日本沖繩自駕遊の第三天

恩納海岸 -> 海中步道 -> 萬座毛 -> Coralvita Chapel 教堂->

御菓子御殿 -> 海中展望塔 -> 菠蘿園 -> 本部港

第二晚我哋入住恩納村的海中步道酒店，這間酒店的特色除了是房間有無敵大海景外，還有一個人工沙灘，濱外有一海中步道，讓住客可以更接近大海洋。

白鴿飛....有很多白鴿在房間的露台外"搵食"呢!我老公的攝影技術不太差吧！

早餐後，當然要走一走海中步道。老爸都沒有耐性等我們，一早就"自由行"了。海的顏色實在太美妙了，最開心還是人很少，才可以影出這麼美的相。

行到中途，爸爸已急不及待咁同我地講小橋下有一群群的雞泡魚，叫我地快D去睇下。哇！真係好得意呢！

這就是我哋住的酒店，都好似幾grand啊！

在酒店的小買店，見到我老公的目標，就係可樂的沖繩特別版。老公當然唔會放過，"大批"的購入。屋企又多一個罐！(老實講係唔只一個囉！)

離開酒店後，去這天的第一個景點---萬座毛。這是沖繩必去景點，所以好多旅行團一早到達，人頭湧湧。想影張想都要左閃右避，始終我都係唔鍾意人多的地方。

(小miumo格言﹕自由行梗係去D旅行團去唔到的地方，先顯得珍貴麻)

去沖繩其中一"類"要參觀的景點，就是教堂。這些教堂主要是租給新人行禮的，就算唔係基督徒，都可以租用。特色係 --- 靚！

成個行程我哋參觀了多間教堂，相中是我哋見的第一間，亦是讓我哋感到最"震撼"的一間..........初頭我地想去另一間網友推介的"靚"教堂，但找不到。反而見到這間教堂，就試試問日本姐姐原先想去的教堂位置，點知她們用手語話比我哋聽，那間教堂正在裝修，沒有開放。一場來到，我老公就隨口問下，可唔可以入這間教堂的禮堂參觀，日本姐姐沒有拒絕我哋，而且仲好好招呼我哋上二樓參觀，一開道自動大門，我哋都一齊哇一聲........

真係好靚!可能係第一次見到咁靚景色及裝潢的教堂啦，所以都幾震撼。唔知望住個海行婚禮會點呢？

在這裏結婚，很浪漫呢！喂！還未結婚的朋友，在沖繩教堂舉行婚禮真係一個唔錯的選擇！

順帶一提，呢間教堂叫Coralvita Chapel，響萬座Beach Hotel & Resort內；原先想去的教堂叫Aqualuce Chapel，都係響萬座Beach Hotel & Resort內的。

揸車去買手信！這是御菓子御殿，有很多沖繩的傳統糕點賣。其中由紅番薯做的撻是最馳名的。看張相已有眉目，就係近門口附近那件紫色撻。店內有好多糕點都可以試食，但在眾多甜品中，番薯撻真係最好食。我哋當然又大批購入，而最怕買手信的我，就決定先上二樓搵定位吃午飯。

二樓餐廳亦係有無敵大海景。我哋選了紅蕃薯冷麵及沖繩特產---苦瓜炒蛋定食。

唔知點解沖繩的苦瓜係唔苦的，好好食。我決定若有機會，一定會買返香港煮。

飯後到海中展望塔。之前在和歌山也去過一個類似的展望塔，唔知沖繩呢個有咩唔同呢？

一路行出展望塔，已見到海中有好多魚。爸媽不斷叫見到咩魚、咩魚，老公及家姐又不斷影相，剩係行呢條橋，都唔知行左幾耐。

哇，落到塔底，又真係好多魚，好似個水族館咁。爸爸聚精會神咁睇魚，媽咪就不斷嘗試講出魚的名，老公及家姐又係影相囉。

離開展望塔後，經過一小海灘，家姐嚷著要試"水"，自由人麻，無時間限制，想玩就玩啦。除了爸爸外，媽咪也陪我哋一齊除鞋玩水，你估下相中那隻腳分別屬誰﹖(平時最不拘小節的老爸，反而唔想整濕隻腳，又不斷提我哋要整乾淨隻腳先上車，有D奇怪呢！)

玩完水就去參觀菠蘿園，仲有得任食菠蘿添！

菠蘿園的一個特色，係可以坐呢D菠蘿車參觀園中種植的菠蘿及其他花卉。

在車上不斷叫"菠蘿、菠蘿"....可能見到太多菠蘿，中了菠蘿毒。(證據﹕家姐用手機錄咗坐菠蘿車的一段片，其中不斷有人叫嚷"菠蘿、菠蘿"，究竟此為何人呢？)

菠蘿園竟然有貝殼參觀﹖係喎，D貝殼又幾有特色及幾靚的。其中一心型貝殼還可以買的，做手信真好。

菠蘿公仔好得意呀！

見到都會笑埋一份的沖繩獅子公仔。我老公好後悔無帶佢地返屋企。

菠蘿園隔離有個水果樂園，咁近，參觀埋啦。點知真係無咩特別，最特別係可以餵羊。呢隻黑羊好霸道的，佢一出動吃我哋餵的草，其他白羊都怕咗佢，行埋一邊。

沖繩季節限定版---櫻花啤酒。老公因為要揸車，無得飲。返到香港仍叫嚷---"唔記得去試下，真係好後悔呢!"我老公在今個旅程有好多好後悔的事情呢！

天黑了，要返在本部港的海邊酒店。又海邊﹖真係響海邊喎，間房同個沙灘的距離，不足十米囉。有D似日劇Beach Boy個間民宿。

因為太遲返來，影不到日落景，但有少少光的夜景，也不太差呢！

這晚我book左在酒店BBQ，這是我哋的大餐，D牛肉同海鮮都好好食，日式炒麵都唔錯。

餐廳的日本哥哥示範一次點樣鐵板燒肉會較好吃，他示範完畢後，就由我和家姐充當大廚，煮今晚的大餐。

BBQ的位置與房間的距離好近，感覺好似去左Wild Camp咁，好特別。相中最左手面有燈光的地方，就係我地間房。

夜間的海灘好黑、好靜，望上天空，老公忍不住話好耐未見過咁多星，即刻用僅有的技術，影了難得一見的星空。

好飽．．．聽住海浪聲睡覺的感覺真好！