日本九州特色之旅の第一天

鹿兒島機場 -> 鹿兒島

又到農曆新年，大家都想繼06年一齊去北海道、07年去台灣之後，今年再去日本。唔知點解，日本既魔力係極吸引的！

其實我地唔係早左好多去旅行社報名，不過團費都唔算貴，全包約$8,000以下，響農曆新年黎講，算真係好鬼死抵喇！我地後來知道旅行社每位加左成$2,500至$3,000，好「昆水」！
平d梗係有原因的，今次我地係搭中午機，第一日「蝕」左俾佢，哈哈！

第二，個團平係因為乘搭香港航空的機，會再平d添！

好，出發！架機中午12:45起飛，所以經過的地方都會睇得清楚，唔會好似「凌晨機」，黑忟忟，乜都睇唔到！就到達日本時，架機低飛時經過一d山脈，拿拿聲影低先，無乜幾可！

約下午5時到達鹿兒島機場，去到都要食晚飯啦！又「Being昆ed」！好，睇下個機場check行李的counter幾多人先！你地無睇錯，下午五時的鹿兒島機場係咁樣既！

入境後上車去食飯！好，第一餐係自助餐，求其叫d野食住先，因為Daddy Mammy同老婆話，想留番個肚出去食拉麵，ok！

其實d野食唔差，係選擇少d，都幾好味！

日本九州特色之旅の第二天

櫻島火山 -> 神風特攻隊航空資料館 -> 鵜戶神宮 -> 鬼之洗板 -> 宮崎

今早約七點半起床，見到窗外的風景都幾靚，影影先！

食過早餐，出發！車程約15分鐘後，先到位於九州南部的櫻島火山。櫻島火山係鹿兒島的象徵，因為佢係世界上不多見的活火山。我地去到，仲見到個山頂有白煙噴出，勁！

其實有好多人參觀櫻島火山，呢個角度影的火山，加上咁靚的天色襯托下，顯得櫻島火山特別靚！

日本九州特色之旅の第三天

豪斯登堡

尋晚浸完溫泉立即訓覺，好好訓，今朝起身好鬼精神！正！

酒店窗外的景色，好平和，好舒服，又正！

今日得一個行程，就係 --- 豪斯登堡！其實我同老婆都唔多鍾意去豪斯登堡，因為我地寧願去歐洲體驗囉！

一入豪斯登堡，必定要搭遊船，沿河睇到的景色好靚的！隻船都幾靚！

日本九州特色之旅の第四天

阿蘇火山 -> 猴子表演 -> 福岡天神地下街

尋晚我同老婆都訓得唔好，除左因為有d累之外，仲有的就係 ...... 食得太飽！隻長腳蟹真係太大隻，Daddy同Mammy今朝起身都仲話好飽！勁！

今朝要好早起床，因為車程好長。食過早餐，響豪斯登堡的酒店大堂等下等下，見到兩隻大Bear Bear，好得意，呢隻係豪斯登堡的主題公仔，我老婆當然唔放過同佢地影相啦！

出發喇！今早要搭兩個半至三個小時的車程，都幾長！車程約一個半小時左右，我地響中途站休息一下，嘩！唔知點解，日本d中途站 (稱為「道之站」)真係好特別，除左個廁所特別乾淨之外，站內仲有好多野賣，我地一見到炭燒獅子狗卷，離遠都聞到香味，梗係要買來試下啦！同香港食到的有好大分別，日本的好味好多！

日本係一個好注重環境清潔的國家，響條街基本唔會經常見到垃圾筒，日本國民教育亦好好，日本人會將自己製造的垃圾，用膠袋收集，拎番屋企先至掉，仲要分埋類先至掉的！
至於方便遊客及駕車人仕的道之站，外面就有幾個廢物回收箱，睇圖都知道點樣分類啦：玻璃樽、金屬罐、紙類、膠樽，分得幾清楚！仲有，不能分類的垃圾，仲會有兩個廢物箱，一個係可燃物，一個係非可燃物，真勁！我梗係要幫老婆影下做教材啦！

日本九州特色之旅の第五天

九州鐵道記念館 -> 門司港 -> 八幡 -> 福岡北九州機場

尋晚好好訓，因為又有溫泉浸！今朝一早起身，見到酒店窗外，心知不妙，因為好大雪，駕車道路容易塞車！

好，食飽早餐，出發去門司港。不出我所料，條路大塞車，又唔可以上高速公路，慘！

途中見到日本的工廠，我老婆叫我快快趣影低，因為好似「明日之後」咁，全個畫面只有灰色同白色！