日本東京自由行の第一天

成田空港 -> 池袋

自01年的台灣自由行開始，我地倆公婆去過的地方雖然唔多 --- 亞洲的有台灣、韓國、上海；比較特別的有渡蜜月去澳洲、同04年去絲綢之路，但我地總係未試過去日本；仲有，五次旅行中只有台灣係自由行，其他地方都係跟團；加上過往我老婆對日本印象唔多，又覺得唔識日文好難同日本人溝通，我地對去日本都有d保留。

但有一次我同老婆的同事傾談間，話去日本旅行係好好玩的。日本係一個好有吸引力的國家，又多野睇、又多野玩、d野又好食，最重要的係d人好好、好有禮貌，話我地去過一次，一定會鍾意同上癮的！講到咁好，搞到我地心郁郁，好啦，今次plan去日本啦！

好喇，今次第一次去日本，當然想以去東京為主啦！睇過哂d旅行社的plan，全部都唔係好岩我地口味，考慮左好耐，又唔想去一d自己唔鍾意的地方，更想挑戰一下自己的膽量，好啦，一於自由行，自己plan！

經過約三個月的資料搜集同計劃，買左一兩本旅遊書，終於出發了！我地響旅行社book package，包兩晚酒店，坐國泰CX 504航班，飛0910，到東京成田機場係1425，好野！終於去日本喇！

對於日本，我同老婆感覺好新鮮，睇電視介紹就睇得多，自己第一次去日本都有d緊張添！
由落機開始，我地開始接觸日本文化，覺得d日本人好有禮貌，我地乜都唔識，要去counter問路，嘩！counter職員真係服務周到，真係比香港的counter職員好好多！

我地響成田空港坐 skyliner 去日暮里站，再轉 JR 山手線去池袋，比坐 NEX 平成千円的！
從列車望出窗外，樣樣都好新鮮同好奇，點解日本d屋咁得意、咁矮？點解條鐵路同d屋的距離咁近？東京唔係應該有好多高樓大廈嗎？點解同想像中有d分別的？真係「大鄉里出城」！

到達 JR 日暮里站，終於感覺到日本人繁盛的一面！人多、步伐急，我地轉車去山手線都搵左一排！不過在 JR 車站真係好深體驗，日本d車站好特別，當列車將要到達時，會聽到一段音樂，每個車站應該唔同的，係用來提醒搭客列車到了！我地兩個大鄉里，真係覺得好新鮮！

兜兜轉轉，搵左好耐，終於到達今晚入住的酒店 --- 池袋 Tokyo Sunshine City Prince Hotel。 

我地都知日本酒店d房間出名細間，一入到房，嘩！真係好細！不過好乾淨，我老婆好鍾意！放低行李，老婆話要去廁所，突然老婆大叫「嘩」，我當然問佢乜野事，係咪有意外啦！佢話個廁所板識發熱的，坐響度好舒服！去完廁所仲可以「洗 Pat Pat」，好正！不過老婆話d水射上黎好痕，唔係好習慣！我梗係又試下啦！試完之後，我地話要番香港搵下有無，買番個「享受」下先！

兩個「大鄉里」研究完廁所，係時候出去食飯喇！響日本第一次行街，感覺真係好特別同新鮮，樣樣野都去睇下，間間店舖都想入去，仲有日本的街道都好特色，我當然要同老婆影相留念啦！

日本東京自由行の第二天

上野公園 -> 淺草雷門 -> 台場 -> 台場海濱公園 -> 富士電視總部大廈

尋晚係第一晚響日本訓，但係經歷唔好！訓唔到！

間房原來好「應聲」，我地成日都聽到d人出出入入間房，d人講野又大聲，成三點幾四點仲響間房飲啤酒同大大聲傾計，我老婆終於頂唔順，過左隔離房叫佢地收聲！我問老婆：你識得用日文叫佢地靜d咩？佢話：無呀，我用廣東話鬧佢地，有兩三個日本後生仔傾計，一開門見到我老婆起勢鬧，雖然唔知我老婆講乜，但咁夜鬧佢都知發生乜野事啦！之後我地先有三四個鐘頭訓咋！

估唔到第一晚會係咁渡過！慘慘！
算啦！雖然今日有好多行程，但我地都好累，成上午十點先至出發！

第一站係去上野公園睇櫻花，我同老婆都好期待，因為咁大個未試過睇櫻花，真係好期待的！
今早搭 JR 一程就可以到達，真係覺得日本的交通好方便！

 

 落車就見到佢 --- 史迪仔，人氣 No. 1 ！JR站的店舖內有勁多有關史迪仔d野賣，我老婆咁鍾意史迪仔，梗係入左d貨啦！

離開 JR 站，響去上野公園的馬路見到個行人過路燈，好特別，點解隔離有個「漏斗」呢？原來佢係用來提醒仲有幾多時間俾行人過馬路，好似依家就剩下兩格就轉燈喇！就快可以過馬路！我地又見到一個響香港極少見的情況：日本人過馬路真係好守規，真係紅燈公仔就企定定，就算無車都唔過馬路，等綠燈先至過！真係抵讚！日本的公民教育真係好好！

日本東京自由行の第三天

名古屋愛知縣世界博覽會

原先今日想去迪士尼，但去昨日去買飛時，突然更想去一個地方，於是我同老婆就「膽粗粗」決定去了！究竟有乜地方吸引過迪士尼呢？就係 --- 名古屋愛知縣世界博覽會！

世界博覽會每五年舉辦一次，十分難得，今次適逢響日本舉辦，仲要係響名古屋，一場來到東京，無理由唔去的，係咪先？！我地本來都想響香港訂定飛去世博，但係一來唔識，二來好似好麻煩，來日本之前已經話唔去的。但尋日睇下睇下，世博原來有好多野睇，我同老婆又覺得一場來到，唔去就好笨！所以決定搭新幹線去名古屋去世博。

