阿聯酋杜拜探索之旅の第三天

杜拜 - > 杜拜博物館 - > 水上的士 Abra  - >  黃金街 - > 沙查市 - >

沙查考古博物館 - > 可蘭經紀念碑 - > Al Naboodah 特式大宅 - >

杜拜 Jumeirah 回教寺 - > 帆船酒店 (Burj Al Arab)

清早的杜拜都有三十幾度，真係好想跳落泳池游水，但最後都係冇游，得個睇字！

酒店外有一私人沙灘，我地決定一早出外行下，影下相！朝早的陽光已經好猛烈，但人不多，任我地點影都得！

帆船酒店下的小 Miu Mo！

地中海的海水都幾清澈，真係好想跳落去游！

沙灘回望的酒店外貌。

影完相，到杜拜市參觀。今日參觀的景點都幾多，先到碼頭欣賞杜拜市。

再到杜拜博物館參觀古杜拜文物．．．

之後去左搭水上的士 Abra ．．．

睇杜拜兩岸的建築物，唔夠五分鐘就落船。

行埋黃金街．．．

睇下金鋪d黃金有幾多幾閃．．．

真係閃得緊要！

呢件「黃金戰衣」要三十萬港幣，好貴！

行完杜拜，乘車到沙查市參觀，沿途都好似杜拜一樣 --- 塵土飛揚。

先到達沙查考古博物館，只可影外觀，內裡不可影相。

之後在車上外望回教寺．．．

及可蘭經紀念碑．．．

然後到 Al Naboodah 特式大宅，睇下阿拉伯人的傳統古宅特色．．．

但我地實在覺得太熱，無乜心情參觀，想好似呢兩隻貓仔，訓下覺便算！

參觀特色古宅後，到附近的店舖買紀念品，都算平的！

金造的哈利法塔．．．

金造的帆船酒店．．．我地梗係唔會買啦！

買完紀念品，返杜拜！途經 Jumeirah 回教寺，唔開放比人入，乘車經過便算。

咁趕行程，原因只有一個 --- 早d到今晚入住的酒店 check in --- 帆船酒店 (Burj Al Arab)！

未入帆船酒店前，我地對帆船酒店印象都幾好，覺得佢外觀好「型」，入到帆船酒店的第一印象，我地覺得職員好寸，唔係好理我地，而且酒店內有好多security睇住，好似驚住破壞酒店的設施及規矩，印象分大打折扣！

從酒店地下向上望，幾得意的，影下相都俾個 secur- 望住哂！酒店內係唔俾錄影，我地只係影相都唔得咩！何況依家d相機都已經 Full HD 錄影啦！點預防呀！

酒店大堂的嘖水池，其實都幾得意、幾多野睇的，但我地都無乜心情睇，唔鍾意俾人「管住哂」，一d自由都無！

住客係唔會係帆船酒店的大堂等check-in，而係等人帶入一間「標準房間」，讓職員講解一下房間的設備如何使用、房間規則、有d乜可以拿走、參觀酒店程序等。

聽完講解，每一間房都有一個職員帶我地上房，每層有個「管家」專責，事無大小可以問佢。其實我都幾期待入住帆船酒店，見識一下，但職員帶我地入到房間，第一件事係問我地攞信用卡落 Deposit 。

好喇！送走職員，係時候參觀一下帆船酒店房間喇！大門入口右邊的客廁．．．

大門入口左邊的樓梯，上二樓的套房．．．前面的華麗玄關位，超大！

進入玄關後右邊係書枱及 Mini Bar，

有手提電腦供應．．．

Bar 枱上有紅酒及各式飲品，任飲！(可惜我地一d都無飲過！)

過左bar枱，進入飯廳，生果任食！42" LCD電視，鍍金框架，金碧輝煌！

電視旁的梳化，夠六、七個人坐，落地玻璃外的海景，超讚！

酒店的小禮物，特色小食，可作紀念品送給人作手信。成三百港幣的！

梳化旁仲有兩大張梳化，全屋得兩個人，坐唔哂囉！

去番玄關上望，目到大吊燈．．．

沿樓梯上二樓，右邊便是洗手間，Hermes用品放在洗面盆附近了，任用，亦可拿走作手信！

呢set Hermes 唔平，港幣二千幾啦！

有按摩浴池．．．

仲有企缸．．．

出浴室右方有一衣帽間．．．

進入房間，左邊又有三張梳化．．．

梳化左面便是全海景落地玻璃，我地選擇了向西的房間，就是為了在房間睇日落！

床，係全間帆船酒店套房的敗筆！因為係由兩張單人床併合而成，根本唔係 Double Bed！

酒店仲有一紀念品 --- 帆船酒店環保袋！有錢都買唔到的！

帆船酒店套房短片

參觀完兩層高的套房，我地好想在日落前參觀位於二十七樓的餐廳及地下低層的海中餐廳。入lift影影d制，有阿拉伯文的數字。

出 Lift見到 Swarovski 出品的限量版帆船酒店水晶，成萬元港幣，貴！

下午五點至六點係二十七樓餐廳的開放時間，住客可以參觀的。但當我地想參觀時，職員好「禮貌」地問我地想去邊 (當中的語氣梗係．．．)，我地俾張門卡俾佢睇，話佢地知我地係住客，但佢地要叫我地果層的管家上來，才可以帶我地參觀。

等到管家來到，又只可以參觀左面的位置．．．

從這裡外望的風景的確不錯．．．



我地梗係要影番張相，證明來過帆船酒店啦！

之後我地參觀位於地下低層的海底餐廳，一樣驚喜。

參觀完餐廳，管家帶我地去十八樓參觀健身室及兒童活動室。兒童活動室內竟然有得玩桌球！

睇下幾grand！

參觀完畢！我地覺得要管家「帶住」來行，一d自由都無！唔鍾意！

返到房間，我同老婆坐在窗邊睇日落，這是最好的時刻，好relax，好enjoy！

我地book左帆船酒店內一樓的自助餐食dinner，點知落到去，俾個「中國籍」的職員話我地唔入得，原因係我衣著唔符合入內的要求！我已經問左管家，佢話我的衣著係ok的，長褲加上密頭鞋，連團領隊都話ok，點解唔入得？！唔入得就算啦，個「中國籍」的職員仲用d非常不禮貌的態度同我地講！搞到我同老婆無哂 Mood 食飯！

算了！大哂咩！我地去左酒店旁的 Jumeirah Beach Hotel 食自助餐！價錢平一半，團領隊話d野食好味過帆船酒店好多添！

我地最欣賞佢地的甜品！正！

Jumeirah Beach Hotel 的 Latitude餐廳，推介！

Jumeirah Beach Hotel 的夜景。

貴為全球第一間七星級酒店，帆船酒店的硬件方面真係好靚，但軟件方面(即係職員的service)真係要改善一下，住客無「賓至如歸」的感覺，只有「被管制」、「被監視」的壓力，住在這樣酒店真的感覺不好！