日本東北 --- 福島山形宮城三縣行の第三天

山形縣 -> 最上川 -> 銀山溫泉

尋晚訓得好，因為又去浸溫泉，又食得飽，當然daddy好番好多令我地放下心頭大石，會更好訓啦！

今早又去尋晚食飯的房間食早餐，一入房已經見到食物準備好喇！

日式早餐，包括溫泉蛋，漬物．．．

仲有燒魚啦！我同老婆就最驚食納豆喇！

好，食飽飽，番酒店執拾行李。房間係十至十四疊的，有一房一廳，daddy同mammy訓房。都幾舒服的。

房間最特別的，係呢個私人溫泉。真係溫泉水來的！我同老婆一朝早就浸左一次，正！

今日其實只得一個行程，就係去最上川。但係駕車都要成兩個鐘頭，都幾耐的。我地途經新庄市，亂打亂撞去左一間幾特別的拉麵店食午餐。

個拉麵湯底係由雞內臟肴製的，有好濃烈的雞雜味，唔係人人都接受到陣味道的！

呢碗真係有雞內臟做材料添！個餃子就真係好好味！

食飽後，開多大半個鐘頭車，去到最上川，準備乘搭觀光船欣賞風景。上船前先入商店睇下手信。家姐見到呢盒車厘子泡芙，好似好好味咁，就買左一盒，點知我地返到酒店先發覺唔見左盒手信！仲要係由我放上車的，無理由會唔見的？！唔知係咪搬行李時跌左喇！Anyway，響度同家姐 say 句 sorry 先！

車厘子味的 kit kat ，唔知好唔好食呢？

一場來到山形縣，一定要買個史廸仔山形版做紀念啦！

好喇！期待已久的最上川之旅即將開始喇！我地就係坐呢d觀光船欣賞景色的！

船程來回大約一個半小時，起初我地仲擔心會唔會吹足個半小時風，原來船內有窗，船頂有透明膠片，船內仲有暖氣供應添！超犀利！上船後，有個伯伯介紹最上川沿途的風景，佢好nice的，成日講笑(雖然佢講日文，我地唔識聽)，又成日問我地問題(佢知道我地來自香港)，搞到我都唔知點答佢好，我又再再再一次激發起要學日文的決心。

最上川呢個地方，係蔡瀾響蔡瀾品味介紹的。佢地當時響十月左右，山上的樹葉仍然係綠色，蔡生話最上川最靚時係冬天的景色，靚到好似成張水墨畫一樣！我老婆就係聽左呢句，就plan今次一定要去埋最上川喇！

我地懷著興奮及期待的心情開船，最感恩係開船時無再落雪喇！好野！

開船不久就已經見到咁樣的景色 ---

真係好靚！我同家姐只識得狂影相！老婆就靜靜地欣賞窗外的景色，奇怪的就係daddy同mammy一路好留心聽呀導遊伯伯講解，究竟係咪聽得明伯伯講乜呢？！

途經一段山坡，我同老婆真係覺得靚到不得了！嘩！嘩！嘩！好靚！好靚！好靚！我地剩係識得咁樣講！真係一張水墨畫的景色！

經過淺灘，水流較急，但景色仍然好靚！

見到一個紅色的鳥居，後面就係最出名的白系之淹，冬天不會結冰的！仍然有流水！與鳥居形成美麗的畫面！

回程喇！我當然要同伯伯影張合照啦！

影完相，我收起左相機，同老婆靜靜地欣賞最上川的景色。最上川名字的由來，意思係「最美麗的河流」，經此一遊，我同老婆十分認同！

落船時大家都好唔捨得，因為真係好回味剛才的景色！再影多幾張相先！

好喇！今日得一個景點，去完最上川就返酒店喇！無錯！返酒店！我地想響下午四點前返到酒店，原因只得一個：酒店附近的景色超級靚！

我地今晚住山形縣銀山溫泉區的古勢起屋，係一間好著名的溫泉酒店！我地去到附近唔係好識點入去，忽然有一個職員問我地去邊，我地話去古勢起屋，佢話佢就係古勢起屋的職員，仲叫我地跟佢架車去停車場添！如果呢處係大陸，我就一定唔會理佢喇！

去到停車場，佢將我地d行李搬去佢架車，然後叫我地上佢架車，全程好細心、好有禮貌。去到銀山溫泉的小街，已經有另一個職員等候著，然後將我地的行李搬落車，再用手推車將行李搬進酒店內。

呢個就係我地見到銀山溫泉區的環境 ---

真係靚到呢！我、老婆同家姐都深深被吸引著！！！

入酒店放低行李，daddy響房間休息，我地四個就爭取時間影相同參觀。呢間專賣木頭娃娃，響N年前的日劇 --- 阿信的故事中出現的木頭娃娃呀！

裡面有好多款式的木頭娃娃，d木頭娃娃係母親給女兒做紀念的，可保平安的，仲一代傳一代的！呢個900円，唔貴，我老婆買左兩個，一個留作紀念，一個送俾佢最要好的朋友，佢最近生左個B女呀！恭喜恭喜！

裡面有好多款式的，好得意！

行左一陣，已經係下午五點，天色開始黑，酒店開始著燈，銀山溫泉的景色更靚！

呢間就係古勢起屋喇！都好靚的！

下午六點，準時食晚飯。今晚食的種類好多，有刺身、和牛燒、仲有車厘子酒添！

Daddy話今餐佢俾98分添！正！好，浸埋溫泉，今晚早d休息，因為聽朝要好早出發，有好多景點呀！