殘波岬 -> Arluis Suite 教堂 -> Renaissance Ribera 教堂 -> 琉球之館 ->
泊Lyumachi魚市場 -> 赤嶺站 -> 首里城 -> 國際通
尋晚大家都訓得好，但我同老公都祈禱想今日好天，今早一起床 ...... 嘩！天睛！感謝主！雖然原先計劃好去坐小潛艇欣賞海底的魚魚，但因風浪太大，船公司取消了，多出的時間未去下其他景點囉。
食過早餐我地去參觀兩間教堂，第一間叫 Arluis Suite，睇下幾靚先？！
教堂內部都好靚的！
逗留一陣，我地再去第二間教堂，呢間已經係行程中參觀的第四間教堂，四間都好靚！我地都話：唔知點解沖繩d教堂好似特別靚的？！行禮都浪漫d！
間教堂叫Renaissance Ribera，教堂最特別的地方，係所有桌椅都係透明的，佈置係見咁多間中最簡約但最靚的！家姐好鍾意呢間呀！
間教堂係響間酒店範圍內，我地見間酒店都有好多設施，其中一個係能夠與海豚游泳。爸媽話有機會的話，下次要試下Book呢間酒店，玩下d設施！
睇完靚教堂，我地出發去琉球之館，體驗琉球傳統染織。媽媽、家姐同我當然又去試啦！
試完染織，Daddy話肚餓，我地就去魚市場食魚生及壽司，間魚市場叫「泊Lyumachi魚市場」，響那霸市港附近。見到d魚生真係好想食哂佢地！
這個魚巿場的魚生較那霸便宜，3盒任選只是1000円。
今日午餐十分豐富！其中最好食係帶子！鮮味中帶點甜、十分有口感！Daddy、媽咪同家姐猛話好味，爸爸話從未試過一次吃咁多魚生。而我同老公就密密食！
食飽飯，係時候駕車離開中部！我地先去我老公最想去的其中一個景點 --- 赤嶺站。呢個係全日本最南端的車站，家姐、老公同我一定要影相，「到此一遊」呀！
這是赤嶺站的外觀。除了影相外，我和老公一定要去車站印紀念印！
影下個路線圖，全沖繩的單軌電車共有十五個車站，雖然唔多，但已經擁有兩個全日本記錄！第一個已經揭曉，第二個就 ...... 明天開估！
專程到赤嶺站影相，我地再出發去另一景點 --- 首里城。影下個GPS導航先！
去到首里城，我老公第一件事就係要搵守禮門。守禮門響首里城牆外，亦係日本2000円紙幣的圖案。我老公話最衰搵唔到張2000円紙幣一齊影相啦！
到首里城牆外，見到很多人入內參觀！
首里城外圍正在裝修，但一樣莊嚴！我同老公去到首里城，最多時間花響搵「印仔」上，一共印左十四個印，尚欠四個先儲齊，唔制呀！
行左一小時左右，差不多要還車。我地先駕車返御用酒店 --- 東橫 Inn Omoromachi 站前。我老公點都要影番幾張相先！
走喇！陪左我地六日的日產Lafesta！我地唔捨得你呀！
我老公話一定要影下個錶版，行左大約460公里，都唔係好多啫！
響酒店放低行李，我地去對面的沖繩DFS還車。還車時發生一段小插曲：
事原係我地太心急還車，唔記得入滿缸油先還車，日產d職員check哂架車，先發覺我地未入滿油！佢話會幫我地入番滿，叫我地上DFS二樓的Counter俾錢。上到去職員同我地講，要我地俾成5000円油費！嘩！有無咁貴呀！我地同佢拗左15分鐘，雞同鴨講，好彩我老公臨還車時影低幅相做證據，先 fight 到只係俾番 888 円油費！
以後記住要入滿油先好還車！
好，無車揸，搭電車！沖繩的單軌電車好特別，車仔細細得兩卡，同東京的好唔同！
我地傍晚前去到國際通，終於來到沖繩唯一的購物景點。隨意逛，隨意買手信！響呢度有好多店舖賣沖繩最出名的紀念品 --- 竹富島的星砂！要幾平、有幾平！我老公話早知之前幾日唔買咁多啦！
食過晚飯，Daddy同媽媽話自己返酒店先！嘩！唔係嘛？！自己番酒店，會唔會迷路？！佢地話咪當佢地係「低能兒童」喎！好，我地三個再行多一陣，你地兩個小心d先！
行下行下，去到一間叫鹽屋的店舖。鹽屋並唔係賣鹽咁簡單的，最出名是賣鹽味雪糕！嘩！真係要試試呀！
一杯350円，唔貴！好，一人一杯！
有八種口味的粉加響雪糕上，我最鍾意係辣味，夠激！
見到沖繩的Hello Kitty公仔，又影！
途中經過一間玻璃店，見到上次去體驗做玻璃時的史廸仔玻璃！我十分鍾意，但太貴了，成10500円！
我老公突然同Sales講，要買隻史廸仔，連棵玻璃樹都買埋添！佢話：咁珍貴，一定要買，唔買會後悔！
返酒店前，我地三人去左御菓子御殿分店買手信。家姐俾錢時，我老公見到一張Label響收銀處，大概係寫住「保護使用二千円協會」，我老公問個Sales係d乜，又雞同鴨講......突然我老公問佢，想用兩張1000円換佢一張2000円，睇下佢有無得換！我老公話自從佢響2005年去東京見過2000円一次外，之後就未見過！姑且問下啦！點知......個Sales竟然響櫃檯取出一張差不多係「直版」的2000円，我老公簡直開心都暈左！見到啦，用守禮門做圖案的...
