韓國首爾浪漫之旅の第二天

製作泡菜體驗 -> 鳳凰城滑雪渡假村 -> 溫泉樂園

昨天太累了，今早訓得十分好！食完早餐，在酒店的花園逛逛，酒店的外貌都幾靚！又見到日出，唔知點解，響外國見到的日出真係特別靚的，應該係同心情有關的！

間酒店都幾Grand的，睇睇似唔似某大樓盤的廣告呢？

好，出發！今日的第一景點，竟然係 --- 生果鋪！無錯！我地食完早餐，見無野做，又胡亂行下，見到間生果店D生果好新鮮，立即去睇睇！尋晚先試過D好甜的士多啤梨，今日又見到，嘩！一盒8000Won，即係港幣50元一大盒，睇真d仲要分上下層，一盒共40粒！咁抵，即買！

除左士多啤梨外，仲有蘋果啦、黃金梨啦，西瓜都有，勁！

聽聞韓國D橙都好出名，但我同老婆都唔多食橙，所以無買！

去到另一間生果店，見到的仲「犀利」！無錯！係韓國品種的「巨峰提子」！響香港只可以買到日本出產的巨峰提子，又貴，又勁酒味！睇下韓國賣幾錢先？！乜話？！左手面前的只係賣3060Won，即係港幣20元都唔駛！有無咁平呀！日本品種起碼成百蚊啦！二話不說：買！(雖然唔知D味似唔似日本的巨峰提子？！今晚試試先！)

好，影下韓國的街景先！

掃完生果後，去學整泡菜。呢個係大部分旅行團的「指定動作」，我老婆都幾有興趣，又整下先！材料係有：大白菜、辣醬、魚露。

好，先睇下「大長今」示範先！當然，我地整到「一鑊飯」啦！

整完泡菜，影下相，又食飯！導遊話，響韓國唔係食鍋、就係食燒，唔係食燒、就係食鍋，係得呢兩味！好啦，今日食「燒」先！咁今晚就自然係「鍋」喇！幾聰明！

食食下，突然間全團人起哂身，原來係落雪！我同老婆食飽飯，落去影影相，玩玩雪先！幾浪漫呀！

好，食飽飯，去成團其中一個重要行程：去鳳凰城滑雪渡假村。入到去，先取酒店房間，嘩！一開窗簾，見到整個滑雪場！正！ 其實都幾Grand的！

影過d就見到練習場喇！導遊話聽朝我地就會響練習場學下先！ok，we are ready！

差不多日落了，我地梗係唔會出去滑雪啦！我地去左滑雪場附設的溫泉樂園，勁好玩！我同老婆玩左三次滑梯，勁 High！好似番番去玩海洋公園的水上樂園咁！

玩到累，可以去呢d唔同味道的溫泉浸下！紫色係葡萄味溫泉，綠色係綠茶味溫泉，好特別！

好，浸完溫泉，好肚餓！食晚飯先！今朝食「燒」，今晚就食「鍋」啦！

食飽飯，出滑雪場外Book滑雪服飾，睇下落幾大雪，幾浪漫呢！

Book完衫，番酒店早D訓，聽朝玩滑雪，Yeah！