韓國首爾浪漫之旅の第五天

首爾車站 -> 南大門 -> 明洞

一早起床，第一句同老婆講的，就梗係「新年快樂」啦！2009年的第一天，韓國的天氣十分好，天晴、溫度又無尋晚咁凍！好，新一年、新開始！努力玩埋今日，之後努力返工博殺！

導遊先帶我地去新村地鐵站附近的餐廳食早餐，點解D地方咁熟識的！尋晚係響呢處搭的士番酒店的！今日的行程主要以參觀為主，包括青瓦臺總統府、人蔘專賣廳、紫水晶專門店、高麗真珠草專門店，仲有明洞！

嘩！全部都係我地唔太想去的，於是...........我地又問導遊可唔可以再有半日自由行時間！其實我地同導遊都幾熟，佢批准我地的申請，叫我地下午三點半響明洞集合！哈哈，好野！我地又有六個鐘頭自由行！影下離開餐廳後的街景先！

我地又搭地鐵出發，第一站係我要求的 --- 首爾車站！我去旅行有個習慣，如果可以的話，會響當地的首都車站影張相，證明「到此一遊」！好，出發！呢張相係韓國的地鐵，我覺得真係好似日本的鐵路車卡！

只係搭左五個站，就由新村到達首爾車站，勁快！好，我當然要影車站的指示牌啦！到此一遊呀！

我地上地鐵大堂時，大家都嚇左一跳，點解成個大堂會無人的？！唔知係咪因為今日係元旦日，時間尚早，尋晚大家都玩到好夜，D人返哂屋企訓覺？！

上地面喇！見到首爾站的外觀，好似香港的紅磡站！

響首爾站出面有一座建築物，我唔知係乜，但係見佢咁靚，又影！

見時間只係十點幾咁早，我老婆提議去附近一間超級市場行下，入到去見到有人派一個好似日本飯團的物體，我都唔知係乜，我老婆就話呢D係「福餅」，係響新年派俾市民的，即新年帶來好運的！我地取左福餅不久就派哂喇！！

入去超級市場隨意逛，見到裡面居然有魚賣！好似香港「金魚街」咁！

仲有，我地梗係要搵狗零食啦！要買手信俾 MiuMiu 同 MoMo 呀！睇下有幾多狗零食！

超級市場好大，好似香港太古城間吉之島，我地見到咁多士多啤梨，真係覺得好正！呢幾日已經狂食士多啤梨同巨峰提子喇！

響超級市場買完野，我突然想影D韓幣做紀念！我老婆話我傻傻地的！有乜好影呀？！

好，再出發去下一站 --- 南大門！我老婆話，次次去韓國都要去南大門掃紀念品同手信，但今次我地已經買左好多手信喇，應該唔會再入好多貨啦！

雖然上午十一時左右，人都幾多了！有D似香港的女人街！D野都幾平，但我地竟然無買到野就走左！

行左一陣，又搭地鐵去最後的景點 --- 明洞。途中經過明洞區的建築物，又影！

影下首爾的繁忙街景先！

我地就係約左導遊響呢個嘖水池等！

行入明洞，行人唔多，或者時間尚早。經過一間類似Starbucks的餐廳，個名就叫做 Tom N Toms Coffee，但成個 Design 同 Starbucks 無乜分別！我仲以為自己返左大陸，先至見到D老翻添！

我老婆話來韓國已經好幾次，但未見過明洞咁少人行的！

行左一輪，我老婆話個喉嚨唔多舒服，唔知係咪食得D「燒」同「鍋」多！我地周圍搵藥房，竟然俾我地搵到一個熟悉的名字 --- Watsons ！ 他鄉遇故知，正！

響Watsons竟然俾我地搵到另一個「故知」 ---  「龍角散」！龍角散係日本出產的，對治喉嚨痛同喉嚨發炎十分有效！但響日本我地剩係見到龍角散，今次充竟然見到龍角散出的糖！嘩！咁正又未試過，一定要買！食左我老婆話即刻舒服D！

去到明洞呢個購物區，我同老婆反而唔係買左好多野，我老婆剩係買左Hanskin 隻BB Cream，因為香港暫時仲未有，而呢隻BB Cream亦係導遊「強烈推介」的，因為...... 佢將會引入呢隻貨來香港！好！我地密切留意先！

今日影相唔多，響明洞見到呢D襪仔就幾得意！

肚餓了，我地今日食日式拉麵，正！當我去洗手間時，見到個尿兜前放左呢張相，藝術得黎係咪好現實呢？！

我們食的拉麵！好味就好味喇，唔知我碗麵係咪辣過頭，我食完之後個肚勁唔舒服！

在 ABC Mart內有 Reebok 大富翁牌波鞋，好靚！

走喇！同導遊集合後，去埋機場附近的手信專門店先！見到D團友勁買手信，我地不禁覺得自己好「精明」添！

離開韓國了！我地搭晚上19:45的航班，於零晨12點返到香港。我地聽朝要返工喇！加油！