韓國首爾浪漫之旅の第三天

鳳凰城滑雪渡假村 -> 正東津

一早起床，食過早餐，導遊立即帶我地去練習場滑雪。嘩！我同老婆都急不及待，十分興奮！好，影張相先！

我地就響張相的右邊，即係D小山坡學習行同滑雪。其實今次係我第二次滑雪，我老婆比我叻，呢次係佢第四次滑雪，老婆滑得比我好，但我比起第一次(只係識企唔識跌)，已經叻左好多了，今次起碼學識滑一段距離呀！

滑雪場的出入口，十分多人！

學左成個上午，食飽飯，下午上山滑賽道！我地搭吊車上山，但導遊話個Package只包上山，唔包落山的，要自己「Sir」落去！(其實佢係嚇我地的！)

吊車站附近有好多人練習，我其實鍾意影相多過滑雪囉！

呢條就係我地要滑的「初級賽道」，睇落唔係好斜，但我都係唔夠膽試！反而我老婆就二話不說，一支箭就標左落去！我影完相，就搭吊車落山，響滑雪場的出入口等我老婆。成個鐘頭後，我終於見到我老婆，佢有兩句Comment：好激、好驚！



事源係我老婆響賽道頭兩段滑得唔錯，佢都幾有信心繼續滑，點知第三段開始斜好多，我老婆一見到，個心嚇一嚇，立即唔夠膽再玩，連跌幾次之後，老婆決定用最「安全」的方法「滑」落賽道 --- 坐響D雪上，用手「爬」落去！「爬」到一半，見有得搭吊車，立即走人！玩得咁「激」，老婆話試過今次，無下次喇！

玩左成日，夠鐘還雪衫喇！對我來說，簡直係「解脫」！

好，今晚食返個特色風味餃子火鍋先！

好，到達今晚我地住的地方了！今晚的酒店在沿海城市正東津，很有名的，叫太陽郵輪度假酒店(Sun Cruise Resort)，至於點出名，先睇睇個價目表先，聽日先再講！

仲有，導遊話我地好幸運，因為係2008年最後一團入住呢間酒店，因為聽日係2008年大除夕，酒店所有的房間都唔會接受團體Book，所以叫我地珍惜今晚的時光！

返上酒店房間前，導遊話來到正東津，一定要試下當地的海鮮，問我地出唔出去食，估唔到成團人有三分之二都話出去，無他的，既然介紹得，梗係好食啦！

呢D就係我地Order的，有帶子、扇貝、大蜆、小蜆......... 仲要用炭爐來燒！嘩！未試過用炭爐燒海鮮，應該好好味的！

睇下D扇貝由生變熟，然後聞到陣陣燒海鮮的香味，真係流哂口水！其實，炭燒海鮮真係超級好味！

依家要介紹下相中兩位，大有來頭的！男的就係我地的導遊 Dormond，佢係香港人來的，仲識得一口流利的韓文，勁！女的係韓國旅遊局派來的攝影師，專程影低我地旅程中的點滴，我唔知佢叫乜名，剩係記得叫佢做「大長今」啫！睇落都有幾分似李英愛喎！

食飽飽，實訓得好啦！聽朝又有好野睇！