朗塞斯頓 Launceston -> 卡塔拉克特峽谷 (Cataract Gorge - The Basin Chairlift) ->
希爾塢士多啤梨園 (Hillwood Strawberry Farm) -> 鴨咀獸屋 (Platypus House) ->
Bicheno -> 夜探藍企鵝之旅
朗塞斯頓 Launceston 晨早的陽光，好暖和！天清氣朗，心情都靚d！
尋晚好好訓，老婆話今早要玩d刺激的玩意，一早到達卡塔拉克特峽谷 (Cataract Gorge - The Basin Chairlift)，係全球最長的單柄吊椅索道。
一上吊椅，老婆已經覺得有d驚，上到最高點有300米，都咪話唔驚！
呢個只係剛出發的高度，向下望都已經嚇死人啦！
從吊椅外望吊橋同峽谷，都幾靚的！
坐在吊椅上，看見樹頂的半月，寧舍不同！
到達對岸，有一個好精緻的花園，好多繡球花，十分優雅！
剛才看到的吊橋近景。
我同老婆再坐一次吊椅落山，老婆頻呼「驚驚」！
好，出發到下一景點，塔斯曼尼亞車程較長，沿途的景色大多如下：
第二站 --- 希爾塢士多啤梨園 (Hillwood Strawberry Farm)。
因為唔係士多啤梨當造的季節，我地只可以摘 Raspberry 紅桑子。
好多人去摘紅桑子的！
矮矮的全部都係紅桑子樹！
紅桑子近景．．．
睇下老婆幾細心採摘！
我地的戰利品！都有接近半公斤啦！
離開果園，到達 Seahorse World 及 Platypus House 。
我地選擇進入鴨咀獸屋 (Platypus House) 參觀，因為比較少見，一入內見到鴨咀獸標本，好得意呢！
見其真身，游來游去，速度十分快，要影相都十分困難！
鴨咀獸的近鏡，原諒小弟技術不佳，呢張已經係最好的了！
參觀完鴨咀獸，再參觀另一種澳洲特產 --- 針鼴鼠 (echidnas)。佢地好得意的，行路好似個波咁擺下擺下，食野時就用條脷左右掃下，好搞笑的！
參觀完動物，我地要努力駕車三小時，到今晚住的地方。天清氣朗，駕車一樂也！響香港的煩惱一掃而空！
途經碼頭，藍天碧海，正！
沿途經過酒莊，梗係要停車影影相先！
第一次見葡萄園，原來真係一排排，好齊整的！
三小時的車程雖長，但並不十分辛苦，因為路旁的景色十分吸引！睇下我地似唔似去左東非？！
一路駕車、一路聽住從香港帶來的cd，吹吹涼風，夫復何求？！
經三小時的南程，終於到達小鎮 Bicheno 。看！又係陽光與海灘！
澳洲的海水，真係特別藍的！
先往 Bicheno Backpackers 放底行李及車，再出外逛逛。不得不提，呢間 Backpackers 都幾受網友推介的，一來唔算太貴，二來都幾舒服的！
Bicheno 小鎮能給我地寧靜同和平的感覺，我同老婆都好深印象。
又係食晚飯的時候，我同老婆都想「食好d」，經 Backpacker 老闆推介，我地去左一間近海的餐廳，order 左一個海鮮拼盤同海鮮意粉，仲有 Salad Bar送添！
Yummy Yummy！超讚！
個海鮮拼盤真係唔講得笑！望住個咁靚的海景食飯，真係胃口都好d！
好relax咁食完晚餐，落左沙灘漫步，開始日落，雲霞幾靚！
晚上九點，我地期待已久的夜探藍企鵝之旅即將開始！我地先要在Local tour售票處集合，然後坐佢地安排的shuttle bus到一「神秘沙灘」等待藍企鵝的出現。
因為local tour嚴禁影相同錄影，我地只好乖乖睇藍企鵝，呢幾張相係響 local tour 網站 Dup 出來的。藍企鵝係全球最細的企鵝，行的時候好似其他企鵝一樣，左搖右擺，因為佢地係野生的原故，對人類有d戒心，所以成群藍企鵝行下又停下，行下又望住我地，超得意，好搞笑！
行下行下，忽然有一隻響路邊出現，又傻下傻下望住你，郁都唔郁！臨走前有一隻響我腳邊停下，然後用個咀「啄」我的鞋頭添！管理員話隻藍企鵝太肚餓，以為我鞋頭係食物！
過了一小時左右，睇完咁得意的藍企鵝，回 Backpacker 了，我同老婆仍好回味 Bicheno 這地方！
沒有留言:
張貼留言