阿蘇火山 -> 猴子表演 -> 福岡天神地下街
尋晚我同老婆都訓得唔好，除左因為有d累之外，仲有的就係 ...... 食得太飽！隻長腳蟹真係太大隻，Daddy同Mammy今朝起身都仲話好飽！勁！
今朝要好早起床，因為車程好長。食過早餐，響豪斯登堡的酒店大堂等下等下，見到兩隻大Bear Bear，好得意，呢隻係豪斯登堡的主題公仔，我老婆當然唔放過同佢地影相啦！
出發喇！今早要搭兩個半至三個小時的車程，都幾長！車程約一個半小時左右，我地響中途站休息一下，嘩！唔知點解，日本d中途站 (稱為「道之站」)真係好特別，除左個廁所特別乾淨之外，站內仲有好多野賣，我地一見到炭燒獅子狗卷，離遠都聞到香味，梗係要買來試下啦！同香港食到的有好大分別，日本的好味好多！
日本係一個好注重環境清潔的國家，響條街基本唔會經常見到垃圾筒，日本國民教育亦好好，日本人會將自己製造的垃圾，用膠袋收集，拎番屋企先至掉，仲要分埋類先至掉的！
至於方便遊客及駕車人仕的道之站，外面就有幾個廢物回收箱，睇圖都知道點樣分類啦：玻璃樽、金屬罐、紙類、膠樽，分得幾清楚！仲有，不能分類的垃圾，仲會有兩個廢物箱，一個係可燃物，一個係非可燃物，真勁！我梗係要幫老婆影下做教材啦！
道之站中的商店。我見到一張label，立即影，我老婆問我有d乜好影，我問佢睇唔睇到「介助犬同伴可」！即係可以俾導盲犬入內！我覺得日本真係好「以民為本」，幾咁照顧不同需要的人仕，呢方面香港真係要學下！
好，叉完電，再出發！坐多一個小時車程，終於到達今日第一景點 --- 阿蘇火山。治路景色的變化，令我地好開心，因為見到由好少雪，到見到好多雪，就知道山上面真係好凍！
上到山頂，環境比較惡劣，大風大煙，火山口乜都睇唔到！惟有影下個牌，「到此一遊」囉！
山上有一個神社供人拜祭及奉納，響日本好多景點都有咁樣的神社，但響山上就比較少見！影相先！
呢張係阿蘇火山口周邊的「案內圖」，即係位置圖。
我地行下行下，去到火山口附近的雪地，感覺好似上左「玉珠峰」，茫茫白雪，天色陰暗，仲要係 ...... 周圍都唔見其他人，感覺奇妙，好似做左深山野人，隱姓埋名！
阿蘇火山高1258米，雖然唔算高，但以今日的天氣來說，印象深刻！(因為乜都睇唔到！)
搭番纜車落山，沿路都係一個字 --- 「白」！
好，食午餐先！點解今次又要影老婆呢？！因為 ...... 一向唔鍾意食肉的老婆，竟然對鐵板燒豚肉「愛不惜手」呀！真係好好味！
食飽飯，梗係要食甜品啦！飯堂隔離有一間雪糕店，聽導遊話d雪糕超級好味，好有牛奶味，梗係要試試啦！冰天雪地下食雪糕，真係好激的！
我好鍾意呢幅相，因為好有層次感！
離開餐廳，沿路落山的車程，正當我想小睡之際，我老婆突然問我拿相機，佢話見到一個寄生火山，好靚，影低做教材先！
好喇！約一個半小時的車程，終於去第二站 --- 猴子Show。猴子Show約40分鐘，共有3隻猴子表演，好守紀律，好得意！睇下隻猴子「Squad」得幾直！仲好過好多學生仔步操！
佢地又識玩波波平衡啦 ......
又識得玩高橋啦 ...... 仲有好多好多！勁！
最重要的，係佢地識同我老婆影相同握手！哈哈！真係禮貌大使！
好喇！今日最後的景點，就係福岡天神地下街，Shopping！影下個JR站先！
行左一個鐘多d，要走喇。響街邊見到幾檔，見d人入哂去「避風」，就知道裡面d野食幾好味！
好，返酒店！今晚住八幡皇都溫泉酒店，又有得浸溫泉，正！仲有，今晚食懷石料理，勁多野食，超豐富及好味！Yummy！
都係果句：食飽飯，浸浸溫泉，人生一樂也！
沒有留言:
張貼留言