關西狂購福袋勁玩團の第二天

大阪黑門市場 -> 心齋橋 -> 美國村 -> 神戶 -> 梅田空中庭園展望台

尋晚都訓得幾好，因為我最鍾意d細細間的酒店！呢間就係我地住的大阪富士屋酒店，又平，又乾淨，最緊要係近心齋橋！正！

今日行程都好緊密，先到心齋橋附近的黑門市場逛逛。我地去過好多日本的朝市，但呢個都算特別，因為除了海產外，仲有好多食物．．．

嘩！黑毛和牛都只係2000円一盒！抵！

福岡士多啤梨都只係780円一包！又係抵！

仲有，一級佐賀牛．．．13468円！半價！勁抵！

仲有海膽同帶子刺身，超平！帶子刺身都只係550円！嘩！

雜錦刺身，多謝5000円！貴d喎！

市場有麵包店，賣的麵包幾可愛！有麵包超人的樣子！正！

行下行下，見到一檔賣鮮龍蝦，都算平呀！

我見到d雞泡魚，覺得好鬼核突，我老公又覺得幾得意喎！原來雞泡魚個肚係白雪雪的！哈哈！

好，行左一輪，都無買到野，又大風、又肚餓，求其食d野先！一大清早，我同老公唔想食壽司同刺身，想食d熱辣辣的，感恩地搵到一間食日式早餐的，有麵豉湯、有燒三文魚、有豬肉、有白飯一大碗，正！

呢間就係我地光顧的松屋，原來有好多分店的！

上午十點左右，返到心齋橋，見到平日大排長龍的赤鬼燒墨魚丸，竟然無人排隊，嘩！機會難逢，一定要試下！

睇住佢整，真係流哂口水！

我地等左六、七分鐘，已經有成十幾二十人排隊，可知呢間赤鬼有幾好食！

等左十分鐘，終於有得食咧！我一向唔鍾意食燒墨魚丸的，但係赤丸的墨魚丸真係勁得！

一入口，又熱又香！仲有d汁「標」出來，正！響香港無可能食到咁正的！難怪咁多人排隊買啦！

食飽喇！行下先！去到心齋橋的另一特色 --- Glico專門店，個個都響門口影相！

入到去，已經人山人海！個個去買手信！有Glico T Shirt！正！

當然有 Glico 百力滋！

仲有 Glico 爆谷添！

好，十一點左右，心齋橋的店舖開門喇！又去掃貨先！我尋晚睇中左一頂冷帽，但無買到，今朝決定去買番！竟然仲有喎！正！(多謝老公支持我去買番佢，真係又平又靚，1050円咋！)

我老公就睇中左d呔喇！真係好多顏色的！佢最後買左一條紫色同一條綠色的！型！

行左去Uniqlo，見到我老公件羽絨衫，香港減左價都要成$600，日本只需3990円！即港幣$340，勁抵！

去到Disney Store，五折至七折！又係勁抵！

去到心齋橋大丸的 Anges B，見到日本版的袋，我即睇中了右上角的黑色袋，日本聖誕限定版！仲要係13500円，即港幣$1,150，抵啦！一定唔容易同人「撞款」！

d銀包都係限定版的！正！

行左兩個鐘，要離開心齋橋喇！我地去下一站 --- 美國村！先經過Apple Store！幾大間的！

美國村都幾有特色的！

睇下美國村的標誌 --- 自由神像！

行左大半個鐘頭，我地覺得唔多野睇，決定去下一站 --- 神戶。不幸地，我地搭錯車！搭左南海電鐵！慢到死！仲要上左架站站停的車！慘！唯一收獲就係經過香港人好熟悉、但又未必會知道響邊處的「甲子園」站！老公話要影先！

兜兜轉轉，過左一個半鐘，終於到達三宮，已經下午四點左右了！我地求其響附近食個烏冬啦！

簡簡單單的一碗烏冬，我地食得「大滿足」！

過多半個鐘，終於到達神戶喇！好野！上次跟團去神戶，我已經好鍾意呢個地方，今次再來，有好多回憶的！

上次我已經好鍾意呢d室外的店舖，好有特色！雖然今日落雨，都無掃興！

睇左幾間店舖，去到呢間 Lowrys Farm，見到我今個 Trip 最想買的一樣物品 ---

水 Boot ！ 仲要係非一般的水 Boot ！有毛毛，有蝴蝶結，鞋型又修長，最重要的係 ．．．只係3990円！港幣$340，抵到爛！但係佢只得大碼，我同老公猶豫左好耐，入左呢間 Shop 三次，最後都覺得機會難逢，買左先講！

我買左對水 Boot ，大滿足喇！再入到全日本最大間的 Uniqlo，嘩！我估有幾萬尺！勁大！

我老公見出面無再落雨，出室外影下神戶的夜景先！我老公的攝影技術都唔錯的！哈哈！

好喇！我同老公都「大滿足」喇！再去個商場行下先！我老公見到d野，好似開心大發現咁！我地見到一部103寸的Plasma，勁！多謝 5,980,000 円！即係港幣508,000！嘩嘩嘩！

仲有，老公見到 Panasonic Blu-Ray Hard Disk 錄影機，香港係未有的！2TB，即係 2000GB，多謝 198,000 円！港幣 $16,800！

Sony 呢部仲貴！Config 差不多，要 256,000 円！ 即港幣 $21,700！勁貴！

Blu-Ray Disc 的燒錄光碟！又係響香港未出的！分 BD-R 、 BD-R DL 、 BD-RE 同 BD-RE DL ，DL係 Double Layer，兩面都可以燒碟的！

又見到「女朋友」--- Panasonic GF-1 ，價錢同香港差不多的！

仲有驚人大發現！ 雙 Mon Net-book ！仲要係 Onkyo，香港真係無的！都係 84,800，港幣$7,200！唔算貴！

嘩！行左咁耐，要離開神戶喇！我同老公都「大收獲」！出番梅田，好肚餓，響車站附近搵左間拉麵食先！我老公個豬肉拉麵！正！

我個冷麵，加左隻蛋，都好好味！



我地入去餐廳食，都唔係排好耐，一出來就勁排喇！



好野！食飽飽！我話好想去梅田的空中庭園展望台，見就快關門，好！快快行喇！一去到，呆左一呆！唔係掛！點解有兩條「天梯」，唔係要行嘛！

我地就係要經過呢條梯！我係唔敢向下望！勁驚！



個空中展望台高173米！上到去我同老公都好鍾意！可以睇到全大阪的夜景！

好，今日已經好滿足了，係時候番酒店！途經超市，見到好靚的日本青森蘋果，300円一個咋！港幣$26，抵！

仲有仲有，我見到有新潟米，2kg都係賣 980円，即港幣$80左右，即買！

番到酒店，立即食個青森蘋果，超爽甜！抵食！