去上野公園睇櫻花，我同老婆都好期待，因為咁大個未試過睇櫻花，真係好期待的！
今早搭 JR 一程就可以到達，真係覺得日本的交通好方便！
落車就見到佢 --- 史迪仔，人氣 No. 1 ！JR站的店舖內有勁多有關史迪仔d野賣，我老婆咁鍾意史迪仔，梗係入左d貨啦！
離開 JR 站，響去上野公園的馬路見到個行人過路燈，好特別，點解隔離有個「漏斗」呢？原來佢係用來提醒仲有幾多時間俾行人過馬路，好似依家就剩下兩格就轉燈喇！就快可以過馬路！我地又見到一個響香港極少見的情況：日本人過馬路真係好守規，真係紅燈公仔就企定定，就算無車都唔過馬路，等綠燈先至過！真係抵讚！日本的公民教育真係好好！
好喇，終於到達上野公園！我地好開心同感恩，因為個天真係好藍、好靚！我地都好期待睇櫻花！
終於有喇！有好多櫻花呀！好靚！第一次睇櫻花，同至愛一齊睇，更加浪漫！
我地成日以為d櫻花係粉紅色，原來有好多品種的，有深棗紅色的有粉紅色，靚！
我地見到d櫻花，開心到不得了，其實小小的事都可以令自己滿足的！
淡粉紅的櫻花好特別，我部「傻瓜機」好難先至影到咁近同咁靚的相！
其實d櫻花都開得七七八八，有好多都已經落左，我地仲仍然見到，都好感恩！睇下呢條出名的「櫻花大道」，如果櫻花盛開時，我幻想真係好會好靚的！好，我同老婆講，我地一定會再來日本睇櫻花！
櫻花大道旁掛左好多燈，好有特色，我同老婆拖住響大道行，真係覺得好滿足！
行左大半個鐘，想走之際，我老婆見到隻狗仔，超級得意！睇下佢幾咁精靈！
好，又到午餐的時候！我地仲係好回味尋晚的壽司，好，今早再食多一餐！行下行下，見到有間126円一碟的壽司店，仲要係有人推介呢間好好味，唔駛想，立即入去先！我地掛住食，都無影低d相，總之一句講哂：好正！d海膽鮮到呢！吞拿魚好正！墨魚啦、三文魚啦 ....... 太多太多，好好味！仲有佢d Wasabi 係新鮮即磨的，唔似得香港的無鮮味！食到我同老婆耳仔都郁郁！Yummy！
離開上野前，買些手信先！
好，食飽飯，去第二站 --- 淺草雷門。雷門實在有好多人，好難先行到幾步咋！
雷門入淺草寺的兩旁有好多攤擋，好多野賣，仲好多人，我地要五分鐘的路，要行左二十分鐘呀！
無錯！係二十分鐘，愈入愈多人，愈入愈難行！
終於入到淺草寺的範圍，見到五重塔了！
呢d大燈籠叫做「大提灯」，係淺草寺同雷門的標誌，好多人專程影呢幾個燈籠 --- 到此一遊！
終於影到淺草寺喇！
我同老婆見到好多日本人，響呢d架上綁住紙條，起初真係唔知佢地做乜，睇下睇下先知，原來佢地將自己的心願寫低，然後綁響架上！
影完相，我地出番去搭 JR 喇！出去時見到好多野賣，其中我地肚餓，買左幾個燒餅食，好好味！
我地下一站係去旅遊中心買廸士尼入場卷，原本想買聽日的門票，但入去之後發現仲有一個地方更吸引，好！去廸士尼等到後日先去，聽日就去一個好特別的地方！
好，去下一景點喇！順路去台場！去到都已經天黑喇！入左Decks Tokyo Beach，去特別參觀「台場小香港」，都幾似翻左香港添！
裡面有一條叫「台場一丁目商店街」，有好多店舖賣唔同的野，我老婆就最鍾意呢間，因為呢間係賣泰國同印度民俗服飾的，係我老婆杯茶！
我地響「小香港」留左好耐呢！
點解Panasonic松下電器燈箱會咁大個呢？係唔係「小香港」係由Panasonic贊助的？
估唔到呢處有中華料理食，當然我地唔會試啦！響香港都成日食啦！唔駛響日本食囉！
呢間就係我的favourite！可口可樂專門店！正！睇到簡直如獲至寶啦！
個個鐵牌都想買，點算？！
d鐘響香港無的！不過都幾貴的！
我兒時的小玩意 --- 搖搖！我細個都儲左幾個，不過都舊舊地，想買番幾個添！
好，掃完一輪貨，去可口可樂專門店對面的Snoopy專門店。亦係我的favoutire！
行左一陣，出去外面的台場海濱公園行下！公園好寧靜、好舒服，我仲一次過影左台場「自由之女神」像、彩虹橋、同遠望東京鐵塔的景色，我超鍾意呢張相的！
好喇，參不多走喇！臨走前響富士電視總部大廈影多張相先！最特別建築物中間的「波波」，識變色的！
好，今日都去左好多地方，聽日我地會去一個附加景點，會去成日的！仲要好早出發，今晚都係唔玩咁夜喇！早d訓先！
沒有留言:
張貼留言