韓國首爾浪漫之旅の第一天

首爾仁川機場 -> 世界杯主場館 -> 大浴場 -> 七樂賭場 -> 東大門

2008年的聖誕節假期，我地本來計劃去泰國，早於10月已經Book了機票，但世事難料，11月「黃衣軍」突然佔據曼谷機場，情況十分混亂！我地為安全起見，決定取消去泰國！慘！
正當我同老婆為旅行地點煩惱之際，去到旅行社見到有一個比較特別的韓國旅行團，好多地方都未去過，見 D Won都幾平，好啦，去韓國啦！

今次又係坐零晨機，飛00:30，到達首爾仁川機場都只係05:30，咁鬼早，響機場訓一陣先！
上車喇，導遊話先送一個附加景點俾我地，就係 --- 大浴場！唔係啩，咁早浸浴，實頭暈啦！

更估唔到的，係個浴場竟然位於2002年日韓世界杯的主場館內，真係犀利！
睇下，門口真係有2002年世界杯的吉祥物！

呢個就係我地的目的地 --- 大浴場！哈哈！韓國政府將世界杯場館的低層改建為商業用途，其中一部分正是我地要去的大浴場，都幾大的，浸完浴可以「赤裸裸」響上層訓覺，無人會騷擾你的！當然是男女分開浸浴啦！

我同老婆分道揚鑣，我浸左一陣浴都見暈暈地，上二樓訓番一陣！一上到去 ...... 嘩！多人到呢！不同國籍、不同年齡的「男士」，「赤裸裸」訓響地上，有D就訓響張床上，我地呢D中國人見到都唔係好習慣，不過太累，無辦法！照訓！

一訓就個多小時，我見精神番D，好，著衫周圍行下先！亂打亂撞在場館內搵到一個Shopping Mall，都幾大的，乜都有得賣，我梗係去睇下D影音產品同電腦啦！

一見就睇到部Samsung NC10，當時係新出的，香港要賣港幣3900左右，睇下韓國會唔會平D？！嘩！要成 869,000 Won，以當日匯率162計，成港幣5,360左右，超貴！

好，肚餓，食飯先！導遊話今餐係最豪的一餐，因為有長腳蟹食！正！

長腳蟹一到，我就急不及待食，相都無影，我老婆話佢食唔哂，俾左半隻過我！正！食哂喇，我為左要紀念呢個歷史時刻，決定做一件好嘔心的事：將頭先食完的蟹殼還原，得出以下呢張相：

食飽飽，導遊話帶我地去七樂賭場「博殺」！我同老婆都唔愛好的，求求其其入去影幾張相，仲有去賭場兌換韓幣，聽人講兌得高D呀！

呢間賭場響首爾市中心，同其他賭場一樣，位於一間酒店內，適逢聖誕節，梗係要有棵聖誕樹先得啦！

離開賭場，去東大門 Shopping！我老婆個表妹知我地去韓國，叫我地去 SkinFood 掃貨，我見響韓國買的價錢，比香港的店舖平三分之二，立即SMS問表妹駛唔駛買多D啦！佢梗係話好啦！

掃完貨，胡亂行下，老婆好想響東大門買衫，因為佢次次去韓國都響東大門有收穫，不過行左成個鐘頭，都無乜發現，只覺D衫又貴又Common！空手而回的老婆，極度失望！臨走前，見有個商場佈置得幾靚，影下先！(你地見唔見張的右下角，有兩個韓國少女玩自拍呢？！幾靚女的！ )

好，買左手信，都好累了！又係食火鍋，ok啦，多菜少肉，都幾好味！

食飽番酒店喇！我地住 Mayfield Hotel，響首爾市郊，好似幾靚的！番到酒店，試下剛買的韓國士多啤梨先！又大粒，又甜，拍得住日本的！

好，食飽訓番覺好先！