大英博物館 -> 格林威治天文台 -> Canary Wharf商業區 ->
泰晤士河夜景 -> London Eye
離開大英博物館，老婆話去對面的玩具店搵下有無大富翁。哈哈，竟然搵到歐洲版的大富翁呀！多謝老婆！
途經一座具英國風格的建築物，上面有支英國國旗的，又影。
我地搭英國地鐵 (London Underground)時，見到兩個團友在我地前面準備買車票，其實在大英博物館時已經撞到一次，今次又撞到，真係有緣。
搭地鐵經過Waterloo同London Bridge兩個具代表性的站，影相留念先！
英國地鐵路線圖，比東京的簡單好多！
我地響 Cutty Sark for Maritime Greenwich 落車，帶老婆去格林威治天文台 (Royal Observatory Greenwich)。我老婆超級驚喜同期待，因為我無預先講佢知的！一來到，佢就話「點解係個公園來的？！格林威治天文台唔係響山上面的，好似大帽山的天文台監測站嗎？」
影下格林威治公園的地圖先！
其實個公園都好靚，好relax的！
睇到格林威治天文台喇！老婆極期待！
終於到達格林威治天文台喇！好多人已經在空地排隊！
格林威治天文台的一景。
咁多人排隊做乜？
就係為左影呢件野！
呢個係地球經線零度零分零秒的地方。
地上的線，就係經線零度零分零秒的「本初子午線」(Prime Meridian)！
線的東面就係「東經」，西面就係「西經」！
呢張相的左面係「西面」，右面係「東面」，張相的意思係：我來自東方、老婆來自西方，本來東面離西面係好遠的，但我地竟然有緣相識相聚，我地兩個在「本初子午線」上相聚及聯合，所以呢張相係好有意思的！
呢個係顯示本初子午線準確度的儀器。
因為天文台的辦公時間已到，最後我同老婆都無參觀到天文台內的物品，亦無買天文台的紀念品。老婆有d失望，只好在天文台的外圍影多兩張相啦！
位於格林威治天文台外的時鐘，影下先！
好喇！格林威治天文台下的公園其實真係好靚的！
返回地鐵站附近，見到一個市場，都幾多野賣的。
我老婆響呢間民族服裝店，買左兩條民族褲，共17磅，約港幣$200，超平！
呢個就係去格林威治天文台的車站。
好喇！搭地鐵(DLR)返市區。
我地響Canary Wharf站落車，呢處站係商業區，竟然見到街頭旁花圃的花好靚呀！
隨意入左一間商場，響一間書店內，見到曼聯版、阿仙奴同車路士版的大富翁。
仲有Mr. Men的書，原來有好多角色的！
食晚飯，隨意入一間餐廳，order左一支茄汁來喝，原來係玉泉出品！香港無的！
我地叫左一碟意粉同一個pizza，都幾好食！
食飽飯，出外行行，商業區的環境，真係見到好多白領人士。
好喇！去今日的最後景點。未到達前影下架雙層巴士先。
我地響Waterloo站落車，向泰晤士河 (River Thames) 的方向行。因為係放工時間，有好多打工仔在岸邊的餐廳飲野。
我地去河邊，最主要係影泰晤士河的夜景。見到London Eye下的旋轉木馬。
我地響亨格富德橋 (Hungerford Bridge)逗留，由下午七點半開始等日落，先影到大笨鐘同國會大樓的景色。
呢張相，由左至右係London Eye、泰晤士河、西敏橋、國會大樓同大笨鐘，漸漸日落喇！
日落景下的合照，特別溫馨！
我同老婆響橋上聊天，非常enjoy這段時刻！老婆話全個trip最深刻的就係呢刻！
睇住天色漸暗，同身邊的至愛，寫意地欣賞美景，夫復何求！！！
大笨鐘同國會大樓的夜景。
日落了！我想到London Eye旁的草地上影London Eye的全景，幾經辛苦下終於完成！
臨走前影多一張泰晤士河對岸的景色！靚！
我同老婆都好enjoy今晚的自由時間，好relax，好平靜，亦感受到英國人的有禮。
沒有留言:
張貼留言