日本東北 --- 福島山形宮城三縣行の第四天

銀山溫泉 -> 宮城縣松島 -> 瑞巖寺 -> 仙台

今早我同老婆特登六點半起身，一大清早感受銀山溫泉的寧靜同浪漫！一出酒店門口，見到清雪多左好多，尋晚一定落左好多雪喇！早晨的銀山溫泉好少行人，好寧靜、好和平。銀白色的雪山，兩邊房屋屋頂鋪滿白雪，更童話feel！

我同老婆都好鍾意今早的景色，真係靚到唔知點樣形容！！！

古勢起屋的全貌，好有特色的！

其實我都唔係好識得影相，但係響呢個環境，任何人用任何相機都會影得好靚的！

老婆就默默地支持我影相，仲幫我拿腳架，好，為左報答老婆，我就影多d靚相先！

行下行下，行左去山邊的酒店附近，尋日無行過的！嘩！原來仲靚！又影！

一條普通的小溪，鋪滿積雪，似唔似 Postcard 的風景呢？！

我老婆忽然話咁大個女，未試過訓雪地，今次見到個咁靚的景色，決定一試！好！d雪真係幾厚的！佢話訓響雪地軟綿綿，好舒服的！

跟住佢除低兩隻手襪，睇下！我老婆的剪影！幾得意！哈哈！

我之後都有訓雪地呀！真係好舒服的！值得一試！咁靚的雪景，點捨得唔影相呢？

好喇！到食早餐的時間了！好好好豐富的早餐！仲有，朝朝早餐都食一大碗飯，想唔肥都幾難啦！

食飽早餐，要離開銀山溫泉喇！Daddy話尋晚無出去睇過景色，想出去行下。我地就同daddy及家姐行去影下相，好！把握最後機會先！

我地上車離開銀山溫泉，個個都話銀山溫泉好靚，有d唔捨得添！

好喇，要開車喇！雖然有GPS，但老婆仍會睇實個地圖，因為有時GPS會帶我地行錯路，有時會行條封左路的山路，所以佢一定會睇地圖作輔助。其實我駕車、老婆睇map，真係幾合拍的！

我地下一站係宮城縣的松島，要揸成三個鐘頭車，響銀山溫泉仲係落緊飄雪，一離開就落大雪！雖然用左雪呔，揸車都要特別小心！我地都好擔心松島落雪會唔靚的！

一到達松島，天公造美，仲有藍天添！超超超感恩！就連mammy都話感恩！幾犀利！第一站去松島海鮮市場，醫醫肚先！

一入地下，見到新鮮生蠔，200円一隻，即開即食！點捨得唔買呀！我地每人食左一隻，唔夠喉，每人再食多一隻添！

我地的午餐買左刺身、魚生飯、蒸蛋、生蠔．．．

仲有兩碗海鮮拉麵！正！

響室內食飽仲唔夠，響門口有檔碳燒生蠔，仲正！又食！

睇下d燒生蠔！香噴噴！依家惗番都口水流！Yummy！

好，食飽飽，立即出去買飛搭松島觀光船，去松島坐觀光船係指定動作來的！買完飛，影下相先！

睇下個藍天！係咪超超超感恩先！

我地就係坐呢隻觀光船喇！估唔到有好多人排隊的！

好，上到船，第一件事做d乜？！就係買卡樂B蝦條喇！用來餵海鷗呀！未開船d海鷗已經準備好喇！

一開船，群情洶湧！至少有七、八十隻海鷗跟住的地隻船呀！何其壯觀！

松島係「日本三景」之一，其餘的有天橋立同嚴島(宮島)。我本來想影下d島，其實真係好特別的！不過影影下，老婆就叫我影下d海鷗有幾誇張．．．

我一睇！嘩！真係好誇張！呢隻仲勁，隻觀光船開住的，佢竟然企定定響船尾等人餵佢食蝦條！

我老婆2006年響北海道坐破冰船時都餵過海鷗，但今次真係仲誇張呀！非常多海鷗！

睇下d海鷗幾咁「積極」？！

餵極都仲有海鷗飛過來的！超誇張！

幫老婆影完相同video後，係時候影下d島喇！其實真係幾靚的！

條紅色橋叫做福浦橋，係松島著名的拍拖勝地！我地就覺得好凍，無去行喇！

一小時後遊完船河落船，當然要影影個牌留念啦！



真係好多好多人坐觀光船的！

我地跟住人朝，行去碼頭對面的瑞巖寺。先會經過呢條小徑，都好靚的！

到達瑞巖寺入口，見到裡面做緊維修工程，好多地方都遮住，我地決定唔入去喇！

行下松島碼頭外的松島購物大街，路經一間製作木頭娃娃的店舖，老伯正用心的製作木頭娃娃，不出兩分鐘，已經將木頭娃娃的外型做好了！犀利！

店舖裡的木頭娃娃都好細緻的！

來到宮城縣，梗係要買番個史?仔宮城限定的手繩俾老婆啦！



好喇！要去下一站 --- 仙台市！我地一離開松島，天又開始落雪喇！超感恩！經過一個小時我車程，先到酒店check-in，再行過去仙台車站搵野食！

仙台最著名的就係食牛舌，仙岩車站三樓有一條牛舌通，有好多間專食燒牛舌的店舖。我地搵左一間要排隊的店舖食，原因？！有人排隊的食店，一定有好野食！



一入店，睇睇menu，我老婆、家姐、daddy同mammy都order燒牛舌定食！我就order左個特級厚切燒牛舌定食，睇下有乜唔同先！呢個就係普通燒牛舌定食！九個正！

呢個就係特級厚切燒牛舌定食喇！真係厚切呀！十分有口感！十個正！daddy都話十分正！全個trip最深刻印象就係呢一餐！



食飽飽！送daddy番酒店先！我地四個又出去逛街！我地梗係要去中央通同一番町商店街行下啦！晚上七點半，人唔算好多，有d店舖都關門，其中包括我老婆想去的 Agnes B 專門店！老婆勁失望！

途經一間生果舖，好多生果賣呀！



我就忍唔住買左一盒四個的青森蘋果返香港喇！超超超甜！

d士多啤梨都好平的！唔錯唔錯！

至於我老婆呢！只係買到一條銀頸鍊囉！家姐就有大收穫喇！響呢間專賣宮崎駿物品的店舖內，買到天空之城的飛行石頸鍊，係mammy送俾佢的生日禮物，又買到一件好平的毛毛衫，佢十分開心呢！

行左個幾鐘頭，臨走前見到日本學生的書包，嚇我地一跳！要成43,000?，即係港幣$3,700，買個書包等於買一個 Gucci 或 Agnes B 袋！超貴！

好！今晚訓好d，因為聽朝先至係全個行程的精華！