一家大細遊台北の第一天

西門町 -> 烏來 -> 師大夜市

每逢農曆新年，我地就會計劃一家人去旅行，今年比較特別，除左外父外母想去之外，我「媽子」都想去下旅行，享受一下，好啦，我地決定兩家人一齊去啦！去邊處好呢？一來要考慮行程唔好太遠，二來又要大家都覺得好玩，最重要係有新鮮感！好彩上年我地同Pingu去過台北，發掘到D新景點，好啦，一於去台北啦！

今次報名的有八人：外父、外母、家姐、呀姨、表妹、媽子同我地兩公婆，因為外母同呀姨都去過台北好多次，都提議去D新景點；媽子就無乜所謂，不過身體比較差，又唔可以去D好tough的景點，令今次計劃行程有好多顧慮的地方......

好，今次旅行以relax為主，兩家人可以溝通一下，幾好呢？！

我地於21日上午五點半左右就到達機場check-in，搭港龍KA486於07:40起飛，「呀妹旅行團」出發喇！

我地根據上次的行程同經驗，先響東龍大飯店放低行李，再去西門町的阿宗麵線食D野，好，出發喇！

第一站就係上次都有去的烏來，因為上次有經驗，今次帶隊都有D信心！上年到烏來的時候落雨，今次就唔同喇！好好天呀！仲見到條好靚的瀑布！

仲有，上次來的時候係四月，都見唔到台灣的櫻花，今次終於見到喇！我地「成團人」都好開心呀，爭住影相添！我地都影左幾張！

一家大細遊台北の第二天

九份 -> 瑞芳 -> 平溪 -> 十分 -> 十分瀑布 -> 大華 -> 饒河街夜市

尋晚食左個好美味的蛋糕，yummy！

今早一起出門口，就見到好吸引人的donut，超想食，不過仲未開門呢！

 
早上的西門町十分寧靜，好多商舖未開。

好，今日第一站 -- 九份！無錯，又係九份！指定動作來的，外母同阿姨次次去台北都會去的！所以途中無乜影相，我地響火車上就傾吓計、休息一下囉！

去到九份，當然又係食啦！什麼肉丸呀、芋圓呀、刨冰呀．．． 太多野食喇！狂風掃落葉！
食飽就行下，我地響九份買左件人手繪畫的 T 恤，都畫得幾靚的！我就買左隻「三狗組」CD，係由三隻狗仔唱歌的！番屋企播俾 Miu Mo 聽，佢地一定會跟住唱 ( 吠 ) 的！

見到有個師傅整玻璃，我老婆話遲d去日本試下整玻璃先！

一家大細遊台北の第三天及第四天

西門町 -> 大溪花海農場 -> 陽明山 -> 淡水

西門町 -> 地下街 -> 龍山寺

經過尋日的「奇妙旅程」，今日去番上年我地去過的大溪花海農場。外母、阿姨、表妹、家姐同媽子都好鍾意花，大溪農場就啱佢地喇！

今次我地選擇租一架八人車，由酒店直接開往大溪，經過兩個鍾頭的車程，到達大溪花海農場，「團友」都十分鍾意，因為d花真係好靚！但外父就有d心不在焉，可能掛住釣魚！

因為去年到大溪花海農場係四月，花的種類較多，花亦開得較燦爛，但今次係農曆新年二月份，有部分花未開，所以有少少失色。不過團友都覺得OK就夠了！

睇下我老婆影的相片，就知佢無上次咁興奮了！