好啦，夜了，返東橫 Inn 訓，聽朝最後一日行程！
很回味魚市場的午餐，看著相都想流口水 [版主回覆05/16/2009 22:59:00]係呀，真係唔錯，我仲好鍾意鹽味雪糕，正！
回覆刪除hi，我想問下點去東海岸的魚市場，有無地址啊？thanks! [版主回覆05/21/2009 06:57:00]魚市場響那霸市港附近，網址是： http://www.odnsym.com/spot/tomariyui.html D魚生超平，又好味，講起都想食！
回覆刪除你好呀~~ 想問下可以同海豚游水間酒店叫咩名呀??? thanks ar~ [版主回覆06/20/2009 05:43:00]謝謝你的到訪。 間酒店叫Renaissance Resort Okinawa，好大間，裡面有好多野玩，又有水上活動，正！仲有，裡面間教堂真係值得參觀的，真係好靚！
回覆刪除你好，我想問問，琉球館除了入場費外，那些染織體驗需要另收費嗎？ 另外，我見你們一日都去好多景點，會唔會好趕呢？ [版主回覆04/01/2010 13:39:00]謝謝你的瀏覽！ 琉球館是不需入場費的，只是體驗部分需要收費的。 如果是駕車的話，都可以完成大部分的景點。我地由沖繩中部駕車到那霸市內，都只係個半小時，都唔係太趕的！
回覆刪除就來出發啦，不過，仲有好多嘢未plan，租車係先付款定係之後還車時才付呢？會唔會好似酒店般，要用credit card登記，in case有什麼問題？本來打算用credit card比，不過，又怕個rate同手續費會好貴～ [版主回覆04/05/2010 13:46:00]租車可在網頁中預訂，不需立即付款，只需給credit card number作資料。 取車時可用現金或credit card付款，如有意外或改變行程未能準時取車，公司則會以credit card過數的。 放心，租車是很方便的！
回覆刪除Hi 你好，想問問沖繩殘波岬酒店是否 = Renaissance Resort Okinawa ? 而 Renaissance Ribers 教堂 ( 透明桌椅 ) 是否在沖繩殘波岬酒店範圍內 ? 泊 Lyumachi 魚市場是否 = 東海岸的魚市場 ( 那霸市港附近 )? 多謝 [版主回覆04/28/2010 21:44:00]沖繩殘波岬酒店並不是Renaissance Resort Okinawa，你可在 www.jalan.net 內尋找 「沖繩殘波岬酒店」。 Renaissance Ribers 教堂 是在Renaissance Resort Okinawa內。 魚市場響那霸市港附近，網址是： http://www.odnsym.com/spot/tomariyui.html
回覆刪除Hi 你好，請問「駕車返御用酒店 --- 東橫 Inn Omoromachi 站前。」是指 東橫 INN 那霸新都心 Omoromachi ，還是東橫 INN 那霸 Omoromachi 站前 ﹖ 謝謝 [版主回覆05/03/2010 21:04:00]係東橫 Inn Omoromachi 站前，你可在東橫Inn的網址中找到： http://www.toyoko-inn.com/china/
回覆刪除不好意思，又是我.......請問你在殘波岬住的如果不是Renaissance Resort Okinawa，那是不是 沖繩殘波岬皇家渡假大酒店 Zanpamisaki Royal Hotel ? 如果又不是，請告知是那一間，因為我真是找不到... 謝謝... [版主回覆05/03/2010 21:03:00]是沖繩殘波岬酒店，給你網址，ok？！ http://www.daiwaresort.co.jp/okinawa/
回覆刪除hi~~我剛去完沖繩, 有少少update想話你知. 我有個朋友今年4月去首里城, 一共有18個印要"給", 11月到我o地去時, d印已經增加到24個, 要搵齊真係唔易, 不過d日本人好幫忙, 問佢o地嘅話, 佢o地都會教我o地點行, 縱使言語不通, 哈哈~~ 我o地成功"給"晒24個印, 不過就有2個顛佬顛婆o係個首里城跑來跑去~~因為個團只比1個鐘我o地行..... [版主回覆12/04/2010 18:11:00]hi，你好，my dear friend，感謝你瀏覽我地的blog，亦感謝你update的資料！ 其實得一小時在首里城儲印仔真係有d趕，不過都係美好的回憶！ 期待你在blog中分享這次旅行的點滴！
回覆刪除Hi, 我想問你地去果幾間教堂使唔使住喺酒店入面先去得架? 定係可以隨意駕車去架, 因為我見大部份教堂都喺酒店入面. Thanks [版主回覆07/29/2011 00:54:00]謝謝你的瀏覽！ 教堂是不用預約，不是住客亦可以參觀，如當時沒有婚禮舉行，便可以參觀一下，當然不可逗留太耐啦！
回覆刪除