今早5點左右就起床，原因係今晚要住另一間酒店，要離開池袋 Tokyo Sunshine City Prince Hotel，所以先要退房，再去距離五分鐘的另一間酒店 --- 池袋 Theatre Hotel放低行李先！放低行李後，再搭JR去東京站搭新幹線去名古屋。其實我地知道新幹線係好快的，但係我地都無諗過響今次搭！好，出發喇！我地搭上午6:40的新幹線，上車前影番張相留念啦！

新幹線真係好快、好靜，完全唔覺得自己響火車上！轉眼間，約1小時45分左右，我地已經到達名古屋喇！一出名古屋站，就有路牌指示我地去邊個出口轉乘JR中央本線去愛知萬博八草站，係7號及8號閘口呀！當時真係有好多人去世博的！ 

 
我地就係轉搭呢架車去愛知世博，車上超多人！

日本東京自由行の第四天

東京迪士尼樂園

尋晚十分好訓，一來好累，二來我同老婆都好鍾意間酒店，因為好靜，訓得好舒服！

今日終於去迪士尼喇！成日聽人講，日本個迪士尼有幾好幾好玩，我同老婆都期待的！搭JR 到東京，再轉去舞浜站，都幾遠的！

今日天晴，心情都靚d！由 JR 站行去入口，沿路都好多人，嘩！終於見到迪士尼喇！超開心！

入口有一個好大的花園，砌左隻米奇樣，十分可愛！門口有列車繞場一周，我地都係想行下玩下先，有時間先坐列車！

行左一陣，D 迪士尼人物就出來同遊客影相喇！我老婆先同 Piglet 影相，佢好開心呀！

日本東京自由行の第五天

築地市場 -> 原宿 -> 新宿 -> 池袋 -> 成田空港

尋晚十分好訓，因為真係好累！今朝又要早起，早上六點就起床，原因？為食囉！

一大清早，日本的街上無乜人，仲有d凍添！

 咁早搭去邊處呀？老婆話有好野益我！

我地響都營大江戶線築地市場站落車，老婆話築地市場好出名的！食魚生一流！

未食早餐，見到串燒，真係口水都流！

老婆見我咁肚餓，就去左呢間好出名的「玉子燒」專門店喇！

D玉子燒即叫即整的！

超級好味！正！

來到築地內市場的橫丁，好多商鋪同食店，花多眼亂，都唔知食邊間！

最後我地光顧左呢間，因為門口個介紹好吸引囉！睇落 D 魚生飯真係好好味！

呢碗係我老婆 Order 的，1250円，佢最鍾意食吞拿魚同海膽的！

我就叫左呢碗雜錦魚生飯，1000円，Yummy！

築地d人係駕駛呢d車出入的，呢d係小型運魚車，咪睇佢細細架，可以開得好快的！

食完魚生飯，梗係要睇下d魚生啦！嘩！超平！

響市場街道旁邊的食店，好有日式 Feel ！

嘩！見到日本出產的士多啤梨，真係好大粒，好新鮮！

響日本著名的「漬物」，原來有咁多種類的！

食左早餐，搭JR去下一站。我心血來潮，影低呢張相：搭電梯時日本人係企響左邊的，而右邊係被人趕時間「行」的！呢個同香港剛剛相反！

下一站我地去原宿，因為原宿有好多特色野賣！

去到原宿最出名的竹下通，上午十點半咋，已經好多人！

我同老婆終於見識到 Cosplay 服！一套都幾貴的！

我同老婆睇下衫，睇下公仔同精品，眨眼又個幾鐘！行到明治通，見到呢間 Kiddy Land ，又入去睇下先！

店內十分多卡通精品，其中梗係有我同老婆都鍾意的龍貓！

仲有姆明添！香港好少有佢d精品的！

當然唔少得就係我老婆近來的至愛 --- 史迪仔！

仲有我的至愛 --- Winnie the Pooh ！可能我響迪士尼見到太多Pooh Pooh的精品，今日不大驚喜！

行行下又去到另一間精品店，Snoopy Town！

我好鍾意呢個木架，好有特色！

真係全間店舖都只係賣 Snoopy 同 Woodstock ！

行左兩個鍾，最後要去東京的心臟 --- 新宿。可能我同老婆太累，去到新宿時見到咁多人，即刻無 Mood ！

見到有關愛知世博的鐘，影張相先！

我地只響新宿逗留左一個鐘就走喇！仲要只係去左無印良品買左個公事包俾細佬！其他地方一律無去！

好喇！終於上 JR 山手線返酒店取行李！我地專程上列車的第一卡，影下駕駛室同司機！

番到池袋 Theatre Hotel，取回行李，再搭JR去日暮里站，再轉skyliner去機場，搭 CX 504 班機飛1830，於2205返港！



睇下我地的戰利品！

後記：

今次我同老婆第一次日本自由行，真係好深印象：

第一次去一個言語不通的地方、無計劃之下膽粗粗去世博、第一次睇櫻花、第一次去迪士尼、見識了日本人的文化、日本的各樣事物都好新奇得意、日本的壽司同魚生真係超超超好味．．．

自從呢次我同老婆「膽粗粗」去日本自由行，我地覺得語言不通係唔緊要，最重要的係自己可唔可以放膽去睇呢個世界，行程係自己plan，又唔駛理人地咁多，最重要的是在日本旅行，又安全，d人又nice，又多野睇、多野玩，又有好野食！我和老婆都親身體會了同事的Comment：「你地去過一次日本，一定會鍾意同上癮的！」