北海道冬季浪漫之旅の第一天

札幌 -> 札幌薄野不夜天 -> 橫丁拉麵街

每年的農曆新年，我外父外母都會出外地旅行，除了散散心、叉叉電外，最重要是一家人可以開開心心聚在一齊。我同老婆雖然有多次旅行經驗，但未試過兩公婆與外父外母一齊去，既然今次大家都想去日本，好啦，一齊去啦！阿姨同表妹都想去，ok，「阿妹旅行團」共有六人報名 --- 「已成團」！

我地乘搭國泰CX2582班機於11:45起飛，大約下午五時到達北海道。都知道冬天的北道會落好大雪，我地帶著期待的心情，希望五天行程有得睇落雪啦！

Check-out之後，首先去札幌的一間餐廳食晚飯。今晚係食自助燒烤，有好多野食的，D甜品又好味，D肉又鮮，我老婆最鍾意係自己煮的烏冬，超彈牙！讚！

唔知係自己肚餓，定係日本D野食真係好味D，我竟然食極都唔飽的！

好喇！食飽飽，未到上車集合的時間，出餐廳外行下，竟然見到一排「麵包車」泊響停車場，應該係二手車來的。

北海道冬季浪漫之旅の第二天

黑岳山 -> 層雲峽 -> 銀河瀑布、流星瀑布 -> 網走

尋晚又食得飽、又浸溫泉、又訓得好，今朝好好精神！
從酒店房間望出外，見到的只有白色，就知道尋晚應該落好大的雪！

食過早餐，導遊話我地知，尋晚真係落好大雪！我地出外想行下，嘩！好凍呀！求其影兩三張酒店的雪人公仔，快d入返室內暖暖先！

好，開車喇！今日第一站係黑岳，導遊話車程要四個小時，嘩！又爭取時間訓陣先！沿途見到的就只係咁樣，勁無奈！

北海道冬季浪漫之旅の第三天

網走破冰船 - > 雪上電單車 - > 屈斜路湖 - > 阿寒國立公園硫黃山 - > 阿寒湖

一大清早起床，由酒店的房間外望，嘩！今日天氣好好呀！前兩日的天氣都唔太好，今日見到晴天，心情都靚d！

 

好，食過早餐，出發！今日我地會在網走坐破冰船，破冰船只會在一月中至四月初出Trip，限定航行的！未上船，先影張相先！

我老婆去呢個Trip，最期待就係坐破冰船喇！第一次坐破冰船，心情有d緊張，唔係因為驚有意外，係因為想睇下d冰有幾厚！想感受一下破冰的威力！

開船喇！我地覺得好似響香港坐天星小輪一樣 --- 咁定！唔係好覺有「破冰」的情況，可能係d冰唔多啦！坐左一陣，開始有人買左d蝦條餵海鷗，起初都只係三至五隻，整整下，嘩！成天都係！真係有好多的！

北海道冬季浪漫之旅の第四天

阿寒湖 - > 十勝 - > 札幌 - > 白之戀人朱古力廠 - > 小樽 - > 札幌

尋晚十分開心，因為有好多個「第一次」，到朝早仲未興奮完！
起身後從酒店窗望出外，睇番尋晚放煙花的地方，原來係結左冰的阿寒湖，別有一番風味！

湖上有好多公仔，雖然結左冰，我同老婆都出去影左幾張相！

夏天的阿寒湖係好靚，冬天的阿寒湖其實都好平靜的！

導遊話，今天的車程好長，因為要返札幌市同小樽，要到下午三、四點左右才到達，上車時千叮萬囑，叫我地check清楚d行李，唔好遺留響酒店。開車後十五分鐘，真係「好既唔靈醜既靈」，有個「近視」的團友竟然話佢唔見左副眼鏡！勁低能！有乜理由自己無戴con，睇野唔清楚，竟然唔知自己無戴眼鏡？！係咪玩先？！

旅遊車要折返，一來一回，無左大半個鐘！我地成家人已經好唔妥個團友，個團友取回眼鏡，一d悔意都無，粒聲唔出就返埋位，sorry都無句，真無品！

已經遲左喇！好啦，飛車返札幌啦！途中經過十勝作中途站，自費食lunch先，食完再出發！

北海道冬季浪漫之旅の第五天

札幌 -> 狸小路 -> 札幌雪祭 -> 札幌電視塔

連續幾晚都有溫泉浸，感恩！今早天氣好好，睇下個天幾藍！

好，最後一日喇！要返札幌行下先得！第一站一定係狸小路，北海道的購物熱點！導遊推介我地，一定要響日本藥品，因為日本國內買d藥同出口外國的唔同，本土的藥成份唔同，效果好好多！佢仲介紹左兩隻感冒藥，話好有效的！叫做Paburon「帕不隆」同ShinLuLu「新露露」！我地食過都推介！

狸小路當然有好多「北海道限定」的物品啦！當然唔少得Hello Kitty啦！